¶ Selectae aliquot legum atque ordinationum Academicarum particulae, quas D. Procancellarius, quò magis hoc seculo ad neglectum aut desuetudinem vergere videntur, eò impensiùs à singulis (pro suo cujusque loco atque officio) observandas proponit, in virtute juramenti, & sub poena quae incumbit transgressoribus.
1 SCholares omnes modestiam omnibus in locis colant: inferiores superioribus loco cedant, & debitâ reverentiâ prosequantur.
2 In templis scholisque nemo ausit sedilia conscendere, nemo in publicis exercitiis indecorum strepitum edere, pedibus pulsando, pluteos caedendo, cachinnando, sibilando, aut indecenter excreando.
3 Dominicis festisque diebus, dum conciones antemeridianae pomeridianaeue habentur in ecclesia beatae Mariae, nemo scholaris quocunque prętextu adeat conciones in aliis templis.
4 In templo beatae Mariae nemo infra gradum Magistrorum (nisi mensę Sociorum commensalis fuerit) intrare praesumat in aream Magistris destinatam, aut superiora ex utroque areae latere sedilia occupare.
5 Nemo galero utatur, aut in collegio, aut extra collegium; exceptis Nobilibus, & Militum primogenitis. Graduati, cum pileis scholasticis, utantur etiam epitogiis: in publicis verò disputationibus, concionibus ad clerum, supplicationibus, & congregationibus universis, habitu atque capucio (juxta solennem Academiae formulam) Regentes insigniantur.
6 A congregationibus Magistri Regentes & Non-regentes sese ne absentent; praesentes verò, nec discedant sine venia, nec disciplinam gravitatémque tanti Senatus, rixis, clamoribus, transcursibus, conglomerationibus, aut subselliorum scansionibus violent. Bedelli congregationes in singulis collegiis singulas convocent, atque in collegiis ibi, ubi omnes commodè audire possint.
7 Sermo Latinus tantùm audiatur, tam in publicis conventibus scholísque, quàm in mensis collegiorum & familiaribus colloquiis.
8 Lectores publici omnes statis diebus horis (que) diligenter praelegant: auditores lectionem aliquam ejus professionis cui assignantur ne omittant: Decani collegiorum monitores septimanatim singulos singulis scholis artium constituant: monitores, finitâ statim lectione, schedulam absentium exeuntiumve (pro suo cujusque collegio) alteri Bedellorum tradant, sub poena statuti: Bedelli septimanatim deferant ad Procancellarium, sub virtute juramenti.
9 Inceptores, Baccalaurei, Quaestionistae, Sophistę omnes, Moderatores praecipuè & Disputantes, ab omnibus invitationibus, comessationibus & compotationibus (tam publicis quàm privatis) omnino abstineant, sub poena infamię publicâ sententiâ infligendę, & suspensionis ad annū ab omni gradu suscepto & suscipiendo.
10 Ad publicas Magistrorum disputationes ut exeant è collegiis redeántque honesto comitatu stipati, Decani collegiorum ex statuto curent: Baccalaureorum atque Sophistarum ut intersit sufficiens numerus, Procuratores videant.
11 In disputationibus omnibus Magistrorum, Baccalaureorum, & Sophistarum (sive publicè habeantur in Academia, sive privatim in Collegiis) nulla ne (que) oratio, ne (que) quaestionum explicatio, à quoquam (Theologis, Jurisconsultis, & Medicis exceptis) de scripto legatur, sub poena quinque solidorum, toties quoties, inter Procuratores atque Bedellos dividendorum.
12 Nemo scholaris (publicis privatísque officiariis exceptis) forum frequentet, vel diutiùs in plateis moram trahat, aut in tabernas, cauponas, diversoria, officinas pętivendulorum, aedésve privatas (nisi justa de causa per Procancellarium approbanda) sese immittat.
13 Nemo ocreatus simul & togatus incedat: nemo canes venaticos alat, néve balistis utatur aut bombardis, aut retia tendat volatilibus.
14 In festivitate Nata [...]tia nemo cum lychnis aut larvis, néve cum tubis aut tympanis exeat è collegio suo.
15 Nemo se intromittat in solennes conventus (quos Sessiones aut Assisas vocant) neque in electiones militum Parliamentariorum, aut in lustrationes armorum.
16 Portae collegiorum horis statutis claudantur: & nemo scholaris extra collegium in privatis aedibus cujuspiam praesumat pernoctare.
17 Quaestionistae in scholas à Patre suo producti, Praevaricatores etiam omnes, & Tripodes, & alii Disputantes, à mimicis salutationibus, & rerum politicarum, magistratuum, aliorúmve nominationibus, à jocis quoque scurrilibus, à gesticulationibus, obscoenitatibus, Anglicani sermonis ineptiis, dicteriisque omnibus penitùs abstineant, sub poena suspensionis, vel (si atrocitas facti postulaverit) expulsionis.
CANTABRIGIAE [...]