Bone chancon plest vos que ge vos die de haute estoire et de grant baronnie Meilleur ne puet estre dite n oie Ceste n est pas d orgueil ne de folie de traison ne de losengerie mes d un barnaje qui Jhesu beneie del plus tres fier qui onques fust en vie A Seint Denis en la mestre abaie trovon escrit de ce ne doute mie dedanz un livre de grant encesorie n ot que trois gestes en France la garnie ne cuit que ja nus de ce me desdie Des rois de France est la plus seignorie et l autre apres bien est droiz que jeu die fu de Doon a la barbe florie cil de Maience qui molt ot baronnie El sien lingnaje ot gent fiere et hardie de tote France eusent seignorie et de richece et de chevalerie se il ne fusent plain d orgueil et d envie De ce lingnaje ou tant ot de boidie fu Ganelon qui par sa tricherie en grant dolor mist France la garnie quant en Espagne fist la grant felonnie dont furent mort entre gent paiennie li .xii. per de France Oi avez dire en meinte chancon que de la geste qui vint de Ganelon furent estret meint chevalier baron fier et hardi et de molt grant renon Tuit seignor fusent de France le roion san eus n eust orgueil et traison mes par orgueil por voir le vos dison est trebuchiez en terre meinz hauz hom ausin com furent de verte le savon deu ciel li engres qui par lor mesproison trebuchie furent en l infernal prison ou il n avront james se dolor non Del ciel perdirent la seinte mansion par lor orgueill et par lor foloison Et ausin furent li parant Ganelon qui tant estoient riche et de grant renon se il ne fussent si plain de traison De ce lignaje qui ne fist se mal non fu la seconde geste La tierce geste qui molt fist a prisier fu de Garin de Monglenne au vis fier De son lignaje puis ge bien tesmoigner que il n i ot .I. coart ne lannier ne traitor ne vilein losangier einz furent sage et hardi chevalier en combatant et nobile guerrier Einz roi de France ne vodrent jor boisier lor droit seignor se penerent d aidier et de s annor en toz leus avancier Crestiente firent molt essaucier et Sarrazins confondre et essillier .IIII. fiz ot cil Garins au vis fier onques ne furent plus hardi chevalier mien escient que en un jor entier lor grant bonte ne porroie noncier Li premiers fiz mentir ne vos en quier si fu Hernaut de Biaulende le fier Li autres fu si com j oi tesmongnier Mile de Puille qui tant fist a proisier Li tierz apres fu de Genvres Renier et li carz fu dan Girart le guerrier De meillors princes ne puet nus hom pledier de mauvestie n orent jor reprovier Mes ainz que fussent adobe chevalier quant erent jeunne et bacheler legier Garin lor pere avint grant enconbrier car Sinagons .I. paien aversier qui Alisandre avoit a jostissier tote lor terre lor ala chalengier ardoir en feu praer et essillier Defors les portes n ont vaillant .I. denier si nel conquierent au fer et a l acier Or les secore cil qui tout puet jugier c or lor croist molt grant guerre Del duc Girart avez sovant oi cil de Vianne au coraje hardi et d Ermenjart et del conte Aimeri mes del meillor vos ont mis en obli cil chanteor qui vos en ont servi car il ne sevent l estoire que ge di la comencaille dont la chancon oisi qui fu Girart ne ses peres ausin mes geu dirai que bien le sai de fi Icil Garins dont vos avez oi .IIII. fiz ot qui molt furent hardi et chevaliers onques meillors ne vi Mes ainz qu il fusent de lor armes garni ne de richece ne de terre sessi par grant poverte furent tuit departi com vos orroiz se ge auques en di Ce fu en mai qu il fait chaut et seri que l erbe est vert et rosier sont flori a Bar sor Aube .I. chastel seignori la sist Bertrans en un vergier flori uns gentis clers qui ceste chancon fist A un jeudi quant del mostier issi ot encontre .I. gaillart pelerin qui ot seint Jasque aore et servi et par seint Pere de Rome reverti Cil li conta ce que il sot de fi les avantures c au reperier oi et les granz poines que dant Girart sofri einz qu il eust Vienne Ce fu a Pasques une feste joie que Damedeu a en terre establie dont tote gent est le jor esbaudie Garin li vieuz a la barbe florie fu en Monglane sa fort cite garnie et sa moillier que il ne haoit mie .IIII. fiz ot de molt grant seignorie forz et legiers et de grant baronnie mes de tant fu la chose mal partie que de pain n orent entr eus toz une mie ne char salee ne de nul vin sor lie fors trois gastiaus qu il orent en baillie et .II. poons en la sale votie ses atornerent li qeu et sa mesnie N ont plus vitaille en la cite entie et un destrier et un mur de Sulie et .III. escuz et trois lances forbies n ont plus d avoir ne d autre menentie Voit le li peres li cuers l en atendrie plore des euz durement se gramie les lermes corent sor la barbe florie Hernaut le voit toz li sanz li fremie ne puet tenir que fierement ne die C avez vos pere por Deu le fiz Marie Plorer vos voi ce resanble folie dites le moi nel me celez vos mie ou se ce non par le cors seint Eslie n avrai mes joie en trestote ma vie car traison resenble Biau sire pere dit Hernaut li cortois si m eist Deus qui establi les lois plorer vos voi s en sui en grant effrois Se nel me dites molt ert mes cuers destroiz de duel ce cuit me partira en trois Fiz dit li peres jeu vos dirai aincois si m eist Deus qui est soverains rois ce est por vos que sui en tel effrois Quant vos regart vestuz de voz dras blois si me senblez garconnet a borjois de povre afere et de povre hernois Cuidiez enfant que n en soie destroiz de la poverte que avez sor mon pois Tout a ce fet dant Sinagons li rois qui nos essille et chastiaus et manoirs tote no terre nos tient en tel defois que n i prenons vaillisant .II. mensois De la vitaille nos est il molt sordois que n en avons a .II. jorz ne a trois s ai poor de ma vie Biau sire pere dit Hernaut li sachanz del dementer est il hontes molt granz N a so ciel home s il se vet esmaiant que enpor vil ne l aient si parent De l outreplus vos dire mon senblant si m eist Deus tel se vet dementant et si parole del tans ca en avant ja ne verra la feste seint Jehen N avra chastel ne cite en estant ne borc ne vile .II. deniers vaillisant ne ver ne gris ne hermin trainant Por ce perdirent li Juif mescreant dedanz Esgipte es deserz d Abilant ou nostre Sires les garda proprement et de la maine les reput longuement Il le mescrurent si n en orent neant einz lor failli l aide Deu le grant bien dut faillir quant erent mescreant Encore en est de la mauvese gent qui Deu ne croient ne aiment tant ne quant ne a lor preu ne a lor sauvement Et il est Pasques une feste joiant que moinent joie li petit et li grant Or noz donez a mengier liement car ne savez seu feroiz longuement Fiz dit li peres molt par estes sachant un arcevesque n en deist hui autant Deus me confonde se mes hui me dement L eve demendent s asient meintenant mes de vitaille n orent mie grammant Quant mengie orent joer vont li enfant Hernaut monta ce fu le plus sachant les .III. a pie se vont esbenoiant Ars ont tanduz et saietes tranchanz que chevalier ne sont pas voirement Par mi la porte s en isirent errant Defors les murs cort le Rosne bruiant ce est une eve mirabileuse et grant qui lor amoine les nes et les chalanz ne fust la guerre Sinagon l amirant molt fusent riche asaze et menant Girart regarde devers soleil levant le droit chemin com il se vont joant entre .II. tertres vers .I. bois verdoiant et voit venir set paiens mescreanz .XX. murs trosez amenoient devant Cist mar vindrent d Espangne Li damoisel firent molt a proisier les somiers voient el grant chemin plenier Girart li mendres en apela Renier Frere fet il a celer nel vos quier moi est avis ci vienent li somier qui sont chargiez et d argent et d or mier Garin mon pere en avroit grant mestier il et ma dame qui n ont mes que mengier Hui vi mon pere plorier et lermoier desoresmes li devons nos aidier et cest avoir conquerre et gaegnier Et dit Hernaut Lessiez les aprochier que par la croiz que requierent paumier tout voirement ferrai ja le premier par mi le cors de cest carrel d acier A maleur dit Girart a Renier S or devonons come garcon archier l an ne nos doit molt vilment reprochier Mes prendre au poinz et tuer d un levier ci devons nos noz vertuz essaier .C. daaz et qui archier fu premier Il fu coart si n osa aprochier Milles parla l orgueilleus et le fier Seignor dit il a celer nel vos quier a .II. premiers me vodrai essaier Se nes puis prendre et par moi jostisier si m eust Deus ne me pris un denier Et moi les .III. seignor ce dit Renier se ge nes puis par mon cors jostisier .C. daaz et qui puis ert chevalier ne me donra a boivre n a mengier Et moi les autres dit Hernaut au vis fier Et dit Girart .I. m en devez lessier Se ge le puis par mon cors jostissier si m eust Deus bien m en porrai proisier A cez paroles lor vienent li somier que devant aus chacent li pautonier Hernaut les vit si lor prist a huchier Fill a putain gloton estez arrier Ci vos covient le paiage lessier Le treuage vos covient a paier De cest avoir que portent li somier veil la moitie soit d argent ou d or mier voire tot l autre sanz autre parconnier Tot nos leroiz que que doie ennuier Quant cil l antandent n i ot que corrocier L un d eus respont qui se fist le plus fier Mau daaz et qui ert a l ostroier N a so ciel home s il nos ossoit touchier ne rien tolir vaillisant .I. denier cui remeinsist chastel a pecoier son cors meismes s en le pooit baillier seroit panduz sanz autre recovrier Hernaut l antant le sans cuide changier sore li cort a guise d ome fier el chief li melle tot son pong senestrier hauca le destre tel cop li a paie que le mestre os del col li a brisie devant ses piez le fet mort trebuchier Li autre corent sanz plus de deloier chascun celui que il trova premier ala ferir sanz autre menacier mort les abatent el grant chemin plenier Girart li mendre n i vost plus delaier meins se vanta mes mieuz fist a proisier .II. en fist morz devant lui trebuchier Tuit sont ocis li cuivert pautonier Les somiers pranent li damoisel proisie vers la cite les pranent a chacier par mi la porte s en reperent arrier einz ne finerent juqu au pales plenier Voit les li peres n i ot que leescier il cort ses fiz acoler et besier car menant sont et riche Or fu la cort menant et asazee de bons deniers et de meinte denree or revendra la mainiee ennoree que departie estoit par la contree Au mercredi que Pasques fu passee li .IIII. frere sanz nule demoree del mostier issent quant messe fu chantee Lors ont ensemble lor reson devisee qu il s en istront de la cite loee conquerre ennor en estrange contree Hernaut l ainne a la chiere menbree son pere apele a la barbe meslee et sa moillier la duchoise senee Pere fet il ore oiez ma pensee vos estes ci entre gent desfaee vostre terre est tote environ gastee mes si est forz ceste cite fondee ne doute asaut une pome paree La merci Deu qui fist ciel et rousee tele richece vos avons aportee c avons conquise vers cele gent desvee devant .I. an n iert vo gent afamee Ore en irons pere s il vos agree conquerre ennor en estrange contree Par foi dist Miles c est verite provee aler m en veil n i a mestier celee de ci a Rome sanz plus de demoree proier seint Pere par bone destinee q annor me doint que molt l ai desirree Ce que il dit fu bien chose averee buer i ala que Puille a conquestee tote Romengne et Palerne aquitee puis fu dus de Sezile Li catre frere n i ont plus terme quis meintenant montent n i ont plus congie pris tout en plorant partent de lor amis Grant duel en fait Garin li dus gentis et sa moillier qui tant a cler le vis Vait s en Hernaut a Biaulande el pais une cite qui molt fu seignoriz Qant il i vint si fu morz et feniz li cuens ses oncles qui tenoit le pais Oiez seignor que Deus vos soit amis quele avanture avint au franc marchis il prist moillier qui fu franche et gentis fille a un duc qui molt fu posteis cil tint Marsone en fie ce m est avis De ceste fu li frans cuens Aimeris qui del lingnaje ot desor toz le pris ci comence la geste Entre Renier et Girardin l anfant ne demenderent escuier ne sergent chascun monta sor .I. mulet enblant si acoillirent lor grant chemin errant Pasent meint tertre et meint fier desrubant et meint grant bois et meint eve corant juqu a Vienne ne vont pas sejornant la se herbergent li damoisel poissant Ostel ont pris chies Hervi le vaillant un borjois riche sor le Rosne bruiant Cil les conroie la nuit molt richement de venoison de vin et de piment Apres mengier s en vont esbenoient voient Vienne la fort cite vaillant les murs de marbre qui molt sont haut et grant Girart parla qui le cuer ot vaillant dit a Renier Vez cite bien seant Ne vi si noble en trestot mon vivant Cil qui la tient doit estre molt poissant si n avoit plus s est il riche menant A lor ostel reperent li enfant li lit sont fet si couchent meintenant juqu au matin a l aube aparisant Congie ont pris a lor oste vaillant cil les comende au glorieus puisant qui de la Virge fu nez en Biauliant Et cil monterent sor les mulez enblant si en entrerent en lor chemin errant Lor granz jornees n irai pas devisant a Cligni vindrent a un avesprement La nuit herbergent au bon abe Morant qui les conroie la nuit molt richement De plusors mes orent a lor talant et li bons abes lor fist molt biau senblant Apres mengier les vet molt regardant si lor demende Dont estes vos enfant De quel lingnaje Nel me celez neant Et se vos estes escuier ne sergent c ailliez seignor et riche cort querant dites le moi s il vos vient a talant Et dit Renier Jeu dirai voirement car il est fous qui a preudome ment Fiz sui Garin de Monglanne au vaillant d une cite de Gascongne la grant Tot jorz a guerre vers sarrazine gent Or l a assis Sinagon l amirant en sa cite et derriere et devant En France alons a Charle le poisant por lui servir se lui vient a talant un an ou .II. voire trois en avant li ferons son servise Bien ot Renier oi et escoute l abe Morant qui tant ot de bonte Il lor respont par molt grant amiste Par Deu enfant de grant gent estes ne de haute gent et de fier parente par plusors foiz le m a l en bien conte Mes d une chose me dites verite se fustes onques chevalier adoube Nanin voir sire nel lessa povrete par grant poverte somes nos desevre de nostre pere qui nos a engendre L abes l antant molt en a grant pite son senechal a molt tost apele Amis fait il n i ait plus demore chemise et braies orendroit lor donez a ces danziaus par bones amistez dont il seront vestuz et acesmez plus en seront en toz leus ennorez Sire fet il a vostre volentez Tout ce aporte qu il i ot comende et li danzel se sont bien acesme Deus dist Girart bon roi de majeste or somes riche menant et asaze Deus et seint Pere vos en sache bon gre de cest avoir que nos avez preste jeu tieng a prest par la foi que doi De si le sodrai se ge vif par ae A ice mot sont li lit apreste Couchier se vont qant il fu avespre de ci au mein que il fu ajorne Lors se resont vestu et acesme congie demendent es mulez sont monte si s an tornerent le grant chemin ferre Biaune trepasent desoz Palatre au gue et puis Dijon .I. bon chastel loe par Chasteillon sont apres trepase dedanz Borgongne n ont guieres sejorne tant chevauchierent li vassal adure c a Paris vindrent la mirable cite Le roi demendent n en ont mie trove a Reins estoit ce lor a l an conte Qant il l antandent si lor en a pese d ilec s en tornent juqu a Reins sont ale la trovent Charle le fort roi coronne Li denzel sont en la vile ostele Oi l avez et si est verite qant hom est povres si est en grant vite VIII. jorz entiers ont en la vile este qu i n ont lou roi veu ne esgarde ne a sa cort ne mengie ne disne Un diemenche qant il fu ajorne Girart se lieve s a Renier apele Frere fet il qeus est vostre panse .VII. jorz tot plains avons ci sejorne c a Charlemene lou roi n avons parle ne a sa cort ne venu ne ale ne pris avaine ne denier monnee Se somes auques en iceste cite nen remenrons vaillant .I. oef pele ne garnement ne mulet afeutre Li vif deable nos i ont amene car cist pais est plains de grant laste Molt est cist mieudres la ou nos fumes ne ralons nos en trop avons demore Renier l antant pres n a le sans desve par mautalant a Girart regarde Li vif maufe te sont el cors entre S ainsi m en vois com tu as devise qant a Monglenne esterons retorne vandra encontre mon riche parente demenderont ou nos avons este Et je dirai A Paris la cite et puis a Reins ou le roi ai trove et si ne l ai veu ne esgarde ne a sa cort ne beu ne disne ne pris avoine ne denier recovre Lors me tandront a recreant prove si en serons escharni et gabe Je irai ja a la cort en non De s avrai avaine qant il ert avespre Mes foi que doi au roi de majeste s il i a nul si hardi ne osse qui la me vet chier sera conpare einz que ge m en departe Entre Girart et son frere Renier vont a la cort qui q an doie ennuier les huis paserent tot malgre le portier L eve demendent s asient au mengier onques n i orent c un petit pain entier et une foiz a boivre a grant dangier qant il le voient n i ot que corrocier Li senechaus si s en prist a drecier ill ot vestu un fres hermine chier et un bliaut q an ot fet entaillier done li ot .I. novel chevalier si s en fist plus et orgueilleus et fier en sa mein tint .I. baston de pomier A haute voiz comenca a huchier Ore a l avoine venez i escuier ou par la croiz que requierent paumier se vos me fetes un petit corrocier n en avroiz point par Deu le droiturier Moi en donez sire ce dit Renier tres ersoir n orent mi mulet que mengier Si m eist Deus molt i poez pechier ne nos volez vaeir ne acointier nostre servise s il vos eust mestier poisiez prendre de gre et volentiers D autre pais les vit li pautonniers ne les prisa la monte d un denier molt fierement les prist a ledangier Estez en sus fill a putain bergier nez d autre terre bedoin losangier Ni a ribaut ne fol garcon trotier qui ne dement avaine a un somier Ja mar ait il ne roncin ne destrier si prant aveinne qui la li veut baillier car il se veut a son oste paier avoir biau lit et biau leu au fouier Le baston hauce si vait ferir Renier et en apres le prist a ledoier Fill a putain mauves garcon corsier Mar i venites querre avaine a guernier voire a vostre oes par le cors seint Richier Ce dit Renier ou il n ot c airier Fill a putein traitre losengier mieuz veil morir que nel conparoiz chier Il passe avant a guise d omme fier si l a sessi tout le fist enbronchier hauca le pong el col li vait paier que en la gueule li a fet l os brisier encontre terre le fist jus trebuchier Par un des piez le comence a hercier puis le gita d une part del grenier Va gloz dit il Deus te doint enconbrier Ne ses l avaine ne prendre ne baillier Lor prant la mine si comence a huchier Or viengne avant qui d aveinne a mestier qui veut .I. res si en prengne .I. setier Deus me confonde se ja en preng denier Qui qu en ait pou Girart s en fist poier ore en avront li mulet a mengier a son ostel en porta .I. setier En fuie tornent sergent et escuier mau soit de cil qui l osast aprimier ne de l aveine un tout seul grein baillier En la vile ot teus .XL. destriers qui la nuit n orent grein d aveinne a mengier Un mes s en torne seu vet au roi noncier En non Deu sire ore avons enconbrier le senechal ont mort li escuier Il gist leanz de travers le grenier je cuit le col li ont fait pecoier par mi la bouche li vi le sanc raier S or ne t an venges ja ne t avrons mes chier Ot le li rois n ot en lui c airier il en apele Gilemer et Gautier l un fu prevoz et li autres voier Fetes les portes fermer et verroillier et le matin toz les ostieus cerchier que il n i ait nul si riche escuier s il a ce fet qu il ne le conpert chier Et si li fetes les oreilles tranchier les euz crever et le nes acorcier une autre foiz qu il ne m ost corrocier moi ne mes homes adeser ne touchier Et cil responent Bien fait a ostroier A son ostel s en retorna Renier li mulet orent a plante a mengier La nuit se font li denzel aessier figues et dates ont assez au couchier si demoinent grant joie Seignor barons assez l avez oi puis c ome est morz et alez a sa fin c est une chose molt tost mise en obli Au matinet qant jorz fu esclarci se sont leve li damoisel hardi Qant il se sont et chaucie et vesti Renier apele son frere Girardin Frere fet il por amor Deu merci alons a cort trop avons este ci s orrons noveles q an i fet ne ne dit En non Deu sire Girart li respondi je me dout molt del gloton malei qui ersoir fu au grenier si laidi Se il est morz nos somes mal bailli car de la boche le sanc raier li vi le col brisie jesoit tot estordi Je me criem molt que n en soions honni q an cest pais n avomes nul ami Ne te chaut frere Renier li respondi trop a li rois teus garcons entor li S il an pert .I. bien le sachiez de fi qu il an vendra .XIIII. Li damoisel firent molt a loer a cort en vont sanz plus de demorer Et l enperere qant il vit ajorner en sa chapele est entrez por orer messe li chante son chapelain Guimer et ovec lui meint baron et meint per qui sont alez por la messe escouter Et par defors en voient .c. ester qui atandoient por eus au roi clamer mes anz ne puent ne venir ne aler Les barons prist Renier a esgarder que l en ne veut leanz lessier entrer Renier vait si del pie a l uis hurter que tot le fist entreovrir et croller L uisier le voit n ot en lui c airer le baston hauce si vait Renier fraper desor le chief que boce i fist lever Voit le Renier si prant a forsener Et li huisiers le prist a ranponer Fill a putain en sus devez ester Nez d autre terre com l osates panser qui si venites a l uis lou roi hurter Ne poez vos vaoir et esgarder cez hauz barons qui tant font a loer qui sont vestu de fres hermine cler de ver de gris de cendaus d outremer qui anz ne puent ne venir ne aler Et vos coment cuidiez dedanz entrer a voz coteles grises Ce dit Renier le damoisel de pris Fill a putain mauves garcons et bris Deus te maudie li rois de Paradis Li cuers n est pas ne el vair ne el gris einz est el ventre la ou Deus l a assis Teus est molt riches qui est de cuer failliz et tieus est povres qui est fiers et hardiz vasaus de cors et frans hom et gentis Par cel apostre qui a Rome est requis mieuz en veil estre detranchiez et ocis que nel conperes foi que doi seint Denis Renier fu fiers et bons vasaus de pris tret soi arrieres come mautalantis fiert l uis del pie li damoisiaus hardiz brise en les es en .II. moitiez l a mis et le portier consut en mi le vis si durement l a hurte et maumis q an .II. les euz li sont vole del vis Par desoz l uis l a contre terre mis et par desus en paserent teus dis qui ne demendent se il est morz ou vis De la chapele ist Charles au fier vis et ot la noise dont granz est li estris Dit l enperere Par le cors seint Denis qui s est ceanz de tel fet entremis mon huis brisie et mon portier ocis En non Deu sire dit Jeufroi de Paris cil dui vassal a cez chapes de gris qui ca dedanz se sont par force mis Prenez les moi dit Charles au fier vis s an ferons la jotisse Molt fu dolanz Charlemene au vis fier a haute voiz comenca a huchier Qui a ce fet por le cors seint Richier Qui ossa ci tele ovre comencier brisier mon huis et tuer mon portier En non Deu sire ce fis ge dit Renier g i oi bon droit a celer nel vos quier Ja Deus n ait l ame del felon pautonier car d un baston me feri tout premier Tant se fesoit et orgueilleus et fier qu il ne prisoit ne Martin ne Gautier por son bliaut qu il ot fet entaillier Mes Deu merci je m en soi bien venchier q ancontre terre l e fet mort trebuchier Droiz enperere par Deu le droiturier en totes corz te puis bien temongnier d anperaor de roi ou de princier qant en i voit .I. preudome estraier tout jentement le doit l en aresnier einz q an le doie ne ferir ne touchier Car tieus est povres qui a coraje fier et tieus est riches qui a le cuer lanier Droiz enperere ja nel vos quier noier bien fust reson par le cors seint Richier q an me lesast ma parole noncier si seust l an qui ge sui et que quier eincois que nus me deust ja touchier Dient Francois Voir dist par seint Richier pardonez lui biau sire Nostre enperere refraint son mautalant qant ot Renier parler si sagement Il voit qu il sont molt bel et avenant Dont estes vos fet il seignor enfant De quel lingnaje Nel me celez noiant Et dit Renier Jeu dirai voirement car molt est fous qui a riche home ment fiz sui Garin de Monglane au vaillant d une cite de Gascongne la grant tout jorz a guerre vers sarrazine gent Or l a assis Sinagon l amirant en sa cite derrieres et devant Or venons ci por aprendre romant a vostre cort s il vos vient a talant vos servirons volentiers bonement un an ou .II. ferons vostre comant et s il vos plest .III. ou .IIII. en avant por conquester ennor et garnement Dit l enperere Vos dites bien enfant foi que doi Deu vos estes de grant gent de grant barnage s avez meint bon parant mes ne vos veil retenir longuement a ceste foiz nul talant ne m en prant Chascun de vos donre .I. garnement et .xxx. livres entre or fin et argent en voz pais en iroiz lieement de moi diroiz ennor et biau senblant Renier l antant a pou d ire ne fant Girart apele par molt fier mautalant Va met ma sele sor mon mulet enblant et sor le tien biau frere isnelement N ai song d avoir ne sui pas marcheant Se j en avoie tout plain ce pales grant foi que doi Deu le Pere tout puisant n en retandroie la monte d un besant trestot l avroient chevalier et sergent provoire et moine et autre povre gent Einz mes lingnaje n ala avoir querant n en i a nul borjois ne marcheant ne ja ne l iere en trestot mon vivent Je voi ce roi qui nos vait refusant del biau servise que li vois prometant autre seigneur nos covient querre avant qui plus nos face ennor et biau senblant Entr eus en vont nostre Francois parlant Damedeu Pere par ton disne comant com sont cortois et sage cist enfant S an ceste cort demorent longuement tot paseront Huidelon le Normant Gaidon le viel et Droon de Vincent Droiz enpereres dit Gaudin l Alement retenez les molt sont preu et vaillant ce ert ennor et barnaje molt grant De longues terres sont venu li enfant et lor servise vos offrent bonement votre plesir feront et vo comant Et dit li rois Or viengnent donc avant si deviegnent mi home Li damoisel firent molt a proisier devant lou roi se vont agenoillier font li homage voiant meint chevalier et l anperere les a fet redrecier Ses chevaliers en prist a aresnier Seignor ce dit l enperere au vis fier premierement adouberai Renier et de Girart ferai mon escuier armes avra s il me sert volontiers Dient Francois Bien fet a ostroier Chemise et braies aporte en a Renier chauces de pailes solers de Monpellier el dos li vestent .I. fres hermine chier et un bliaut q an ot fet entaillier un mentel riche qui valoit meint denier ont afuble au nobile guerrier Por messe oir le moinent au mostier car c est coutume a novel chevalier eincois qu il doie ses garnemenz baillier doit oir messe et Damedeu proier que il li doint ennor et souhaucier le droit de terre tenir et jostisier Apres la messe en ont mene Renier por adouber el grant pales plenier Ses garnemenz li font apareillier chauces de fer qui molt font a proisier el dos li vestent .I. blanc hauberc doblier el chief li lacent .I. vert elme a or mier li rois li ceint .I. riche branc d acier El col le fiert l enperere au vis fier puis li a dit Soies preudom Renier Grant merciz sire ce dit le franc guerrier si serai ge se Deus me veut aidier En li amoine .I. auferrant corsier et il i monte par son senestre estrier au col li pandent .I. escu de cartier et en son pong .I. roit espie d acier Fist .I. esles sor l auferrant corsier Qui li veist des esperons brochier et par la cort ganchir et eslessier et son escu lever et abessier et son espie brandir et paumoier molt le deust aloser et proisier Forment le loent li preudom et ont chier mes corrocie en sont li losangier Dit l un a l autre Ci a bon chevalier Droiz enperere dit Renart de Pevier un mau traitre qui Deu doint encombrier or voi tel chose que vos conparroiz chier Trop fetes ja ces danziaus sorhaucier encore .I. jor vos feront il irier Garin lor pere qui les fist envoier n ot a repos onques .I. seul mengier Pepin vo pere quant il prist sa moillier Berte la franche qui tant fist a proisier lors ert Garin bacheler prinsautier Jeu vi a l ague par mi la mer nagier molt savoit bien pelerins espier et desrober et toz nuz despoillier prestres et moines iglises et mostiers Por ce l en fist a grant honte chacier et fors de France foir et essillier Juqu en Gascongne ne s osa atargier la li dona li rois Yon moillier et de sa terre li dona .I. cartier Puis fu tel eure qu il s en repanti chier Icil Garins dont vos moez plaidier ocist mon oncle a l espee d acier Par cel apostre que requierent paumier quant ne me puis de lor pere venchier li fil por li le conparront molt chier Droiz enpereres a celer nel vos quier unques mon fil ne donas .I. denier n a moi meismes palefroi ne destrier qui chascun jor te servons sanz dengier Deus le maudie le Pere droiturier Ja ne morra envie Renier entant le traitor Renart tel duel en ot a pou d ire ne part Par malautalant a regarde Girart Droiz enpereres qui est ce grant viellart qui de la pance resenble Lonbart Tant a mengi des compotes au lart ausin est gros come un roncin liart Mien escient qu il est del lin Bernart qui d Autemure toli Aimon sa part traitres est bien pert a son regart Droiz enpereres fetes moi droit esgart se il vos plest par le cors seint Meart conbatrai moi a lui que molt m est tart a ceste espee qui les granz cous depart Proverai bien vers le felon gangnart que mon pere est franz dus de bone part et se n en faz recreant le viellart fetes m ardoir ou pandre a une hart Ne vos chaut frere ce li a dit Girart foi que ge doi au cors seint Liennart se ne cuidoie que au roi en pesast de ses grenons avroie ja ma part Que qu il dit ce par la barbe l aart de quanqu il tint des peus a fet essart Forment rechine le traitor viellart et Francois rient qui s en pranent regart car molt aoient le pautonier Renart maudite soit s orine Sire viellart dit Renier le cortois ne remeint pas en vostre grant bofois que par corroz de la cort ne m en vois si n en portasse ne armes ne conrois Mes par la croiz que requierent Francois je vos di bien tel loier en avroiz que au partir nul gre ne m en savroiz Atant le lessent ester a cele foiz Les damoisiaus a retenuz li rois par Renier vont et les torz et les droiz les jugemenz qant vient au grant destroiz Il sert lou roi com chevaliers adroiz si li a tout aquite Vermendois de robeors et de larrons revois qui tout metoient le pais en defois Qant les prenoit li chevaliers cortois ja nes gardast ne catre jors ne trois Renier lor fist .III. aguez une foiz a un poncel en prist sesante trois toz les pandi n i ot autre defoi ce fu droite jotisse Renier fu fiers et chevaliers gentis au roi aquite ses mortieus ennemis De la contree mon seigneur seint Denis ne pooit on aler juqu a Sanliz que il ne fust detranchiez et ocis En la Sorvale avoit larrons norriz el jarriois qui est desoz Sanliz n i pasoit hom qui de mere fust vis que meintenant ne fust ou mort o pris Clamor en vint a Charlon au fier vis Renier l oi li chevaliers hardiz .c. chevaliers toz armez avoit pris toz enbuchier les fist el plesseiz s i fist passer pelerins juqu a .X. c atapiner ot fet a Seint Denis Par mi le bois s en vont toz ademis lor vestemenz desor lor bordon mis chantant s en vont par mi li pleseiz et li larron les ont tres bien oiz De lor aguet sont au devant sailliz li pelerin s escrient a haut criz Es lor Renier fier et mautalantis et avec lui .c. chevaliers de pris les larrons ont fierement envaiz La veist en .I. molt granz fereiz tant mal larron detranchie et ocis Mal soit d icel qui en echapast vis toz les pandirent n i ot plus terme quis de brenge en brenche as arbres les ont mis Einsi Renier aquita le pais Molt en fu liez Charles o le fier vis tant fu Renier ses druz et ses amis que il le fist sor toz ceus del pais conseillier de sa chanbre A iceu terme que vos m oez conter tint Charles cort ainz puis ne tint sa per A Pantecoste que l en doit celebrer ot fet li rois grant barnaje mender Ce jor se fist li rois molt ennorer Girart comende qu i le serve au disner il et Renier qui molt fist a loer et il si firent nel vodrent refuser L un fet les mes devant lui aporter et l autre tint la grant cope d or cler plaines d espices qu il avoit fet coler Es vos .I. mes sanz plus de demorer toz les degrez vet el pales monter molt hautement les prant a saluer Cil Damedeu qui tot a a sauver gart Charlemene qui tant fait a douter et son barnaje que lez lui voi ester Seignor baron car me faites mostrer Girart l anfant de Gascongne le ber lui et Renier dont j ai oi conter que en sa cort a fet Charle adouber Tant les ai quis et mein et avesprer que tout m ont fet traveillier et lasser Voiz nos ici dit Renier au vis cler amis biau frere que veus tu demender Ses tu noveles de noz amis conter Ouil biau sire ce sachiez sans douter Mille est en Puille ja nel vos quier celer prise a moillier qui molt fait a loer .II. fiz en a qui molt font a amer plus biaus ne genz ne porroit en trover Et Hernaut est a Biaulande sor mer moillier li ont fet el pais doner par lui a toute la terre a governer Un fil en a nus hon ne vit son per Aimeriet font l anfant apeler se il vit longues bien se fera douter et son lingnaje essaucier et monter Et vos de coi vos repoez venter Avez enneurs ne terres a garder que j en repuisse a voz freres conter Amis biau frere de folie oi parler ce dit Renier ne fet a demender Bien lor puez dire ja nel te quier celer que nos servons Charlemene le ber Girart mon frere fet le mengier haster en la cuisine ne l en poons giter les escueles fet torchier et laver je faz les napes estuier et garder et les hennas que nus nes puist enbler Li rois nos fet tout autresin mener come roncin q an meinne pasturer nos fesons son servise Renier parole a la chiere hardie voit le mesaje fierement li escrie Amis biau frere se Deus te beneie diz me tu voir nel me celer tu mie que Mile est dus de Puille la garnie Oil biau sire par Deu le fiz Marie prise a moillier molt gente et eschevie .II. fiz en a de molt grant baronnie Et vos biau sire avez vos seignorie terre ne marche tor ne cite antie Et dit Renier Tu demendes sotie Girart mes freres se Deus me beneie ne set encore que est chevalerie Onques tel qeu ne veis en ta vie s or le vaoies nel connoistroies mie Je gart les napes moie en est la baillie Foi que doi Deu le fiz seinte Marie Charles li rois de France la garnie s il ne me done ou terre ou seignorie nel servirai james jor de ma vie einz irai seignor querre Sor la table est l anperere acoutez ou voit ses homes ses en a apelez Seignor fet il avez vos escoute le fier contraire que Renier a conte a ce mesaje que vos ici veez Bien le me dist l arcevesque Guirre li dus Renarz qui molt est alosez cil de Peviers qui tant est adurez ne lor savroie fere si grant bontez c au derrien en fuse ja loez Oi l ai dire et si est veritez puis que lierre est de forches rachetez ja puis ses sires nen iert de lui amez Por eus le di que j avoie alevez Or si m est vis que je en ai mau grez trop sont de pute orine Qant Renier a la parole escoutee de mautalant a la color muee c en haut parole s a la chiere levee Dit Renier Sire quele l avez trovee Quele cite nos avez or donee Ne quele terre quel fie ne quel contree Vos m adoubates c est verite provee mes je nen ai eu autre sodee de vostre terre que vos ai aquitee tout Vermendois cele terre loee qui de larrons estoit sovant robee Mes j en ai bien la terre delivree tout les pandi onques n en oi sodee Mes par l apostre q an quiert en Noiron pree se hui cest jor ne m est terre donee tote m amor est de vos desevree Demein irai sanz nule demoree a Garin de Monglane Li enpereres entandi la reson de mautalant a fronci le grenon Renier apele par contralioison Vassal fet il tu devenis mes hom Et en bataille portas mon confanon si conqueis meint denier meint mengon le grant avoir eus en ton bandon Tu te vantas par devant meint baron que tu l avroies ou ge vosise ou non et si tandroies le pais environ toi serviroient Francois et Borgoignon et Alement et Flamenc et Frison Ce deis tu en guise de felon del droit a fere orandroit te semon ja feras droit ou tu veilles ou non Merci bons rois dist Girart li frans hom se il vos plest orendroit en iron nu piez en langes en nos meins .I. baston estrumelez le pais vuideron Et dit Renier Par mon chief non feron Tu as parle a loi de fol garcon Lesse li dire son talant et son bon puis qu an sa cort de pledier nos semont Deus me confonde se nos ne l atandon pour le jugement dire Nostre enperere ot le cuer irascu por ce que cil li ot si respondu son fier barnaje apele qui la fu Seignor baron avez vos entendu de ces glotons qui estoient mi dru Mauvesement le m avront hui rendu tel chose ont dite dont molt m ont irascu Par cel apostre por qui Deu fet vertu se il sont ci juqu a trois jorz veu jes ferai pandre a un arbre ramu Dit Renier Sire quel l avez esmeu Menbre vos i de .I. jor qui ja fu que ge vos vi del cheval abatu je vos randi mon auferrant crenu et ge remes a pie tout esperdu Puis fis ge tant a mon branc esmolu que j oi cheval merci au roi Jhesu Par ce Seignor qui tot jorz est et fu se j ai por tant mon servise perdu teus parlera qui encor se tient mu einz que partons de France Droiz enpereres ce dit Do li barbez cil dui garcon ou vos ont il trove Si fierement vos ont hui renpone et dit tel chose dont je sui molt ire Foi que doi vos se mon conseil creez a chascun d eus .XL. sols donrez et .II. roncins toz clos et desferrez des .II. glotons vostre cort delivrez Renier l antant a pou qu il n est desvez il li a dit Fel viellart rasotez si mal vos menbre quant vos tres d un fossez ou .II. garcons vos avoient bote et toz li mendres vos avoit si frape d un grant baston qui fu gros et carrez que el fosse cheites enverse James nul jor n en fussiez releve qant vos en tres par ces grenons mellez forment m en poise qant ne m en savez gre Par cel apostre q an quiert en Noiron pre n iert por lou roi et por l autre barne ja vos seroit cist grenons si tirez c onques par home ne vos fu si plume Qanqu il dit ce si est avant passez un cop li done del pong qu i ot carre que en la gueule li a .v. denz froez contre terre est li hateriaus versez Or voit Renier c a la cort est mellez Renart esgarde qui fu de Peviers nez qui l ot laidi qant il fu adoubez molt fu le fel megres et descharnez la barbe ot longue et les grenons mellez Renier li preuz est cele part alez en la grant barbe li a ses poinz mellez .XIIII. pas l a apres lui mene corant trotant trestot estre son gre l un d eus a l autre est ensanble hurte Il vint au feu si l a dedanz boute art li la barbe le grenon est brulle ja fust tot ars et a sa fin ale qant l enperere est cele part torne et li barnajes qui la fu asenblez si desfont la mellee Merci frans rois dit Girart li gentis por amor de Deu qui en la croiz fu mis Renier mon frere si est mautalantis mes chevaliers est il fiers et hardiz il n a meillor en .LX. pais Por amor Deu qui pardon fist Longis retenez le enpereres gentis Vostre hon serai rachetez et conquis sevirai vos volentiers a tot dis ne vos lerai tant com ge soie vis Devant ses piez s est a genoillons mis Renier l endrece par le pelicon gris hauce la paume seu fiert en mi le vis Fuiz gloz lechierres dit Renier li hardiz Par cel apostre qu est a Rome requis mieuz vodroie estre detranchiez et ocis que fusse sers achatez ne conquis nostre lingnaje en seroit vis tot dis Mes par la foi que doi toz mes amis se Charlemenes lou roi de Seint Denis ne me done hui ou cite ou pais n iere a lui mes tant com ge soie vis einz irai a mon frere Droiz enpereres dit Henri d Orlenois un chevalier qui fu preuz et cortois car vos remenbre de ce que fist Jeufrois li Alemenz qui menoit tel bofois qui se vanta voiant toz les Francois que n aviez vaillisant .I. mensois en Parisis ne en tout Serlantois Onques n eutes chevalier si cortois en vostre cort ne Flamenc ne Tiois qui envers lui en preist ses conrois fors seul Renier li chevaliers adroiz qui s en arma contre lui demenois et lessa corre le destrier espanois si le feri de l espie viennois nel garanti ne armes ne hernois mort l abati del bon destrier norrois Et ceste ennor vos valut Orlenois demi le Perche et trestot Loonois Donez lui terre pechie n en achatoiz se il vos plest donez lui Genevois Morz est li dus bien a passe .II. mois n i a remes nul oir biau sire rois fors une fille qui le cuer a cortois Renier l avra li chevaliers adroiz sire ert de la terre Nostre enperere fist forment a proisier un petitet se prist a souploier qant ill oi a celui reprochier les granz bontez que li ot fet Renier Li rois apele son grant barnaje fier Entandez moi nobile chevalier Francois et Hongre Normant et Berruier je sai de voir ce ne puis ge noier que Renier m a eu sovant mestier mes son servise m a hui vendu molt chier et dit tel chose dont m a fet corrociez Mes or me veil envers lui apaier Jenvres li dong seu volez ostroier C est biens a fere dient li chevalier A voiz escrient Alement et Baivier Renier biau sire car l en va mercier juqu a son pie t en va agenoillier Granz est li dons si fet molt a prisier Aiez vos pes seignor ce dit Renier de trop crier me resenble dengier ou itel gent qui n aient que mengier Grant merciz sire ce li a dit Renier mes gardez bien itant vos veil proier ne me faciez de mon don foloier que par ce Deu qui tout a a jugier tost en avriez honte Renier estut devant lou roi Charlon li enpereres li ostroia le don de Genevois et del resne environ A voiz escrient Alement et Frison Renier biau sire por Deu et por son non car en alez au piez le roi Charlon Aiez vos pes dit Renier li frans hom de trop crier me resenblez garcon li vostres plez si resanble tancon Grant merciz sire dit Renier a Charlon mes gardez bien que ne faille a mon don si me chargiez chevalier ou baron qui avec moi vendront en ce roion si porteront voz escriz a bandon que ne faillons a ce que requeron Et dit li rois A Deu beneicon molt bon conduit au partir vos donron un arcevesque Renier de Besancon Hoel de Nantes et Geufroi le baron celui d Anjo o le flori grenon et teus .VII. autres dont chascun ert prodon Va s en Renier sanz plus d arestoison son frere lesse avec lou roi Charlon puis chevalchierent a coite d esperon De lor jornees ne vos faz lonc sermon tant ot erre a force et a bandon c a Genvres vindrent li nobile baron La prist la dame Renier li gentis hom et espousa sanz plus d arestoison ses noces fist sus el mestre donjon De ceste dame que nos ici dison fu Olivier a la clere facon il et Rollant furent puis conpangnon que puis trai le felon Ganelon en la terre d Espangne De ceste dame que vos m oez conter fu Olivier li gentis et li ber et la bele Aude o le viaire cler que Rollant dut a moillier espouser mes Deu nel vost sofrir ne andurer Or fu Renier dus de Genvres sor mer des or comence ses guerres a mener murs fet drecier et fossez relever et fors chastiaus et fortes tors fermer En tot li resne n ot haut baron ne per qu il ne coviengne par force a lui aler homage fere et feute jurer et quel refusse seu fet desheriter En France fu Charlemenes le ber o lui Girart qui molt fist a loer Formant l amerent li baron et li per que l anperere en vost chacier aler Ses veneors a fet o lui mener chiens et brachez a fet desacopler En la forest ou alerent berser ont le jor pris .II. cers et un sengler .IIII. somiers en orent fet trouser Endroit midi qant s en durent aler lors comenca .I. ore a lever a espartir a plovoir a toner Le roi covint soz .I. chesne esconser Es vos .I. mes sanz point de demorer vint de Borgongne noveles aporter Ou voit le roi seu prist a saluer Deus vos gart rois qui le mont doit sauver Unes noveles vos vien ge ci conter morz est li dus de Borgongne le ber et la duchoisse vodroit a vos parler metez le terme ou vos porroit trover Et dit li rois Ja l orroiz deviser dites la dame mie ne li celer c a la grant feste seint Jehen sanz douter tout droit a Sanz la me porra trover Sire fet il bien li savrai conter Congie demende prist s en a retorner Et l enperere comenca a panser por le franc duc que tant soloit amer covint ilec Charlemene plorer A chief de piece prist soi a conforter car en duel fere ne puet riens recovrer Devant lui garde si vit Girart ester par la saiete dont il devoit berser li vet la dame et la terre doner puis fu tele eure que chier l en dut peser A Loon vet Charlemene le ber la fist Girart richement conreer armes li fist l enperere doner si l adouba sanz plus de demorer Por seue amor en fist .XX. adober chevaus et armes lor a fet presanter les plus tres riches que l en pot lors trover Lors fist li rois Girart molt ennorer mes cele ennor li dut a mal torner qu il li toli la dame A cele feste que je vos dis avant de seint Jehan que l en fet joie grant a Senz ala l enperere puissant ou la duchoise de Borgongne l atant dui arcevesque la vindrent adestrant Li rois la voit si li dist hautement Franche duchoisse bien soiez vos venant Deus vos gart sire le Pere tot poissant Dame fet il domaje avez molt grant el gentil duc que vos amiez tant Sire fet ele ce poisse moi formant mes en duel fere n a nul recovrement Se il vos plest autre mari demant car coutume est des le tans Moisant qant li uns muert li autres vient avant Apres le mort m en covient .I. vivant car mestier a ma terre d aide grant ou se ce non trop i serai perdant Dame fait il bien le lo et creant J ai un danzel molt i a bel enfant Girart a non cortois et avenant fier et hardi et de grant escient fiz est Garin de Monglane au vaillant d une cite de Gascongne la grant Sire fet ele ce soit au Dieu comant j en veil errer del tot a vo comant car ge sui vostre lige Nostre enperere a la dame esgardee molt la vit bele et gente et acesmee les euz ot verz la face coloree et fu plus blenche que n est nois sor gelee Deus dist li rois seint Virge ennoree je ne truis fame en tote ma contree une ne autre qui me plesse n agree et ceste est tant et bele et acesmee c onques plus bele ne pot estre trovee Par ce Seignor qui fist ciel et rousee ceste avrai ge a moillier espousee Girart avra fame en autre contree Se il le dist ce fu verte provee desor Girart est la perte tornee Puis en fu fete grant guerre et grant mellee dont fu meinte ame fors de cors desevree Charles li rois n i fait plus demoree a conseil a la duchoise apelee Dame fet il n i a mestier celee se il vos plest et il bien vos agree je vos prendroie a moillier espousee La dame l ot tote en fu trepansee Sire fet ele or m avez vos gabee ne doit nus rois c est verite provee la vavasore prendre de sa contree Fille de roi vos doit estre donee ou autre dame de molt grant renommee Girart me done a la chiere menbree a cui ge fui premiere presantee se geu refus bien doi estre blasmee Biau sire rois n i a mestier celee ja ne serai roine Dit l enperere De folie oi parler Dame duchoisse trop fetes a blamer n ietes pas sage ja nel vos quier celer Lequel vaut mieuz abessier ou monter et son lingnage essaucier et lever Sire fait ele ne me devez gaber vos vos porroiz hautement marier en fille a roi ou a duc ou a per et endroit moi me restuet a garder Girart me done que j ai oi loer le biau le jeunne le cortois bacheler se le me dones ne le quier refusser seu refusoie molt feroie a blamer Mes s il vos plest congie vos veil rover si en irai a mes homes parler de ce que dites veil conseil demender se prendrai vos ou dant Girart le ber Dame fet il bien le veil creanter en conseil querre puet en grant bien trover A .IIII. contes qui la vont adestrer s an fet la dame a son ostel mener Girart menda c a lui venist parler et il si fist sanz plus de demorer Ill ot vestu .I. fres hermine cler et par desus .I. paile d outremer sor .I. mulet qu il ot fet enseler monta Girart qui molt fist a loer sele ot si riche com l en pooit trover li frains valoit .c. livres d argent cler Par mi les rues s en comence a errer Li uns a l autre l avoit pris a mostrer Vez la Girart le vaillant bacheler qui preudom sert bien en doit amender Juqu a l ostel ne se vost arester a pie descent les degrez vait monter et la duchoise li vait a l ancontrer molt gentement le prist a saluer Bien vegniez vos gentis nobles et ber Si m eist Deus je vos ai fet mender venuz i estes si vos en doi amer Le mien corage ne vos doi pas celer en ce pales alai au roi parler si li oi tel chose demender que ne vos pas ostroier ne graer Sire Girart ja nel vos quier celer prenez me a fame seu volez creanter que ge nai cure de lonc plet demener onques nul plet ne vi si definer q an ne peust de plusors parz blamer Girart respont qui ne s i ot garder Dame fet il merveilles oi conter Or puis bien dire et por voir afier que or comence le siecle a redoter puis que les dames vont mari demender Foi que doi Deu qui tout a a sauver eincois verrons toz les .II. an passer que l en me voie vos ne autre espouser Or querez autre se le poez trover ja moi n avroiz ce vos di sanz douter La dame l ot le sans cuide desver einz mes n ot si grant honte Vait s en Girart que plus n i demora onques congie ne prist ne demenda Molt corrociee la duchesse lessa onques la nuit ne but ne ne menga n onques la nuit ne jut ne ne coucha juqu au demein que li jorz esclera que la duchoisse se vesti et para A seint Estienne au mosier en ala devant le mestre autel s agenoilla Damedeu proie qui le mont estora Girart li doint qui ier la refussa mieuz l ameroit que le roi ne fera Quant ore ot a son ostel ala par .I. sergent Girart encor menda Il fu tant fiers que venir n i dengna mes .XV. jorz de respit demenda La dame l ot a pou ne forsena d unes et d autres assez se porpansa s eu n a le duc le roi ce dit avra L enperaor tout meintenant menda et il i vint que pas nel refussa Qant el le vit molt biau le salua Sire fet ele nel vos celerai ja bon gre vos sai que estes venuz ca et molt en ai grant joie Charles li rois de France la loee en est venuz en la sale pavee ou la duchoisse de Borgongne a trovee ja sont endui a mesniee privee Molt gentement l a li rois saluee et ele lui que molt estoit senee Sire fet ele ore oiez ma pansee ne vos doit estre ma volente celee Veritee est qu ier m aviez mendee mes ne m estoie pas encor apansee de tele chose dont puis sui amenbree Conseil ai pris c est verite provee de ce dont vos m avez aresonnee bien le me loent ma mesniee privee et ge meismes m i sui bien acordee mieuz veu ge estre roine coronee seul .XV. jorz de France la loee que .XIIII. anz duchoisse clamee Qant li rois l ot merveilles li agree Sa gent apele c o lui ot amenee Seignor fet il n i a mestier celee vez ci la dame que l en m a tant loee et ge veil a moillier espousee Et dit Girart Vos la m avez donee tote sa terre et tote sa contree Cele respont qui bien fu enparlee Par cele foi que je ai Deu portee mieuz vodroie estre a chevaus trainee noiee en eve ou en feu enbrasee de vostre cors fusse james privee A icel jor c est verite provee que Charlemenes m ot a vos presantee l otroie ge vos m avez refusee encore en ai grant honte Nostre enperere fist forment a proisier par le pong tint la cortoisse moillier ses chevaliers prist a aresnier Vez ci la dame o le viaire fier ceste prendrai seu volez ostroier Et dit Girart Sire rois droiturier grant tort me faites a celer nel vos quier car ceste dame me donates l autrier tote sa terre et s annor a baillier mon seigneur estes ne vos puis jostissier Onques li rois nel vost por ce lessier La dame fist mener a un mostier la li espouse l arcevesque Renier les noces firent sus el pales plenier Grant joie firent trestot ce jor entier des riches mes ne vos quier ja pledier tant en i ot que l m en nes set proisier Le soir au viespre qant li rois dut couchier .II. arcevesques i ot au prinsengnier le roi prierent i baron chevalier Droiz enperere por Deu le droiturier molt est iriez Girart le franc guerrier Donez lui terre et ennor a baillier males noveles n en puist nus hom noncier c aiez mespris vers vostre chevalier Et dit li rois Bien le veil ostroier por voz amors que m en volez proier et por Girart que je ai forment chier li dong Vienne et l annor a baillier haut sont li mur et li fosse plenier la cite riche qui molt fet a proisier assez avra a boivre et a mengier ses ennemis porra bien guerroier mes moi aist se ge en ai mestier A voiz escrient Alement et Baivier Va l an au pie Girart franc chevalier granz est li dons bien l an doiz mercier Et dit Girart En non Deu volentiers Por l anperere qui ert alez couchier ont fet le feu en la chanbre abessier Devant lou roi vait Girart le guerrier si s agenoille por sa genbe enbracier Mes la duchoisse par son outrecuidier tandi son pie si li a fet bessier si com deables la voloit engingnier tout nu a nu ce fu grant enconbrier Se le seust le gentil chevalie einz la ferist d un grant coutel d acier qu il i dengnast de sa bouche touchier Deus Puis en vint tel mortel enconbrier dont il fu mort meint gentil chevalier Ele en dut estre ocise Ore ot Vienne la fort cite loee li dus Girart a la chiere menbree li rois li ot ostroiee et donee Mes ne sot pas la verite provee li dus Girart com la chose est alee de la duchoisse fole et desmesuree qui fist tel honte en la chanbre pavee Mes molt fu puis chierement conparee meinte ame en fu fors de cors desevree ele meismes en dut estre afolee Et qant li rois ot la dame espousee par tote France fu roine clamee Au matinet qant vint a l anjornee li dus Girart n i fist plus demoree congie a pris qant messe ot escoutee Riche mesniee li a li rois livree qu il an menra o lui en la contree et grant richece en a o lui portee q antor le roi de France ot conquestee Tant ont erre chascun jor ajornee c a Cligni vindrent encontre une avespree en l abaie qui fu riche estoree cele nuit se herbergent En l abaie sont la nuit ostele Conoissiez moi dit Girart a l abe Nanin dit l abes amis par verite ne vos vi en trestot mon ae Vos si feites dit Girart en non De par ci venimes bien a .XV. anz passez je et Renier mon frere l alose Lors nos feites biau sire grant bonte robes et dras dont avions laste nos i donates ne l ai pas oublie Or vos redong .X. muls par charite .C. mars d argent et .C. pailes roez dont vos seroiz servi et ennore L abe l antant si l en a mercie et tuit li moine l ont parfont encline Au mein s en part qant il fu ajorne droit vers Vienne se sont achemine Un mes s en torne s a tant esperonne que a Vienne est venuz la cite Par mi la vile l a noncie et conte c a seignor ont un chevalier menbre cui Charlemene a le pais done aillent encontre n i ait plus demore et facent joie a lor droit avoe Qant il l antandent n i ont plus areste encontre lui sont meintenant ale neis l evesque et li clerc ordene procession ont encontre mene si le recoivent par grant nobilite et a grant joie moinent en la cite A seint Morise li ont messe chante et li ont fet homage et feute cil del pais volentiers et de gre et haut et bas devienent si jure Et puis en sont a molt grant joie entre el palais de Vienne Or fu Girart a Vienne el donjon forment l amerent cil del resne environ Cel en meismes apres l Acension a une feste seint Jehen le baron prist li dus fame qui fu de grant renon Guiborc ot non seror lou roi Oton De cele dame que nos ici dison furent puis ne Sauvari et Buevon puis fu un jor que les mist en prison rois Achatanz dedanz sa region Un jor estoit Girart en son donjon sus au fenestres de molt riche facon et regarda le chemin vers Lion entre .II. tertres par mi .I. val parfont et voit venir .I. danzel a bandon ensenble o lui furent dui conpangnon Chascun chevauche .I. mulet arragon des seles furent tuit dore li arcon a flor a betes painture environ et de lor frains furent d or li bouton Il descendirent soz la tor au perron les mulez lessent ses comendent Guion portiers estoit dant Girart le baron Les degrez montent li denzel a bandon Aimeriez ot li uns d eus a non premiers entra sus el mestre donjon Voit le Girart tot li mua le front molt traoit a sa geste Aimeriez en monta le planchier et en entra el grant pales plenier desus son pong portoit .I. esprevier qui plus ert blans que n iert foille d aubier Li dus Girart fist forment a proisier qant vit venir Aimeriet le fier ill an apele ses barons chevaliers Seignor fet il or lessiez le noisier Ci voi venir .I. damoisel legier sovant regarde sor son pong l esprevier gardez n i ait sergent ne escuier qui ost avant le danzel aresnier car ge vodrai a lui parler premier Sire font il bien fet a ostroier Et li danziaus est montez le planchier a haute voiz comenca a huchier Cil Damedeu qui le mont doit jugier i saut et gart tot ce barnaje fier Et li quieus est dant Girart le guerier li gentis dus que j ai oi proisier Ne li dist mot sergent ne chevalier einz comencierent les chies a enbronchier Voit le Aimeri n ot en lui c airier par mautalant les prist a ledengier Fill a putain lecheor pautonier .C. daaz et qui vos dut enseignier qant por moi seul vos voi si esmaier Encore ai ge .XV. livres d or mier dont me ferai en ce borc herbergier assez avrai a boivre et a mengier maugre vos toz mauves garcon lanier La loi avez au felon losengier ja n avra joie s avra plain le frasier Girart l antant si s en rit volentiers Qui es tu frere dit Girart le guerrier cist riche home ont entendu a pledier d un grant afere que il doivent jugier molt lor est ore petit de ton dengier Di ta parole si te va herbergier et puis revien a la cort por mengier Se es juglerres si feras ton mestier et se tu veus vendre cel esprevier je t an ferai ja doner un denier Lors en apele son mestre despansier Sor cele perche me met cel esprevier qu il ne le set tenir ne baillier Aimeri l ot le sans cuide changier Fill a putain lecheor pautonier Onques mon pere dant Hernaut au vis fier ne servi home de si povre mestier Ja ne porrai dire ne ostroier qu il soit mes oncles ainz m en irai arrier a Hernaut de Biaulande Qant ore entant Girart le danzeillon qu il est ses nies si joianz ne fu hom forment l atisse por oir sa reson que il le sant .I. petit a felon Di va fet il car nos viele un son Es tu jugleres Di nos une chancon je te donrai mon hermin pelicon n i avra nul dont tu n aies .I. don Aymeri l ot si dolant ne fu hom de mautalant est taint come charbon en haut parole par grant airoison Par cel apostre q an quiert an pre Noiron de tel servise com nos fere savons avroiz vos ja qui q an poist ne qui non Son esprevier a leve contremont fiert en Girart par mi la croiz del front qu il li sanglante la boche et le menton et par devant son hermin pelicon Girart s escrie Prenez moi ce gloton A unes forches orandroit le pandon Plus de .LX. l en corent environ Dit Aimeri Estez en sus felon Ja sui ge fiz dant Hernaut le baron cil de Biaulande o le flori grenon et nie Girart que de fi le set on j en ai les letres ci en un carregnon Girart l antant si li cort a bandon entre ses braz l a leve contremont .VIII. foiz li besse la bouche et le menton Aimeri nies cuer avez de baron bien traiez a ma geste Dist Aimeri li preuz et li senez Oncle Girart petit conseil avez qant envers moi vos estes tant celez Par cel apostre c on quiert en Norron pre se a cele eure que g estoie ore ire euse el pong un grant baston carre par mi le chief vos euse done que mort fussiez et tout escervele Ja cist domajes ne fust mes restore Nies fait Girart jeu fesoie de gre por essaier quieus ert vostre bonte or vos ain plus que home qui soit ne Que fait mes freres gardez n i ait cele li cuens Hernaut qui tant est alose En non Deu sire molt est preuz et senez sains et legiers riches et asazez fiers et hardiz et d amis annorez Ca ving vaoir coment vos contenez et voz richeces et voz nobilitez Nies dit Girart je vos en sai bon gre n en iroiz mes ainz seroiz adoubez de cleres armes de destriers sejornez Sire fait il si com vos comendez Ore a Girart molt de ses volentez des or comence a mostrer ses fiertez tors a drecier barbacanes fossez Premierement fu Noviz refermez et de Lions li aportent les cles desor le Rosne est une fort citez Lors cuida bien estre aseurez mes ainz que soit li demi anz passez avra li duc guerre et entente assez dont molt sera corrociez et irez Tout .I. iver fu Girart sejornez juque vers Pasques que recomence estez Aimeriet a son oncle apele Sire fet il envers moi entandez en France irai se vos le comendez a Charlemene qui tant est redoutez si le me dist mi peres li menbrez Nies dit Girart ce me vient molt a gre de bone cort poez estre amendez Ne a meillor converser ne poez c a la Charlon qui tant est renommez qui toz nos a essauciez et levez done les terres et les granz heritez Aimeriet a son oirre apreste Girart fu riches si li dona assez or et argent et deniers moneez .II. damoisiaus en a o lui menez par cui il ert serviz et ennorez Par mi Borgongne se sont achemine et par mi Brie li damoisel menbre a grant jornees ne sont pas arestez Marne trepasent a Seint Mor a Fossez de Paris voient les granz clochiers levez En la cite sont li danzel entre le roi demendent ne l ont mie trove A Seint Denis frans damoisiaus senez est l anperere dont vos nos demendez Qant il l antandent n i ot plus sejorne einz se remetent el grant chemin ferre Defors Landit ont Gautier encontre et Gilebert.II fors larrons provez meint home avoient ocis et desrobe Avec aus orent des conpangnons assez bien furent .X. ice jor asenble Les danziaus voient nes ont pas refusez outre s en passent qant les ont saluez Dit l un a l autre Nos somes fol prove cist enfant sont de molt fier parente Cil premerains qui si est acesmez est fiz a conte ou a prince chase qui en prison les avroit or gitez plus en avroit de deniers moneez ne porteroient .IIII. somiers trosez Les .X. larrons sont arrieres tornez par les frains ont les damoisiaus cobrez ja les eusent fors del chemin menez mes Aimeri ne fu pas effreez molt hautement les avoit escriez Est ce a certes seignor ou vos gabez Prenez del nostre se avoir en volez .C. sols ou plus de deniers moneez Dit li plus mestres De folie parlez en tel prison seroiz enprisonnez dont vos n istroiz devant .VII. mois pasez einz nos randroiz .II. boisiaus mesurez entre besanz et deniers moneez Dit Aimeri Certes trop demendez n avons pas ore tant deniers aprestez Mes par l apostre q an quiert en Noiron prez s a .X. larrons somes ci arestez bien nos doit estre en toz leus reprovez Que que li lerres avoit ainsi parle un riche branc li pandoit au coste et Aymeris l a del fuerre gite fiert li lairon qui au frein l a tire de ci es danz l a fandu et cope Li autre sont tuit en fuie torne mes Aimeri les a de pres hastez et les danziaus qu il ot o lui menez mal des larrons qui en soit eschapez einz les ont toz ocis et demenbrez et puis s an sont en lor chemin entre A Seint Denis sont li danzel ale einz que li rois Charles eust disne en la vile ont les chevaus establez dedanz la cort le roi en sont entre des premiers mes ont encore trovez L eve demendent a saoir sont alez que nus nes a de riens aresonez Emeriet fu cortois et senez il prant des mes que il voit aprestez ses conpangnons en a done assez tant lor en done com il lor vient a gre Dient Francois coiement a cele Cist damoisaus est plains de grant fierte je cuit qu il soit de haut paraje ne Molt sera fiers se il vit par ae Qant ont mengie et beu a plante les napes traient chascun s en est leve Aimeriet ne s est pas areste devant lou roi en est tot droit ale Cil Damedeu qui en croiz fu penez gart Charlemene le fort roi coronne le meillor prince de la crestiente Amis fet il Deus te croisse bonte Dont viens Ou vas De quel terre es tu ne Come as tu non Garde ne soit cele Sire fait il Aimeri sui clamez fiz Hernaut de Biaulande Dit la roine Molt a ci bel enfant onques d Avergne n oisi ausin gent Mes tuit garcon lecheor soduiant sont en lor terre por voir le vos creant nes dant Girart de Vienne la grant ne pris je mie la monte d un besant Com as tu non Nel me celer noiant Aimeri dame dit l anfant meintenant Fiz sui Hernaut de Biaulande la grant et nies Girart au corage vaillant Por Deu vos pris n en mesdites noiant si m eist Deus j en seroie dolant Par mi la sale vint .I. moines errant et dist au roi Soiez liez et joiant li mal lairon qui mal fesoient tant sont tuit ocis la merci Deu le grant Hui les troverent cist troi danzel vaillant un en i ot onques ne vi plus gent celui resenble delez vos en estant Li rois l oi si li dist meintenant Se tu fus ce nel me celez noiant En non Deu sire je i fui voirement il m asaillirent por voir le vos creant si les ocis desor moi desfandant Et dit li rois Ge t en sui bon garant vers toz les homes de cest siecle vivant molt as fet grant barnaje Dit l enperere Franc chevalier de pris molt est cist enfes corageus et hardiz qant par son cors a .X. larrons ocis qui tant avoient fet mal en cest pais Diz me tu voir frans damoisiaus gentis qu ies fiz Hernaut de Biaulande au fier vis Ouil voir sire ce li dist Aimeris par moi vos mende li frans cuens posteis que m adouboiz gentis rois seignoriz a tot jorz mes en ert plus vostre amis N i faudras pas dit li rois se tu viz tu avras armes de ci a .XV. dis Dit li danziaus Sire les voz merciz a icel jor que j an serai sessiz Ce soir meismes einz que jor soit feniz nostre enpereres s en revint a Paris et la roine remest a Seint Denis et avec lui le vaillant Aimeris Le soir au vespre au mengier sont assis et la roine a desrenier se prist Ore entandez franc chevalier gentil si vos dirai ce c onques mes ne dis Morz fu li dus de Borgongne au fier vis je remes veve si meinting li pais Lors ving a Charle le roi de Seint Denis autre mari demendai et requis si me dona dant Girart le marchis Je le mende por oir son avis onques n i vint dont molt me ting por vis einz demenda respit a .XV. dis Dolante en fui par foi li vos plevis Apres mendai Charlemene au fier vis et il i vint volentiers non enviz la merci Deu lou roi de Paradis il m espousa au lous de ses amis Apres souper qant li jorz fu feniz tant li proierent li chevalier de pris Girart dona Vienne et le pais Lez moi se jut li rois de Seint Denis et dant Girart se fu a genouz mis por mercier Charlemene au fier vis bessier l an vost la janbe ce m est vis Devant li roi oi mon pie avant mis tres par desoz le covertoir de gris le fis besier dant Girart le marchis tout nu a nu par foi le vos plevis Onques nel sot nus hom de mere vis De l orgueillus bien la vengence pris s il m ot gabee et ge le rescharnis molt en sui bien venchiee Aimeriet o le coraje fier qant la roine oi si desresnier del grant outrage soi venter et proiser de mautalant cuida vis enragier Puis ne menjast por les menbres tranchier En piez se drece n ot en lui c airier par mautalant li a pris a huchier Dame fet il par le cors seint Richier se ce feites dont je vos oi pledier ce fu putage a celer nel vos quier Molt est preudom dant Girart le guerrier de duel morrai se ne le puis vengier Tint un coutel dont la pointe ert d acier voiant toz ceus qui erent au mengier a la roine fet le coutel lancier Fet li eust par mi le cors fichier qant sor .I. coute se let chaoir arrier en une estache fist le coutel fichier Puis passe avant Aimeri au vis fier morte l eust sanz autre recovrier qant lo tolirent li baron chevalier Aimeri boutent et devant et derrier fors de leanz ont le danzel chacie par .I. petit ne li font enconbrier Mes li danziaus n i vost plus delaier ses conpangnons en prist a aresnier Frans damoisiaus pansons del reperier en ce pais fet mauves destrier Deus me confonde se ge plus estre i quier einz men vois a Vienne Aimeriet est de la chanbre issuz Dient Francois Deus Pere de lasus tant mauves plet est par fame meuz Dame roine mal nos est avenu por quel deites Ja nel savoit or nus Se cist coutiaus vos fust el cors feruz qui en ce fust lais est enbatuz cist sorparlers vos fust molt chiers venduz Seignor fet ele tel poor ai eu devant .I. mois n iere mes en vertu Aimeriet ne fu pas esperdu einz acoilli le grant chemin batu tout droit arrieres si com il ert venu Par lor jornees se sont si meintenu que a Vienne sont a un soir venu Voit le Girart liez et joiant en fu endeus ses braz li a au col pandu Biau nies fet il bien soiez vos venu Futes en France Avez Charle veu I avez vos garnement receu Cil ne dit mot que trop fu irascu eincois se tint unt piece tot mu apres parla que bien fu entandu Par Deu biaus oncles mal nos est avenu james en France ne serai jor veu por amor la roine Par Deu biaus oncles dit Aimeri li fier males noveles puis de France noncier Mar i alates a Charle cortoier molt vos a fet la roine avillier vostre lingnaje honir et abessier Qant Charlemenes l espousa a moillier le soir au vespre qant il se dut cochier tant li proierent li baron chevalier qu il vos dona ce pais a baillier Au pie alates por la merci proier et la roine par son outrecuidier tandi son pie si le vos fist besier Tout devant moi s en venta bien l autrier a Seint Denis voiant meint chevalier Morte l euse d un grant coutel d acier qant li baron me boterent arrier Girart l antant le sans cuide changier Par seint Morise fet il cui ge ai chier se puis mender mon grant barnaje fier en France irai par force guerroier N i leserai chastel a pecoier ne borc ne vile iglise ne mostier Dit Aimeri Par Deu le droiturier se vos ce faites dont je vos oi pledier come vostre hom me porroiz engagier Renier mon oncle vos devroit bien aidier Hernaut mon pere de Biaulande le fier et li dus Miles qui molt fet a proisier Et dit Girart Nos irons a Renier Son oirre fist molt tost apareillier armes porterent et argent et or mier puis acoillirent lor grant chemin plenier A granz jornees pansent de chevalchier a Genvres vindrent .I. soir a l anuitier a pie descendent li nobile guerrier Renier les voit n i ot que leescier a molt grant joie les a fet herbergier Qant entrez furent el grant pales plenier Renier lor mostre .I. damoisel molt fier Veez fet il nobile chevalier ce gentil fil ai ge de ma moillier Voir dit Girart le senblant a molt fier Deu en devez loer et mercier Comant a non Nel me devez noier Olivier sire ce li respont Renier Voir dit Girart cestui avrai molt chier car molt fier me resenble Li frere furent en la sale pavee Li dus Girart a la chiere menbree Renier apele coiement a celee cele parole li a dite et contee de la roine come ele s est ventee Renier l antant s a la color muee Deu en jura qui fist ciel et rousee Sa puterie sera chier achetee que France en ert essilliee et gastee Et el sera a grant honte menee s el ne nos est bailliee et delivree et puis a prendre vengence abandonee S or savoit Mile com la chose est alee li nostres freres a la chiere menbree il i vendroit sanz nule tretornee et dant Hernaut a cui proece agree Garin no pere a la barbe mellee qant avriont lor grant ost asenblee par force iroient juqu a la mer betee Dit Girart Frere c est verite provee trois mesagiers prenez sanz demoree qu iront les contes querre par la contree por venir a Vienne Entre Renier et Girart le baron pranent le jor et le terme par non que lor granz oz a force et a bandon asanbleront soz Vienne el sablon Vait s en Girart sanz plus d arestoison ensenble o lui Aimeri le baron juqu a Vienne retornent a bandon Molt fu Girart puisanz et riches hom garnir se fet de viande a foison modre forment et tuer venoison por les granz oz qui par tans i vendront Un jor estoit Girart en son donjon et ot torne son chief devers Lion .M. chevaliers voit venir a bandon Ill an apele Aimeri le baron Biau nies fet il entandez ma reson ne sai ques genz voi venir le sablon espoir ce sont paien ou Esclavon ou tele gent que redouter doion Aymeri l ot si s en rit li frans hom Oncles fet il ja nel vos celeron ce est Hernaut o le flori grenon li miens chiers peres qui tant a bon renon Prenez conroi ou les herbergeron plus sont de mil einsi com nos cuidon la mesniee mon pere Girart monta sanz plus longue atendue et Aimeri qui proece salue de Vienne issent par mi la mestre rue la gent encontre qui de loinz fu venue La gent son pere a Aimeri veue s a de Biaulande l ansengne conneue savoir poez grant joie en a eue Hernaut oisi d une lande foillue voit le Girart le bon destrier argue juqu a son frere n i a resne tenue molt gentement le besse et le salue Dites biau frere feroiz me vos aue Oil fet il par Deu qui fist la nue mar i fu fete la grant descovenue et la roine sera molt chier vendue qu ele en sera ocise et confondue Tant com ill ont lor parole tenue es lor Milon qui rot s ost esmeue a .II. mil homes vient Girart en aue il vait encontre belement le salue Et d autre part de venir s esvertue li dus Renier sanz plus longue atendue ovec lui ot molt bele gent venue grant baronnie et autre gent menue qui tote estoit armee et fervestue Or croist Girart grant force Droit a Vienne sont li conte venu pranent ostieus li grant et li menu Endementires qu il erent descendu es vos Garin qui pere au contes fu cil de Monglane a la fiere vertu en sa conpangne .VII. M. home a escu Molt lassez furent li auferrant crenu et lor hauberc desmaillie et ronpu lor hiaumes cas et percie lor escu n an porent mes que molt sont conbatu vers Sarrazins cuivert et mescreu La merci Deu il les orent veincu mes grant domaje i ont des lor eu Qant a Viene sont li baron venu a molt grant joie i furent receu sus el pales qui de fin marbre fu vait li dus de Monglanne Li dus Garin en monta le planchier si fil le corent acoler et bessier ilec le firent acesmer et bangnier de riches dras le font apareillier en sa mein tint .I. baston de pomier n ot plus bele home de ci a Monpellier La sale vuident le soir apres mengier qu il n i remest que seul .V. chevaliers et Aimeri qui tant fist a proisier Girart parla le nobile guerrier ou voit ses freres ses prist a aresnier et le suen pere c a merveilles ot chier Or m entendez nobile chevalier en ceste terre m estes venuz aidier mes ne savez coment j en ai mestier Je servi Charle l enperere au vis fier tresc a un jor que il ala chacier devers Borgongne li vint .I. mesagier qui les noveles li venoit prononcier morz ert li dus qui tant fet a proisier Par la saiete dont le fer fu d acier me dona Charles la duchoisse au vis fier tote la terre et l annor a baillier Puis fu tele eure qu il le me vendi chier car il meismes espousa la moillier Le soir par nuit qant fu alez couchier tant li proierent li baron chevalier qu il me dona tot ce pais plenier au pie ale por le roi mercier mes la roine par son outrecuidier tendi le sien si le me fist bessier puis s en venta par son outrecuidier Aimeriet o le corage fier li oi dire et meint franc chevalier De duel morrai se ne m en puis venchier car trop est grant la honte Garin li vieuz se dreca an estant ou voit ses fiz si lor dist meintenant Seignor fet il vos estes mi enfant entre Milon et Hernaut le sachant vindrent par force les ennors conquerant Renier ala en France la vaillant il et Girart si devindrent sergent come pastor qui berbiz vont gardant Se l anperere avoit tant d escient qu il vos jurast voiant tote sa gent qu il ne le sot ne ne vint a talant ice hontage dont vos l alez retant james de nos nen avroit mautalant Si m eist Deus n a encor pas grament que guerroie Sinagon l amirant assis m avoit o grant plante de gent en ma cite et derriere et devant S avoie or pes par le mien escient sanpres seroie malades por itant ou plain de liepre ou de malage grant Mes qant j oi brere ces destriers auferranz ces chevaliers en fort estor pesant ferir de lances et d espees tranchanz ce ain ge plus que nule riens vivant Se l enperere avoit or de sans tant qu il vos jurast voiant tote sa gent que il ne sot icest outraje grant james par nos n avroit nul mautalant Et s il nel fait franc chevalier vaillant fesons la guerre et orrible et pesant si li corons tuit seure Aimeriet ot son aiol parler ou voit son oncle seu prant a apeler Avez oi ce viellart sermonner et devant nos de bataille venter Bien devroit en celui por fol clamer qui en bataille le vodroit mes mener Garin l entant le sans cuide desver un batoncel tint por soi deporter tantost li vait par mautalant ruer mes cil ganchi qu i nel pot asener Fill a putain ce dit Garin le ber Ja par garcon qui se veut desreer ne porra nus bien son plet amender que l en nel puisse de plusors parz blamer nos ne vos crerons mie Li cuens Hernauz qui tant fu hardiz hom en piez se drece bien resenble baron ou voit ses freres ses a mis a reson Seignor fet il ne fetes lonc sermon veez lou roi ci devant a Chalon a molt pres est li pais de Mascon alons i tuit et la cite prenon a Charlemene par force la tolon Et dit Garin Par mon chief non feron car ce seroit angin et traison eincois sera li rois mis a reson Atant es lor Baudoin et Huon mesagier erent l enperere Charlon Toz les degrez en monte contremont ou voit Girart si l a mis a reson Entant Girart que te mende Charlon bien a .v. anz et plus si com cuidon qu il te dona Vienne et le donjon puis n an randis vaillat .I. esperon Or si te mende et nos le te dison vien l an droit fere sanz nule aretoison Et se nel fais par le cors seint Simon a ost vendra en ceste region metra ta terre en feu et en charbon ne te lera vaillisant .I. bouton Girart l antant si fronci le grenon Et dit Garin Par mon chief nos iron .XX. chevaliers ensenble o nos menron toz les plus sages que nos trover porron por le jugement dire Lor conseil ont pris einsi com vos di Et dit Hernaut Vendras i Aimeri parler au roi a Charlon pres d ici savoir se ja verroies avec lui aucun de ceus qui la parole oi que la roine par devant toi gehi En non Deu sire ce respont Aimeri j en troverrai .XIII. ce vos afi Lors s atornerent li chevalier hardi Aymeriet n ot pas cuer esbahi un mes apele coiement et seri Amis fet il je te comant et di nostre home soient arme et fervesti si les envoie apres nos ce te di car ge sai bien tout de voir et de fi que nos serons par mal de cort parti Volentier sire li vallez respondi Lors chevauchierent li chevalier hardi juqu a Chalon n i ot resne ganchi defors le borc ont lor ostel sessi puis vont a cort nel metent en obli Li rois les voit gentement lor a dit Bien vegniez vos franc chevalier hardi Bon gre vos sai que estes venuz ci Voir dit Hernaut mal l avez deservi .c. daaz et qui vos tient a ami Li rois l antant molt en fu esbahi d autre part garde s a veu Aymeri Bien vegniez vos franc damoisel gentil N a encor guieres c a seint Denis vos vi En non Deu sire li danziaus respondi Teus .XXX. cous i oi qant ge i fui que ne metrai mes a piece en oubli que la roine .I. tel plet me basti par .I. petit qu il ne m orent murtri come celui qui n i avoit ami A l ainz que poi m en tornai et foi si reving a Vienne Li enpereres a la parole oie lez lui saoit la roine esbahie il la regarde par molt grant felonnie et puis Girart a la chiere hardi Il l en apele voiant se baronnie Sire Girart nel me celez vos mie sont dont ces genz de la vostre baillie Qui est cil vieuz a la barbe florie Droiz enperere par Deu le fiz Marie ce est mes peres qui Jesu beneie et mes trois freres qui ont grant seignorie Biau sire rois tandis com l an vos prie fetes moi droit de la grant estoutie dont la roine se vanta par folie dedanz la chanbre au bon abe Helie Li rois l antant n a talant qu il en rie son senechal hautement en escrie Alez fait il gardez nel celez mie fetes enquerre se c est voirs ou folie dont j ai la plainte ci devant moi oie Foi que doie Deu le fiz seinte Marie plus en ferai que hom qui soit en vie Mes s il n est voirs ne lerai que nel die que de bien fere vient molt grant felonnie Puis que Girart ot Vienne sessie et Renier Genvres la fort cite garnie ne me servirent vaillisant une alie Mes par celui qui tout a en baillie ja ceste terre n iert de mon cors guerpie tant que sera conpare la folie Dit Aimeri Se Deus me beneie bien porra estre einz la nuit aserie Sire enperere nel vos celerai mie foi que doi Deu que l en aore et prie n a so ciel home qui onques soit en vie prince ne roi tant ait grant seignorie s il me fet bien et apres me ledie que jeu prisase une pome porrie Qui me donroit tot l or de Romanie trive n acorde n en prendroie ge mie tant que sera la roine honnie Mar i fist tel outrage Sire Girart dit Naimes le sachant car en prenez une amendise grant Et dit Girart Vos parlez de noiant Par cel apostre que quierent peneant qui me donroit la cite de Melant Rome et Pavie et Tolouse la grant je n en feroie pes ne acordement tant que j en aie vengence a mon talant de la roine qui par son grant bobant fist le hontaje dont j ai le cuer dolant Mes par l apostre que quierent peneant ne finerai james en mon vivant tant qu ele en soit honie Sire Girart ce dit li dus Naimon car l en soufrez a fere amendison que vostre sele dont biau sont li arcon port sor son chief une liue a bandon nu piez en langes s il vos senble reson Et dit Garin Vos parlez en pardon Par cel apostre c on quiert en pre Noiron trive n acorde james jor n en prandron tant qu ele perde son chief soz le menton Comant deable dit Do de Monloon Qui est cil vieuz o ce flori grenon qui devant nos dit si grant mesprison De par lou roi desdire le doit on Lors passe avant a guise de felon tout meintenant le sessi au menton plus de .c. peus arracha del grenon voient tout le barnaje Mile de Puille a la color muee qant vit son pere c ot la barbe tiree Doon regarde par molt grant airee Renier de Genvres a ses piaus desfublees et dant Girart si a trete l espee Aimeri tint une mace carree cele part vint par molt grant ravinee et fiert Doon sanz plus de demoree qui son aieul ot la barbe tiree que la cervele en a jus reversee Li rois s escrie a molt haute alenee Prenez le moi ma mesniee privee S ainsi nel fetes vo foi avez fausee Mar s en ira por nule trestornee que ma cort a honnie Vint e cint furent devant le roi Charlon de la mesniee dant Girart le baron qui tuit tenoit ou espee ou baton Se le pales et la sale ne font mien escient que bien se deffandront Li cuens Hernaut ala ferir Oton qui il li tranche le chief soz le menton Mile de Puille vait ferir Haguenon amont el chief a .II. poinz d un baston Renier de Genvres fiert Hoel le Breton et Girart tint une hache a bandon pie et demi ot le tranchant de lonc De la sale issent qui q an poist ne qui non Se la roine fust trovee en meson mien escient prise en fust vengison en sa chanbre ert ou molt ot grant fricon Outre s en pasent li chevalier baron juqu en la place ou li bon destrier sont ill i monterent sanz plus d arestoison Francois s adoubent entor et environ s or les atandent i seront fol bricon qu il ont fet grant outraje Francois s adobent en la bone cite et li Girart chevalchent tuit serre Einz qu il eusent demie liue erre Girart regarde entre .I. plain et .I. pre voit de ses genz venir a grant plante que cil amoine cui il fu comende de seint Morise ont l ensengne porte Girart les voit grant joie en a mene ou voit ses freres ses en a apelez Seignor fet il ore oiez mon panse vez biau secors que Deus nos a mostre Ce sont noz genz jeu sai de verite qui vienent de Vienne Qant Girart fu entre ses homes mis molt hautement a escrier s est pris Franche mesniee qui vos a ci tramis Je voir biau sire ce li dit Aimeris par .I. mesaje qui hui matin le dis Nies dit Girart bien estes mes amis se ne fussiez tuit fuson mort o pris Lors s en tornerent li chevalier de pris Bien les enchauce Charlemene au fier vis en sa conpangne .II. mile fervestiz Devant les autres vint Hermer de Paris a haute voiz a escrier s est pris Ou ies alez dant Girart le marchis Renier de Genvres envers toi m aatis que tu es lerres et vers Deu ennemis et vers Charlon lou roi de Seint Denis Renier l entant a pou n enraje vis Il li escrie Tu menz cuiverz failliz Et envers toi en sui prez et garniz que traison envers Charle ne fis A ice mot n i ont plus respit quis les destriers brochent des esperons marsiz Renier le fiert desor son escu bis desor la bocle li a fret et maumis N i vaut l auberc une feuille de lis le roit espie enz el cors li a mis del bon destrier l abat mort el larriz puis a sessi le bon destrier de pris Arrieres torne com chevaliers gentis En non Deu oncles ce li dist Aimeris or vos ain plus que onques mes ne fis S or me donez ce bon destrier de pris je serai ja de mes armes garniz c a ce besong doi bien ce m est avis noviaus chevaliers estre Por adouber le vassal Aimeri sont descendu delez .I. bois folli Li dus Girart et si frere avec lui el dos li vestent le blanc hauberc treliz el chief li lacent .I. vert hiaume bruni Girart li ceint li branc d acier forbi et de sa paume .I. grant cop le feri De moi te menbre soies preuz Aymeri Grant merciz sire li vasaus respondi si serai ge se Deus plest et je vif En li amoine .I. destrier arrabi il i monta que plus n i atandi au col li pandent .I. fort escu voti et el pong prant .I. fort espie bruni fist .I. esles par mi le pre flori Dit l un a l autre Biau chevalier a ci Trestuit le sengnent li chevalier hardi car molt en ont grant joie Adobez fu Aimeri li cortois novelement prist armes et conrois puis s en tornerent li baron demenois Bien les enchauce Charlemenes li rois en sa conpangne bien .II. mile Francois Aymeriez fu chevaliers cortois arriere torne le bon destrier norrois et vait ferir Jocerant l Aubijois L escu li perce et de l auberc les ploiz el cors li mist son espie vienois enpaint le bien si l abat el chaumois puis li escrie Plus avant ne vendroiz Lors s en torna li vasaus demenois mes il sessi le bon destrier aincois seu presenta son oncle Vont s en li conte sanz plus de demoree bien les enchauce a grant esperonnee Charles li rois a la barbe mellee et li baron de France la loee Et Renier fu d autre part la valee son bon destrier n ot cure de jornee sovant le broche a molt grant rendonee Ceus regarda qui le sivent l estree le bon destrier a la teste tornee vers Eliot par molt grant airee ferir le vet devant a l ancontree L escu li perce sanz plus de demoree li blans haubers n ot guieres de duree par mi le cors a l ensengne passee mort le trebuche de la sele doree par devant Charle a la barbe mellee Prist le destrier par la resne doree vint a Girart dist li reson menbree Alons nos en n i avrions duree Atant s en tornent a grant esperonnee vers la cit de Vienne Bien les enchauce Charles et si baron en sa mein tint d une lance un troncon Li rois s escrie clerement a haut ton Ou ies alez Girart cuivert gloton ja ne verras passer ceste sesson que t aseire en Vienne el donjon Se te puis prendre ja n avras raencon que ne te mete el col .I. chaengnon Dit Aimeri Ore oi fole reson Girart vos mende ja nel vos celeron qu il vos ferra enz el cors a bandon de son espie qui qu an poist ne qui non que d autre part parra le confanon A ce mot pongnent ensenble li baron des Girart pristrent .LX. en .I. rendon Nostre enperere retorna a Vaudon ce est une eve qui cort de grant randon et Girart vint a Vienne el donjon Et la roine a la clere facon retorne arrieres en France le roion grant ost asenble a force et a bandon Qant sont venu d entor et d environ .XV. M. sont que sergent que garcon Ceus mena toz apres lou roi Charlon la roine de France Droit a Vienne qant il fu avespre en vint Girart o son riche barne Meintenant sont descendu au degre puis en monterent el grant palais liste Girart apele son riche parente Baron fet il ore oiez mon panse Charles li rois m a molt coilli en he hui m a tolu de mes homes plante que mes a piece ne seront recovre Dit Renier Sire par la foi que doi De james li rois ce sachiez de verte ne renterra en France le reinne si l avra ainz chierement conpare Par cel apostre q an quiert en Noiron pre se l avions ocis ou afole d Aimeriet ferons roi coronne Frere dit Mile ore avez mal parle Deus si comende li roi de majeste que l en ne die orgueil ne folete Preudom est Charles ce savons de verte n a meillor roi en la crestiente s il estoit morz par la foi que doi De molt remendroit France en grant offente Qui de Borgongne l avroit desherite moi est avis assez l avroit greve D aler en France sanbleroit folete car trop est la gent fiere Au matinet qant l aube est esclarcie hors de Vienne sa fort cite garnie oisi armee la grant chevalerie bien sont .XX. mile en cele conpangnie Entre le bois et la roche naie de Maconnois ont la proie acoillie et la cite ont a force sessie Molt i troverent avoir et menentie tirez et pailes et soie d Aumarie or et argent et destriers de Surie en font mener la riche baronnie droit a Vienne la fort cite garnie Un mes s en torne qui ne se tarja mie a Charlemene a la barbe florie vet conter les noveles Vet s en li mes corant tot abrivez sor .I. cheval qui toz fu tresuez isnelement est del mont avalez Juqu a Charlon ne s est pas arestez le roi demende et il li fu mostrez Qant il le voit si s est haut escriez Sire fet il envers moi entandez ore est perdue Mascon vostre citez De toz avoirs n i a il tant remes don donesiez .II. deniers moneez Li rois l antant a pou n est forsenez Qui a ce fet dit Charles li menbrez En non Deu sire ja nel vos quier celer li dus Girart et Renier li senez Mile de Puille et li granz parentez Des Carantin juqu au Monz Jenevez ne a Puillon ne Lonbart desfaez qu il n aient toz et semons et mendez por estre en lor aide Dit li mesajes ja nel vos celeron Biau sire rois entandez ma reson entre Girart et son frere Milon ont asanble a force et a bandon tote lor gent d entor et d environ Et d autre part dant Hernaut li frans hom de Toulosans ra asanble foison qui ont jure par grant airoison que ja de vos ne prendront raencon einz gasteront si France le roion que n i prendroiz vaillant .I. esperon se la roine a la clere facon ne lor livrez a prendre venjoison Charles l antant si dolanz ne fu hom il en apele et Hervi et Droon Baron dit il oiez grant derreson le duc Girart ai trove molt felon que j adobai en ma mestre meson D aler en France orendroit vos semon si m amenez Baudoin et Huon et Rolendin a la clere facon En tote France ne remengne nus hom ne chevalier ne sergent ne guedon que tuit ne viegnent a Vienne par non ceus qui n ont armes nos les adoberon Et cil responent A Deu beneicon Droiz enpereres vostre comant feron Lors s en tornerent a coite d esperon socors vont querre en France le roion Et l enperere sanz plus d arestoison fist aporter la chasse seint Simon ilec jura Charles et si baron qu il aserra Vienne le donjon einz i serra .XIIII. anz environ c a force ne la prengne Li mes en sont en douce France ale qui molt grant ost ont semons et mende Cil de Vienne sont parti et sevre Mile de Puille s en vet en son resne et a Biaulende cele noble cite s an vet Hernaut au coraje adure et Renier est a Genvres retorne Girart remest dedanz sa fermete car li frans dus n avoit mie pense qu il an fust guerre james en son ae si ert encore aincois .I. an passe dont en seront .c. homes mort gite Li mesagier dont je vos ai conte qui en estoit en douce France ale ont tot lor terme el pais demore tant que ill ont si grant ost asenble que tel n oisi de France le resne .C. mile furent ce dit an par verte que duc que conte que chevalier menbre De France partent n i ont plus demore tant ont ensanble esploitie et erre c a un mardi sont en Borgongne entre delez .I. tertre sont la nuit ostele A l andemein qant il fu ajorne droit vers Mascon se sont achemine et li rois encontre Devers Borgongne vint l enperere errant et a torne son chief vers ocident vers douce France cele terre vaillant et vit les oz vers le tertre pandant Il les sengna de Deu le tot poissant Et Deus dit il biau Pere roialement si liez puet estre en ce siecle vivant qui si grant gent sont a li apandant Par cel apostre que quierent penean puis que ge ai jure le serement n enterrai mes en France la vaillant tant que j aie Vienne Cele nuit s est Charlemene ostelez juqu au demein que il fu ajorne de totes parz fu li oz effreez Sor les somiers est li hernois trousez droit vers Mascon se sont achemine car il cuidierent tres bien par verite c Aimeriet fust la dedanz trovez Mes il fu sages et tres bien apansez qant a veuz les granz oz asenblez et les barons que Charles a mendez droit a Vienne est li bers trainez car ce estoit sa meillor sauvetez Et l enperere en est apres alez et ses granz oz et ses riches barnez charroier fet et les vins et les blez Vienne asient environ et en lez Tandent aucubes et paveillons et tres mes ainz seront toz les .V. anz passez que ja soit prisse la mestre fermetez car molt est bien garnie la citez et cil dedanz sont riche Grant fu le siege entor Vienne mis onques gregnor ne vit hom qui soit vis Charles en jure le roi de Seint Denis n en partira tant qu il les avra pris Li dus Girart voit son chastel assis n est pas merveille s il fu espooris Deus dist li dus biaus rois de Paradis s or n ai secors morz sui et mal bailliz Mille est en Puille mi freres li gentis et a Biaulande Hernaout o le fier vis Renier a Genvres li chevaliers hardiz Trois mesagiers en a a reson mis Entandez moi dit Girart li marchis le matinet qant jorz ert esclarciz iroiz vos trois n i ait plus terme quis querre mes freres et mes autres amis si lor diroiz que Charles m a assis Por amor Deu qui pardon fist Longis me viegnent ore secorre en cest pais Sire font il tout a vostre devis En non Deu oncles ce li dist Aimeris ne mengerai par foi le vos plevis tant que j avre chevaliers desconfiz et par mon cors et retenu et pris Nies dit Girart Jesu te soit aidis Se tu ne fuses je fuse mal bailliz Aimeri s arme li chevaliers gentis il vest l auberc lace l iaume bruni au col li pandent .I. fort escu votiz et en son pong .I. roit espie forbi et fist armer chevaliers .C. et dis Par mi la porte s en isent ademis et cil de l ost les ont tres bien oiz .II. C. des lor ont lor garnemenz pris Onques n i firent ne grant noise ne cri d anbes .II. parz brochent tot ademis si s entrefierent sor les escuz votiz des groses lances font voler les escliz Lors comenca li estors esbaudiz brisent ces lances ces escuz font croisir chevaliers chient de ces destriers de pris A grant meschief i estoit Aimeris a haute voiz a escrier s est pris Qui or n i fiert de Deu soit il honniz En Vienne ert dant Girart li marchis qant ill oi de son neveu les criz et les granz cous et le fier chapleiz il fet armer ses chevaliers de pris .VII. XX. estoient corageus et hardiz Par mi la porte s en isent ademis que cil de l ost nes ont mie choisiz de ci au tentes les ont molt tost requis ferant les vont des brans d acier forbiz Lors recomence li estors esbaudiz meint fort escu i veisiez croissiz et meint hauberc derout et desarci meint chevalier trebuchie et ocis Le mestre tref ont tot par terre mis la ou gisoit Charles de Seint Denis Li rois oi des brans le fereiz et retentir ces verz elmes bruniz el tref Bernart est d autre part ganchiz si demende ses armes El tref Bernart por avoir guerison s en fuit li rois si let son paveillon et la roine a la clere facon s en vost foir apres lui a bandon mes Aimeri la sessi au giron Girart la voit si joianz ne fu hom il trest l espee qui li pant au giron ferir la vost par grant airoison qant Aymeri li escrie a haut ton Oncle Girart por Deu ne l ocion Einz la menrons a Vienne el donjon a noz talanz en prendrons vengison Nies dit Girart vos dites bien reson Atant es vos Rollant li nies Charlon et Baudoin le nobile baron neveu estoient le roi de Monloon Cil Baudoins l en a mis a reson Droiz enpereres trop nos aseuron que la roine ce cuit perdue avon o lui l en moine Girart en son donjon Secorez la por Deu et por son non Volantiers voir ce respondi Charlon A ice mot monte el destrier gascon toz desarmez sanz nule arestoison a son col pant .I. escu a lion un roit espie a sessi en son pong Del tref s en ist a cote d esperon apres Girart vait pongnant de rendon qui la roine en menoit en prison Fiert Aymeri qui la tint au giron li rois le fiert sor l escu au lion que il fant par desoz le blazon fort fu l auberc que maille n en derront empeint le bien si l abat el sablon Prant la roine a la clere facon monter la fet sor .I. destrier gascon si l en remoine au mestre paveillon bien l a de mort rescouse Droit a Vienne en est Girart venuz et Aymeris li bons vasaus cremuz et cil qui furent aveques lui issuz Bien ont le jor ceus de l ost esmeuz .XL. en ont que pris que abatuz Del bon destrier est Girart descenduz en son palais en vait molt irascuz Deus dit li dus par voz seintes vertuz s or n ai aide morz sui et confonduz Mille est en Puille dont molt sui esperduz et a Biaulande est Hernaut li chenuz Renier a Genvers li chevaliers cremuz je cuit c a tart m iert li secors venuz Mes de neant ert li dus irascuz c au matinet qant jorz fu aparuz Mile de Puille l a molt bien secoru qui li envoie .M. homes a escuz Et d autre part est dant Hernaut venuz qui li amoine .M. homes fervestuz Renier de Genvres ra ses oz esmeuz au secors vient li vasaus esleuz a .II. mil homes sor les destriers crenuz et .I. suen fiz est aveques venuz c est Olivier qui puis fu Rollant druz Juqu a Vienne ne sont aresteuz au pales sont li freres descenduz Liez fu Girart qant il les a veuz encontre eus est fors del pales issuz ses freres besse qant les a conneuz Voit Olivier qu est au secors venuz lui et bele Aude dont molt fu liez li dus endeus ses braz li a au col panduz Cil escuier sont as ostieus coruz establer font les bons destriers crenuz Sus el pales monta Girart li dus o lui ses freres que molt a chier tenuz as estres montent li chevalier menbruz si voient tres et paveillons tenduz Es vos Rollant qui est de l ost issuz porte .I. faucon s est au Rosne venuz desoz Vienne ou malarz ot veuz Son oisel giete li damoisiaus cremuz pris a .II. annes.II. malarz abatuz mes ses faucons fu el vergier perduz Voit le Olivier ne se tint mie muz en haut parla que bien fu entanduz Par Deu biaus oncles ore ai biaus cous veuz de l ost de France est .I. danziaus issuz desoz Vienne est au Rosne venuz ses faucons a .II. malarz abatuz si est volez sor ces arbres foilluz Se ge n i vois vis sui et recreuz et se gel tieng il n iert hui mes renduz por amor ceus de France Ce dit Girart Biau nies tot ce lessiez se vos perdoie ne seroie mes liez Dit Olivier De folie plediez je nel leroie por a perdre .I. des piez Isnelement monta sor .I. destrier par mi la porte s en ist toz eslessiez einz ne fina s est venuz au vergier l oisel reclaime qui ert sor le ramier et il s asiet sor son pong senestrier Voit le Rollant n ot en lui c airier a haute voiz li comence a huchier Ies tu mesaje vallet Nel me noier Car me rant ore mon oisel que j ai chier je te ferai .XV. livres paier Dit Olivier De folie oi pledier Je nel rendroie por .C. livres d or mier De la parole me senblez ussurier qui me deniers me volez apaier Cist ert or miens autre alez porchacier Rollant l antant li sans cuide changier tres par mi l eve a brochie le destrier de l autre part est venuz el vergier par les .II. resnes vait sessir Olivier Cortoisement l en prist a aresnier Come as tu non Garde nel me noier Vassal fet il j ai a non Olivier nez sui de Genvres fiz au conte Renier si est mon oncles dant Hernaut le guerrier Nies sui Girart de Vienne le fier que li rois veut de sa terre chacier par molt grant felonnie Qant Olivier oi parler Rollant il aresone bel et cortoisement Or t ai ge dit quel gent sont mi parent et tu qui es Nel me celer noiant Amis fet il l en m apele Rollant nies sui Charlon l enperere puisant Par cel apostre que quierent peneant se Deus ce done par son comendement que ge repas outre cele eve grant morz est Girart et Hernaut le ferrant jes ferai pandre et encroer au vant Rant mon oisel ne le porte en avant je ne veil mie que ja garcon s en vant que il me toille la monte d un besant Dit Olivier Ore oi plet de neant Se tu m en croiz tu seras mon sergent se tu me sers de riens a mon talant eincois .I. an par le mien escient te donrai ge ou vile ou chasement ou riche vile ou chastel en estant por ce que preuz me senbles Qant Rollant ot Olivier si parler hauce le pong qu il l en voloit doner qant tout par lui se prist a porpenser qu il le vodra encore aresonner Vassal fet il ancor vos veil rouver que par amors mon oisel me rendez par .I. covant que vos m orroiz conter que s autre foiz de rien me requerez que ge ferai totes voz volentez Dit Olivier Volentiers et de grez par tel covant vos sera delivre Lasche les giez si let l oisel aler Rollant le prist sanz plus de demorer Et Olivier l en prist a apeler Vassal fet il par la foi que devez Charle vostre oncle que tant avez ame se g en vosise vostre faucon porter que feisiez Gardez nel me celez Et dit Rollant Ja orroiz veritez par cel apostre q an quiert en Noiron pre del gros del pong t alasse tel doner en mi le vis qui q an deust peser q andeus les euz te feise voler voiant ceus de Vienne Olivier l ot si taint come charbon par mautalant l en a mis a reson Vassal fet il que feise je donc ja n ietes vos ne plus grant ne plus lonc Par cel apostre q an quiert en pre Noiron s antre nos deus esmeust la tancon n en feisiez en France vantoison q an portisiez par force .I. seul bouton Ja n i queisse espee ne baston tel vos donasse sor le nes de mon pong que li clers sans en isist de randon voiant toz ceus del siege Gloz dit Rollant Deus te puist mal doner Par ce Seignor que l en doit aorer se g estoie ore as loges retornez morz est Girart et toz tes parantez jes ferai pandre ainz .IIII. mois passez Et tu seras tonduz et bertodez si en seras escharniz et gabez Tant te ferai par amor de bontez que n i seras ocis ne afolez por mon oisel c as randu de bon grez Olivier l ot si comence a jurer Par cel apostre c on quiert en Noiron pre se ge vif tant que ge soie adoube et ge vos puis en bataille encontrer tel vos donrai de l espie noiele que merveille ert se n etes aterre Rollant l antant sin a .II. ris gitez point le destrier si s est feruz es guez de l autre part s en est outre passez et trepassa les loges et les tres Devant le roi descent en mi le pre entor lui vet li plus riches barnez Li rois meismes l en a aresonne Biau nies fait il envers moi entandez qui est cist garz gardez nel me celez a cui avez parle dela ces guez En non Deu sire ja orroiz verite fiz est Renier de Genvres la cite et nies Girart qui tant est forsenez Li rois l antant a pou qu il n est devez He gloz dit il por coi ne l as tue Par ce Seignor qui Deus est apelee ja ne queisse que avant fust alez ne ses lingnajes fust par lui amontez En non Deu sire dit Rollant li menbrez je n i avoie nus garnemenz portez se geu ferisse et il moi autretel Biau nies dit Charles vos dites verite n alez mes sanz voz armes Droit a Vienne sanz plus d arestoison s en retorna Olivier li frans hom Voit le Girart si l a mis a reson Biau nies fet il avez eu fricon Bien vos esta merci Deu et son non qant ne vos ont en l ost mene prison Oreinz vos vi ce m est vis lez ce pont sor vostre pong portiez .I. faucon De l ost de France vi oisir un garcon l eve pasa an guise de baron seu vos toli ou vosisiez ou non N ai soing de viautre qant il est soz gagnon james amer ne te devra nus hom Olivier l ot si teint come charbon si li respont par grant airoison En non Deu sire vos dites que preudom si come cil qui est molt riches hom qui la roine besates el talon si se venta oiant meint haut baron a Seint Denis chies l abe Phelipon Forment m en poise foi que doi seint Simon que molt en ai grant honte Come Girart vit son neveu irier tantost l en moine a son pere Renier et il les vet acoler et bessier En non Deu sire ce a dit Olivier or me covient et armes et destrier car tant me sant fort et sein et legier c a ces granz jostes veil mon cors essaier chevalier veil par mon cors jostissier Nies dit Girart bien fet a ostroier vos les avroiz de gre et volentiers Isnelement le fet apareillier vestir le fet sanz plus de delaier chemise et braies chauces de Montpellier el dos li vestent .I. fres hermine chier et un bliaut q an ot fet entaillier Por messe oir l en moinent au mostier que c est coutume a noviau chevalier eincois qu il doie ses garnemenz baillier doit oir messe et Damedeu proier que il li doint ennor et gaengnier et a droiture sa terre jotissier Et puis l en moinent sus el pales plenier ses garnemenz li font apareillier el dos li vestent .I. blanc hauberc doblier el chief lacent .I. vert elme a or mier Girart li ceint .I. riche branc d acier el col le fiert .I. grant cop et plenier De moi te menbre soies preuz Olivier Grant merciz sire dit le damoisel fier si serai ge se Deus me veut aidier En li amoine .I. auferrant destrier et il li monte par son senestre estrier a tenir l autre ot meint franc escuier En li aporte .I. escu de cartier es poinz li baillent .I. roit tranchant espie ou l en ot fet .I. confanon lacier Qui li veist son escu menoier par les enarmes lever et enbracier et son cheval par la cort essaier entre Francois venir et eslessier Dit l un a l autre Ci a biau chevalier Deus le guerisse qui tout puet jostissier Sor toz les autres en pria Deu Renier Et Olivier n i vost plus delaier vint a Girart si li prist a proier Sire fet il a celer nel vos quier aler en veil la fors esbenoier tele avanture me porra Deu jugier c a tot jorz mes m en avriez plus chier Vos n iroiez pas dit son pere Renier se vos perdoie par aucun destorbier n est hom qui mes me poist leeschier Si fera sire dit Girart le guerrier de son barnaje nel doit nes delaier Deus le guerra qui tout a a jugier A ces paroles s en torna Olivier par mi la porte s en ist sor son destrier delez les murs comence a chevalchier N ot pas erre le tret a un archier qu il vit de l ost issir .I. chevalier c est Guinement qui molt fist a proisier desoz Vienne por soi esbenoier aloit armez sor son corant destrier por son barnaje prover et essaier Qant Olivier le vit seul chevalchier vers lui s en vet a guise d ome fier onques de rien nel dengna aresnier ferir le vet sor l escu de cartier desoz la bocle li fet fendre et percier et le hauberc fauser et enpirier par mi le cors li mist l espie d acier Enpaint le bien si l a fet trebuchier le coing del hiaume li feri el gravier par mi la resne a sessi le destrier cortoisement s en prist a reperier Grant joie en ot le suen pere Renier et de Vienne Girart le franc guerrier mes d autre part n i ot que corrocier en ceus de l ost Charlemene au vis fier por Guinement le gentil chevalier qui a perdue la vie et le destrier Mes or lerons ci atant d Olivier qant leus sera bien savrai reperier si vos dirons de Rollant le guerrier Armes demende por soi apareillier et l an li done de gre et volentiers En son dos vest .I. blanc hauberc doblier ceint Durendal a son flanc senestrier en li amoine .I. auferrant destrier et il i monte par son senestre estrier a son col pant .I. escu de cartier et puis sessi .I. roit espie d acier a grant merveille senbla gentil guerrier Francois l esgardent li baron chevalier dit l un a l autre Molt fet cist a prisier n a home el monde plus face a resongnier Deus le guerisse qui tout puet jostissier car molt senble preudome Molt richement s est adobez Rollant aval les loges s en vet esperonnant Aymeri fu en Vienne la grant de fere joste ot le cuer desirrant ses armes a demende meintenant et l an li met devant lui en presant Il vest l auberc lace l iaume luisant et ceint l espee au pont d or flanboiant l an li amoine .I. destrier auferrant et il i monte tost et isnelement Au col li pandent .I. fort escu pesant el pong li baillent .I. roit espie tranchant par mi la porte s en ist eperonnant En mi sa voie a encontre Rollant ne vait l un l autre de riens aresonnant granz cous se donent sor les escuz devant desoz les bocles les percent meintenant forz haubers ont que maille n en desment Rolant fu fiers et chevalier vaillant Aimeri fiert si vertueusement que il l abat del destrier auferrant Prant le destrier par la resne a argent si s en retorne bel et cortoisement voiant ceus de Vienne Qant Aymeris se santi abatu il saut en piez si enbrace l escu et tret l espee au brun coutel molu A voiz l escrie Chevalier ou vas tu S ainsi t en vas tu as ton lous perdu Or t en revas Rollant a respondu n avras plus mal puis que t ai abatu mes j en merrai cest auferrant crenu Aymeris l ot molt en fu irascu dedanz Vienne en est a pie venu Voit le Olivier liez et joianz en fu ou voit Girart si li a menteu en haut parla que bien fu entandu Par Deu biaus oncles merveilles ai veu de ceste joste ne sui pas irascu C est li vasaus qui ma l oisel tolu tel chevalier ne vi mes ne ne fu del barnaje de France Oiez baron que Deus vos beneie le glorieus le fiz seinte Marie Ne vos di pas menconge ne folie mes bone estoire et de grant baronnie de forz estors et de fiere aatie N avint a Charle tel domaje en sa vie fors en Espagne entre gent paiennie la ou Rollant fu traiz par envie et Olivier a la chiere hardie et li .xx. mile qui perdirent la vie Charles li rois ne s aseura mie devant Vienne la fort cite entie se fu logiez o sa grant ost bannie Tout environ ont la terre agastie et meinte vile essilliee et broie les vingnes gastent la proie ont acoillie et bues et vaches et autre menantie Les genz s enfuient n osent demorer mie lor mesons lessent et lor gaengnerie molt est la terre d environ apovrie tote l a Charles a son oes sessie Mes de Vienne ne pot il prendre mie einz i ot sis .VII. anz a ost banie qu il ne s en mut ne por vent ne por pluie del siege de Vienne Ce fu a Pasques que l en dit en este foillisent bois et verdisent cil pre cil oisel chantent doucement et soef Charles estoit en son demoine tre desoz Vienne la mirable cite Li dus Rollant repere de berser d une forest ou il ot converse ensenble o lui meint chevalier menbre si orent pris .II. cers et .I. sengler Rollant en vint tot droit au mestre tref ou voit le roi si l a aresonne Sire fet il envers moi entendez bien a .VII. anz aconpliz et passez vos asejastes ceste bone cite cil sont leanz come moine ruille et nos ca fors come cers esgare S il vos plest sire le congie m en donez c une quintaine me lessisiez fermer tost i ferroient cil novel adoube de l ost de France cil legier bacheler lors si porrons vaoir et esprover qui mieuz savra ses garnemenz porter fere bataille et en estor aler Biau nies dist Charles non feroiz en non De car tant connois Girart et sa fierte qu il ne leroit por les menbres coper qu il n oisist hors au mieuz de son barne en la quintaine vodroit premier joster Par mauves home est prodom enconbre Et dit Rollans Tot ce lessiez ester Par cele foi que ge vos doi porter je i menrai .M. chevaliers armez S i vient Girart ne Olivier le ber ja en Vienne ne porront retorner as brans d acier les irons encontrer Sire dit Gannes il vos dit verite ja plus preudome de Rollant ne verrez Tant li proia du Naimes li barbez que Charlemenes li a congie done ore en puet fere tote sa volente de drecier la qintaine Tant li pria du Naimes de Baivier Ganes li cuens et li Danois Ogier que l enperere l en a done congie Li dus Rollant n i vost plus delaier en mi le pre a fet .III. pieus fichier et par desus trois forz haubers dobliers Lors s apareillent cil bacheler legier la veissiez enseler meint destrier espiez et lances brendir et paumoier Dedanz Vienne fu le ber Olivier lez lui bele Aude qui tant fist a proisier regarde aval le gentil chevalier voit la quintaine en mi le pre fichier ne fust si liez por .C. livres d or mier Lors se porpense le nobile guerrier q an la quintaine vodra ferir premier Li cuens apele Garin son escuier Va met ma sele sor mon corant destrier et si m aporte mes garnemenz plus chier aler me veil la fors esbenoier Aude l antant seu corut enbracier Frere fet ele ou devez chevalchier Bele au Francois veil aler tornoier Merci fet ele por Deu le droiturier Charles vos het de la teste tranchier si fet ses nies Rollant le bon guerrier tout l or del mont ne vos avroit mestier ne vos pandist s il vos pooit baillier Bele dit il ne vos chaut d esmaier par ce Seignor qui tot a a jugier seu set par vos dant Girart le guerrrier en fin avez perdu mes amistiez Sire fet el atant vos en tessiez james .I. mot ne m en orroiz pledier car vos estes mes freres Olivier s arme com chevalier vaillant chauces de fer et esperons d argent chauce le ber molt acesmeement vest .I. hauberc lace l iaume luisant au flanc senestre ceint l espee tranchant L en li amoine .I. destrier auferrant covert de fer et derriere et devant li frains valoit .XIIII. mars d argent li cuens i monte c a arcon ne s i prent A son col pant .I. fort escu pesant prist .I. espie dont le fer fu tranchant par la poterne s en ist isnelement a l ains qu il pot entre Frans coiement se vait ferir en la presse plus grant que nel connoist ne Charles ne sa gent Damoisele Aude au coraje vaillant estoit remesse au fenestres plorant la regretoit son frere belement Olivier frere cuens de grant hardement cil Damedeus qui ne faut ne ne ment gart vostre cors de mort et de torment Car Charlemene enperere poisant il et si home vos heent durement Au duc Girart le dist .I. mes errant que Olivier ou coraje vaillant s en est issuz sor son destrier corant et si n en moine conpangnon ne sergent Girart l oi a pou d ire ne fant ill an jura par molt fier mautalant N i remendra chevalier ne sergent qui puist porter armes ne garnement qui ne s en isse toz armez meintenant Ore i parra qui m i sera aidant qui veut de moi tenir son chasement si s apareut tost et isnelement ses requerons au tentes meintenant Je veil mostrer de mon esforcement a Charlemene qui douce France apant Dient si home Tout a vostre comant qui vos faudra si soit vis recreant A ces paroles s adobent meintenant vestent haubers lacent hiaumes luisanz cengnent espees dont li branc sont trenchant a lor cous pandent les forz escuz pesanz et en lor poinz les forz espiez tranchanz et puis en isent par mi la porte errant Li dus Girart si les conduit devant sor .I. destrier qui les granz sauz porprant desus es lances ont confanons pandanz c aval le vant aloient baloiant Desoz Vienne ot .I. bochet molt gent li dus Girart i fet entrer sa gent son aguet fet de .III. M. conbatanz de l or des armes li boochel resplant Einz qu i soit none ne le vespre sonant li quel que soit i avront perte grant ou Viennois ou la francoise gent au tornoi soz Vienne Nostre enperere lou roi de Seint Denis en apela .II. chevaliers de pris l un fu Entiaumes et li autres Gaudris Baron fet il entandez mon avis ceste quintaine me gardez ce vos pri que par Girart n i soions escharniz Sire font il tout a vostre devis Mes Olivier nel mist pas en obli par les enarmes a son escu sessi si le dreca amont desor son piz que nel connoisent li chevalier de pris Le destrier broche Olivier le hardi en la quintaine .I. riche cop feri les escuz perce et les haubers ronpi et les estages a froisiees par mi tout en un mont enz el pre abati De l autre part son espie recoilli de joster s est molt bien amaneviz Charles le voit si a sengnie son vis reclama Deu qui onques ne menti Pere puissant par la teue merci einz de mes euz si riche cop ne vi Pongniez Francois demendez qui feri s il est frans hom sodoier ou marchis tout mon tresor li soit a bandon mis Dient Francois Tot a vostre devis A ces paroles s en desrengent teus .X n i a celui ne soit duc ou marchis Qant Olivier choisi ses ennemis n est pas merveille s il fu espooris Torne la resne del bon destrier de pris brandi la hante au confanon assis fiert le premier qui le suit ademis l escu li perce et le hauberc treliz par mi le cors son espie li a mis mort l abati ne li pot fere pis Vienne escrie Deus aidiez seint Moris C est Olivier qui n est pas vostre amis Nies sui Girart et Hernaut le marchis si est mi peres Renier li dus gentis et ma suer est bele Aude o le cler vis Ou ies Rollans bon chevaliers hardiz De granz batailles et d estors t aatis Par moi te mende li vasaus Aimeris que envers toi n a encor pas pes quis de son cheval que ier matin li tolis vangera s en se longuement est vis Rollant s enbronche et Ganes s en est ris Et Deus dist Charles voirs rois de Paradis bien a .VII. anz passez et aconpliz que j asegie Girart en cest pais ne connui mes Olivier le marchis Ore est par lui si mes oz envaiz devant mes euz m a tel baron ocis que ne vosise por tot l or de Paris Pongniez apres franc damoisel de pris Gardez qu il soit et retenuz et pris si qu il n i soit ne bleciez ne maumis A cez paroles en pongnent .C. et dis Francois s escrient Monjoie seint Denis Premier l enchauce Entiaume de Sanliz bien fu armez sor le destrier de pris d auberc et d iaume de roit espie forbi Devant les autres en l anchauz s estoit mis c estoit molt grant folie Devant les autres le tret a .I. archier le suit Entiaume arme seur le destrier A voiz s escrie Ore avant chevalier Prenez Girart que j ai pris Olivier Des traitors q an porroit .I. baillier tot l or del mont ne lor avroit mestier panduz ne fussent come larron fossier De la parole pesa molt Olivier or nel leroit por les menbres trenchier qu il ne li voist fierement chalangier Brandi l espie a guise d omme fier ferir le vet sor l escu de cartier desoz la boucle li fist fendre et percier le blanc hauberc deronpre et demaillier dedanz le cors li fist l acier bangnier Enpaint le bien si l a jus trebuchie le cong de l iaume fist en terre fichier outre s en passe a loi de bon guerrier qu il ne dengna le bon cheval baillier Envers le mort s en prist a reperier si li a dit .III. moz par reprovier Ne vos movez lecheor pautonnier Mar i venites la quintaine drecier molt vilain gaje vos covient a lessier en iceste contree Vers Vienne est Olivier retorne qant ot Entiaume ocis et afole Charles le voit pres n a le sans desve ou voit ses homes si lor avoit mostre Seignor baron avez vos esgarde Fu ainz mes rois de la moie bonte qui par .I. home fust ainsi vergonde Pongniez Francois n i ait plus areste gardez que ja ne vos soit eschape Biau nies Rollant del retenir pensez A ice mot s an sont tel .C. torne qui tuit estoient prince ou conte chasse Oiez seignor Deus vos croise bonte quel enconbrier et quele aversite avint au conte Olivier le menbre au pie d un tertre lez .I. gaste fose li est chaoiz ses destriers abrivez et Olivier est a terre versez Es vos Francois entor lui asenblez Deus dist li cuens biaus rois de majestez Ber seint Morise vostre home secorez Ferrant saut sus Olivier est montez par l arestueil a l espie recovre Francois le voient de joster apreste Mal soit d icel qui vers lui soit torne ne mes .I. conte de Borgongne estoit ne Voit le Olivier ne l a pas refusse brandi l espie tel cop li a done l escu li perce l auberc li a fause par mi le cors li mist l espie carre tant com tint l ante l a jus acravente Cil de Vienne issent del bois rame por lui secorre vienent molt abrive a esperon vint Girart le menbre Desoz Vienne en un chanp grant et le sont Viennois et Francois encontre La fu Hernaut li preuz et l alosez cil de Biaulande qui tant fu redoutez et Aymeri li vasaus adurez la n espargna li plus juennes l einnez ne li plus bas le haut prince chase a icele asenblee Qant remontez fu li cuens Olivier l escu au col el pong l espie d acier li dus Girart le venoit ostagier Devant les autres le tret a un archier ala ferir dus Naimes de Baivier sor son escu .I. grant cop et plenier Naimes fiert lui a guise d omme fier des forz espiez font les hantes brisier outre s en pasent li bon corant destrier La veisiez .I. estor comencier qui dut torner a mortel enconbrier Li dus Rollant a choisi Olivier Droiz enpereres dit Rollant le guerrier veez vos la arme ce chevalier a l escu vert a ces bendes d or mier a cele ensengne qu est fete de cartier ou vos veez cel ange baloier Si m eist Deus c est li cuens Olivier devant Vienne n a meillor chevalier n en tote la contree Droiz enperere dit Rollans entendez veez vos la ce chevalier arme a cel escu qui est a or bendez C est Olivier qui de Genvres est nez fiz est Renier qui tant est redoutez dedanz Vienne nen a plus alosez Or ne leroie por l or de .II. citez que envers lui ne soie hui esprovez et si savrai com est grant sa fierte et com il est as armes redoute Biau nies dist Charles en non Deu non ferez car li dui mieudre seriez asenblez qui soient pas en la crestiente Et se ensenble estiez ajoste il covendroit que l un en fust mate james el siecle ne seroit restore Ne vos chaut sire dit Rollant l adure je nel leroie por l or de .II. citez c a coardisse me seroit atorne Ou l irai querre qant je l ai ci trove Au fers des lances serons hui esprove li quieus que soit covient estre matez Biau nies dit Charles a Damedeu alez si vos deffande ne soiez afolez ne Olivier ne morz ne desmenbrez Einz li doint Deus que a son parente puist reperier toz seins en la cite A ces paroles s en est Rollans tornez le destrier broche des esperons dorez vers Olivier s en vet toz abrivez Totes les dames de la bone cite furent issues les jostes esgarder Venue i fu bele Aude o le vis cler une pucele qui molt avoit biaute Ele ot le jor .I. mentel afuble un pou fu cort si li avint assez tries ses espaules le let aval coler li premiers chies l en avint enz el pre Plest vos oir com est grant sa biaute Un chapelet ot en son chief pose a riches pierres qui gietent grant clarte blont ot le poil menu recercele les euz ot verz come faucon mue et le viaire si fres et colore come la rose que l en qeut en este et blanches meins et les doiz acesmez les hanches bases et les piez bien formez La char ot blenche plus que n est flor de pre le sanc vermeil li est el vis montez il n ot si bele en la crestiente Rollant la prist forment a esgarder et en son cuer forment a gouloser tant s i entant li vasaus adurez qu il an oblie d Olivier le joster Le destrier broche vers Audein est alez si l a sessie qui l an voloit porter en l ost le roi en son demoine tref la en feist totes ses volentez Mes la pucele comenca a crier Olivier frere ou estes vos alez Ja m en veut ci li nies Charle porter en l ost le roi por mon cors vergonder: moie ert la honte vos sera reprove Mes ja ne place au roi de majeste que de mon cors soit fete tel vite Olivier l ot cele part est ale ou voit Rollant si l en a apele Sire nies Charle ainsi vos oi nomer vostre merci ma suer lessiez ester .IIII. arcevesques avra a l espouser s i ert Hernaut qui tant fet a loer et dant Renier de Genvres sor la mer li dus Girart qui tant fet a loer et Aimeri li gentis et li ber et ge meismes se la vos veil doner Rollant l antant molt s en est airez Vassal fet il lessiez vostre vanter Portere l en qui q an doie peser en l ost le roi ja nen iert trestorne La en ferai totes mes volentez s il vos en poise bien m en puis consirrer Dit Olivier Lessiez vostre vanter de seul ce dire fetes molt a blamer Par cel apostre que l en doit aorer se fust .I. autre qui de ce fust ventez je li deise Vassal vos i mentez Mes se c est chose que l en voilliez mener vos l estovra chierement conparer bataille avroiz se atendre l osez Et dit Rollant Ce fet a creanter Traiez vos la lessiez moi de ce pre Dit Olivier Volentiers et de gre Vos estes dus et ge sui cuens clamez iceste joste ne fait a refuser car enbedui somes prince chase Les destriers brochent des esperons dorez les bons escuz ont devant aus tornez tant com chevaus lor puent rendoner s antrelessierent aval par mi les prez Granz cous se donent sor les escuz listez les hantes brisent des espiez noielez fors haubers ont que nes puent fauser outre s en pasent que nus n en est versez Voit le Olivier a pou qu il n est desvez qant n abati dant Rollant au joster Tret Hauteclere dont li brans luisoit cler et fiert Rollant sor son hiaume jeme que flors et pierres en fet jus devaler et le bon hiaume li fist fandre et casser De ce grant cop fist le duc estoner se Deus ne fust et ses seintes bontez et la grant coife del blanc hauberc safre Rollant eust a ce cop afole Le cheval chiet ne pot le cop porter qant se relieve s est en fuie tornez Teus .IIII. arpanz est Rollant galopez que il ne sot quel part il fu alez ou vers Vienne ou vers l ost retornez Einsi rescout dant Olivier le ber sa suer Audein la bele o le vis cler au tornoi soz Vienne Li dus Rollant qant s est aperceuz de mautalant est tainz et irascuz por le grant cop qu il avoit receu Einz mes par home ne fu si confondu De ci a l ost est son cheval coru et l enperere est cele part venu Del chief li oste l iaume cas et fendu qant sein le trueve liez et joianz en fu Biau nies dit il grant poor ai eu que tu ne fusses ocis et confondu Par cel apostre por qui Deu fet vertu par plusors foiz m a Girart irascu se geu puis prendre au forches ert pendu voiant ceus de Vienne Molt fu Charlon dolanz et abosmez por Olivier qui si les ot grevez Atant es vos un chevalier arme cuens de Berri et de Borgonne ne filleu lou roi et de son parente bien puet en ost .C. chevaliers mener por sa proece por son pris aloser Lasche la resne lait le destrier aler fiert Olivier en l escu au joster desoz la bocle li fait si estroer c un esprevier poist par mi paser Voit le Olivier n ot en lui c airer par mautalant en a pris a jurer de Viennois seint Morise le ber einz que i muire sera chier conpare Garin li a un espie aporte a .III. clous d or .I. confanon ferme si s apareille c a Lanbert veut joster Es vos bele Aude corant par mi le pre par les estaches a le mentel leve tries ses espaules le let aval coler Entre .II. rans vait a Lanbert parler Dit l un a l autre Baron or esgardez Veites mes fame de tel biaute Qui ceste avra a moillier et a per bien porra dire de bone eure fu ne Et la plus bele n i a plus demore Lanbert sessi par l escu d or bande a lui le sache et il l a encline La demoisele l en a aresonne Frans chevaliers lesiez la joste ester vers Olivier mon chier frere menbre Randez vos pris a moi vos en venez dedanz Vienne bone prison avrez et en mes chanbres le venir et l aler et avec moi le rire et le gaber Une pucele de molt haut parente vos i ferai s il vos plest amener si en feroiz totes vos volentez Mal ait por vos l avra plus en vilte por vostre amor la ferai marier Bele fet il tout ce lessiez ester je nel feroie por les menbres coper c a coardisse me seroit atorne Vil m en tandroit mon riche parente c une pucele m en avroit pris mene Aus fers des lances nos covient conpaser li queus que soit covient estre matez Sire fet ele dont n en quier plus parler s il vos mechiet n en faz mie a blamer Trest soi arriers por la joste esgarder Li cuens Lanbert fu chevaliers menbrez brandist la hante dont le fer fu carre le destrier broche des esperons dorez fiert Oliver sor son escu dore que tout li a et fandu et troe fort fu l auberc qant il ne l a fause et le vassal molt fier qant n est verse Mes Olivier le ra bien asene sor son escu que il li a troe en mi le piz li a tel cop done janbes levees l abati enz el pre Puis trest l espee seure li est ale ja l eust mort ocis et demenbre qant il li crie Frans hom ne m ociez Vez ci m espee je me rant pris clamez Dedanz Vienne avec vos m en menez au duc Girart vostre oncle me rendez Raencon grant s il vos plest en avrez .IIII. somiers d or et d argent trousez et .C. haubers et .C. hiaumes jemez et .C. espiez et .C. escuz listez .C. palefroiz .C. destriers sejornez .C.ors.C. viautres lieparz enchaennez et plus avoir se vos prendre en volez car molt sont granz les moies richetez Dit Oliviers Dont seroiz bien gardez Dedanz Vienne seroiz bien ostelez n en istroiz mes devant .II. mois pasez Girart mes oncles m en savra molt bons grez de si bon oste que li avrai mene Par le nasel de l iaume l a cobre .XX. chevaliers a des suens apelez Menez le moi en la bone cite Et il si firent qant il l ot comende Et il s en pasent el baie sont entre Charles le voit pres n a le sans desve si le mostre a ses homes Veez barons dit Charles au fier vis Les genz le conte en moinent Lanbert pris Mes filleus est par foi le vos plevis grant poor ai que il ne soit ocis Pongniez apres frans barons seignoriz eincois qu il soit dedanz la cite mis Se Deus donoit que l un des lor fust pris por lui ravroie dant Lanberc le marchis A ces paroles i pongnent .C. et dis Francois s escrient Monjoie seint Denis Et Viennois L ensengne seint Moris Et Biaulandois Hernaut et Aimeris Genvres escrie Olivier li gentis Ce jor sont molt Viennois esbaudiz desor Francois sont a force ganchi La veisiez .I. molt fier chapleiz d espiez de lances font voler les escliz les forz escuz font troer et croisir et decoper ces verz hiaumes bruniz fierent et chaplent des brans d acier forbiz En la grant presse el plus fort chapleiz estoit remes Olivier li marchis se Deus n en panse qui en la croiz fu mis eincois le vespre avra mestier d amis Il garde a terre vit .I. espie bruni lessie l i ot un chevalier ocis il s abessa meintenant l a sessi de joste fere molt bien s amanevi Francois le voient de bataille aati Mau soit de cil qui retornast vers lui fors seulement .I. chevalier hardi nez de Bretengne cuens estoit seignoriz Voit le Olivier .I. grant cop le feri l escu li perce le hauberc li ronpi par mi le cors l espie li enbati le coing de l iaume en terre li feri Vienne escrie Deus aidiez seint Moris C est Olivier qui n est pas vostre amis D autre part garde si a Ogier chosi qui fierement venoit desor Flori Voit le Olivier tot droit a li ganchi il s apareille car joster veut a li Charles le voit a Rollant l avoit dit Veez biau nies por le cors seint Remi ja verroiz joste onques tele ne vi Qui ert li mieudres Sire Deus Jesu Criz Et dit Rollant En Olivier me fi c ainz de mes euz tel chevalier ne vi ne mieuz requiere son mortel ennemi Et Deus dit Charles mon baron me gueri que il n i soit afolez ne maumis Et nos sauvez Olivier le hardi si que raler s en puist et sains et vis dedanz Vienne la dont il vint ici Li dus Ogiers a Olivier choisi brandi la hante del roit espie forbi gran cop li done sor son escu voti desoz la bocle li a fret et croisi fort fu l auberc que maille n en ronpi et li vasaus fu preuz qant ne chei Mes Olivier refiert lui autresin sor son escu que tot le porfandi tel cop li done devant en mi le piz par son la croupe de cheval l abati li coinz de l iaume en la terre feri Olivier fu fiers et amaneviz prist le destrier dont le Denois chei Garda sor destre .I. damoisel choisi Poinces ot non nez fu de son pais n avoit encore pas .I. mois aconpli c adoube l ot dant Girart le marchis Il li a dit Vien avant biaus amis tien je te dong ce bon destrier de pris par droite force l ai retenu et pris Va t an arrieres la dont tu ci venis Sire fait il la vostre grant merci He las dolant le cheval por c a pris Car puis en fu detranchiez et ocis Grant fu la noise et li huz et li criz qant perduz fu li destriers arrabiz et Viennois se sont es portes mis Rollant chevalche corrociez et marriz lez les murs garde si a Poincon choisi ou il chevalche le bon destrier de pris qui fu Ogier le franc duc posteis Le cheval broche si a l espie brandi par droite force celui Poince feri grant cop li done desor l escu voti desoz la bocle li a fret et croisi et le hauberc derot et desarci par mi le cors li mist l espie bruni enpaint le bien del cheval l abati Par les .II. resnes a les destrier sessi au bon Denois meintenant le rendi Et Viennois se sont es portes mis ferment les portes lievent ponz torneiz Bele Aude estoit desor le mur antif ou voit Rollant si li crie a haut cri Vassal fet ele mal nos avez bailli un chevalier nos i avez ocis s ancore i fust dant Girart le marchis et Olivier mes freres li hardiz nel touchisiez por tot l or de Paris Rollant l antant si enbronche le vis Li jorz s en vait Francois sont departi droit a son tref chascun s en reverti A ses herberges vait Charles au fier vis et en Vienne fu Girart li marchis En un des porches mon seignor seint Moris la desarmerent le conte de Berri La vint Girart li frans dus seignoriz Lanbert li tent son branc d acier forbi a lui se rant del tot en sa merci Adonc li ostent le vert hiaume bruni et de son dos le blanc hauberc tresliz il remest sengles el bliaut de samiz camoisiez fu de l auberc c ot vesti entre les autres senbla bien home pris Aude le voit nel mist pas en oubli un mentel riche a son col li a mis par la mein destre la pucele l a pris si l en mena el pales seignoriz Sor une coste joste li l a assis si le conforte la pucele au cler vis Sire Lanbert ne soiez trop pansis por amor Deu qui onques ne menti li dus Girart est chevaliers hardiz nobles vasaus corajeus et gentis de haut paraje et enforciez d amis Ne vos querra par foi le vos plevis chose dont vos soiez trop apovriz Dame fet il la vostre grant merci N avroiz essoine en si lontieng pais por coi jeu sache et soie sains et vis ne vos secore a .II. M. fervestiz a cleres armes a destriers arrabiz Sire fet ele la vostre grant merci L eve demendent au mengier sont assis el palais de Vienne L eve demendent s asient au soper Girart s asist et Olivier le ber et dant Hernaut de Biaulande sor mer et li barnajes qui molt fist a loer li cuens Lanbert et bele Aude au vis cler Aval la sale sist li autres barnez Des riches mes ne vos quier deviser qui vost mengier avoir en pot assez mes dant Lanbert n an pot onques gouter Li dus Girart le prist a apeler Sire Lanbert mengiez et si buvez n est mie vostre qanque vos esgardez Respont Lanbert Sire vos que savez Por vostre niece croi ge que dit l avez s ele est pucele je sui juennes assez ne par paraje n en doi estre tornez ne por avoir ne por grant richetez ne doi ge perdre a estre mariez Se ge n ai lui i sont fames assez n est pas si bone com Deus me puet doner Et dit Girart Tot ce lessiez ester Une autre chose vos vodrai demender s a Charlemene me poez acorder einz demein vespre vos en lerai ester par bons ostajes se les volez livrer Et dit Lanbert Ce fet a mercier Tant com vodroiz de mon avoir prenez .XXX. somiers vos en ferai trouser et plus encore se avoir en volez Assez sont granz les moies richetez Olivier l ot seu prist a regarder Girart son oncle en prist a apeler tout coiement qu il ne fu escoutez Sire Girart dit Olivier le ber oites mes prisonnier si parler De cest avoir dont vos ici oez ja n en avroiz .II. deniers moneez Randez le Charles plus gent plet en avrez molt sera fel se n estes acordez Girart l entant sin a le chief crolle Biau nies dit il si com vos comendez je ferai totes les vostre volentez Qant ont mengie et beu a plante les napes traient sergent et bacheler Cil chevalier sanz plus de demorer a lor ostieus s en vont por reposser Li dus Girarz nel mist en oublier en mi la sale fist .I. lit aprester de riches coutes et de dras d outremer Lanbert i font couchier por reposer La pucele Aude ala a lui parler Sire Lanbert soiez aseurez por amor Deu ne vos desconfortez Li dus Girart est chevalier menbrez et vasaus nobles et de guerre adurez si est d avoir menanz et asazez ne vos querra dont soiez trop grevez Bele fet il ce fet a mercier molt belement conforte m i avez Je vos plevis la moie loiautez n avroiz besong en si lontieng resne ne vos secore a .III. mile adoubez Sire fet ele ce fet a mercier Dedanz sa chanbre s en prist a retorner Li dus Girart nel mist en oblier en mi la sale fist .I. lit aprester .XIIII. cierges i a fet alumer .X. chevaliers fet vestir et armer qui tote nuit font le conte garder juqu au demein que il dut ajorner qu il ne lor puist en nul sans eschaper Qant au matin oient les seinz soner la messe vont li baron escouter li dus Girart et ses riches barnez et Olivier et Lanbert l adure dame Guiborc et Aude o le vis cler Qant le servise fu dit et definez del mostier issent el palais vont monter au mestres dois s est Girart acoutez li sires de Vienne La messe est dite Girart ist del mostier au mestres dois vait li dus apoier Dont l en apele Lanbert le Beruier Sire Girart dit Lenbert le guerrier comfaitement vos estes conseilliez Par quieus ostajes me leroiz ostagier De l ost lou roi vos en ferai baillier des hauz barons qui mieuz font a proisier Dit Oliviers De folie plaidiez par cel apostre que quierent chevalier je ne vodroie por l or de Monpellier q an eusons la monte d un denier Se vos servez Charlemene au vis fier de ce ne doit nus frans hom merveillier car son seignor doit en par tot aidier puis que il tient de lui terres et fiez as cleres armes au bon tranchanz espiez le doit servir qant il en a mestier mes que ne soit a violer mostier n a povre gent rober ne essillier car Damedeu ne doit nus guerroier q an petit d eure le feroit trebuchier Respont Lanbert N estes mie lanier molt par fu sages qui vos dut enseignier Bele suer Aude dit li cuens Olivier aler s an doit Lanbert le Berruier De l autre part doit il avoir loier un riche don ou un garnement chier que il s en puist en l ost le roi proisier Sire fet ele bien fet a ostroier Tel li ai fet ce cuit apareillier qu il n a meillor de ci a Monpellier ne a roi ne a conte La pucele Aude fu cortoisse et senee molt tost s en est de la sale avalee a l einz qu el pot est en sa chanbre entree A un escrin est la pucele alee ou meint ensengne avoit de paile ovree ele en a fors la plus riche gitee a riches pierres tot environ orlee et a argent et a fin or bandee Cele ensengne a la pucele aportee dedanz la sale ou ele est retornee devant Lanbert l avoit developee a grant merveille fu de toz esgardee De colors fu plusors enluminee il n est apostre c est verite provee dont il n i ait image painturee et de bele Aude la pucele senee i fu la forme de fin or bien ovree Nus hom qui l ait en bataille portee mar doutera ne orgueil ne posnee ne traison que nus ait porparlee A dant Lanbert l a bele Aude donee et cil la prant si l en a merciee en une hante a l ensengne fermee puis en monta en la grant tor carree a ceus de l ost a l ensengne mostree sus au fenestres l avoit desvelopee bien l ont de l ost li baron esgardee Rollant la voit s a la color muee a sa meisnee l a entor lui mostree Vez de Lanbert franche gent ennoree il et bele Aude ont la pes porparlee Li cuens Lanbert en a eu sodee de cele part m a feru sanz espee s or li avoit li dus Girarz donee si remendroit la guerre Nies Olivier dit Girart le guerrier conreez moi Lanbert le Berruier Rendez li robe et armes et destrier qu il n i perde vaillant .I. seul denier de tot l avoir que ill aporta ier Tout son hernois li fetes rendre arrier et plus encore si le dengne baillier Volentiers sire dit li cuens Olivier Il li aportent sanz plus de deloier ses garnemenz et son hernois plus chier el dos li vestent le blanc hauberc doblier et puis li lacent .I. vert hiaume a or mier Girart li tent son riche branc d acier li cuens le ceint a son flanc senestrier L en li amoine son auferrant destrier li cuens i monte par son senestre estrier Au col li pandent .I. escu de cartier et puis li tandent .I. roit tranchant espie ou il ont fet le confanon lacier que li dona bele Aude o le vis fier Sire Lanbert dit Girart le guerrier je vos clain quite sanz or et sanz denier O vos ira mes chiers nies Olivier por Deu vos pri qui tot puet jostissier que il n i ait honte ne anconbrier Et dit Lanbert Ja ne en estuet plaidier Par ce Seignor qui tot a a jugier n a home en l ost si orgueilleus ne fier s il i voloit folie comencier ne li feisse par estouvoir lessier ou se ce non il le conparoit chier fors seul le roi qui France a a baillier et son neveu dant Rollant le guerrier car vers ces .II. n oseroie plaidier Et Olivier s en vet apareillier en son dos vest .I. blanc hauberc doblier et par desus se fet estroit lacier d un chier bliaut q an ot fet entaillier a son col pant .I. riche mentel chier vint au cheval si monte par l estrier De la vile issent andui li chevalier de ci a l ost ne se vodrent targier por dire les noveles Qant la bele Aude en vit son frere aler molt tendrement comenca a plorer Oliviers sire dit la bele au vis cler a ce Seignor vos puise comender qui en la Virge se dengna aonbrer et en la croiz lessa son cors pener qui vos guerise de mort et d afoler que Charlemenes ne vos puise grever ne dant Rollant qui tant fet a douter Son escuier Garin fet apeler Amis fet ele a moi en entandez totes les armes vostre seignor prenez tout meintenant apres lui les portez s il a besoing qu il i puist recovrer si m eist Deus bon loier en avrez Dame fet il si com vos comendez Il prist ses armes atant s en est tornez si coiement en est en l ost entrez desoz .I. arbre qu est foilluz et ramez ne le connut nus hom de mere nez de l ost le roi de France Dedesoz l arbre fu tapiz l escuier et tint les armes au preu conte Olivier baillera lui se il en a mestier Devant le tref Charlemene au vis fier descent a pie Lanbert le Berruier ensenble o lui le marchis Olivier Son espie vet devant le tref fichier li cuens Lanbert qui molt fet a proisier la bone ensengne fet au vant baloier que li dona bele Aude o le vis fier Molt l esgarderent li baron chevalier sor touz les autres dant Rollant le guerrier si la mostra au conte Manesier Dit l un a l autre Qui est ce chevalier Respont Rollant Lanbert le Berruier sa pes est fete vers Girart le guerrier acointez s est de bele Aude au vis fier et si m a fet de s amor estrengier Veites onques sire dit Manesier la pucele Aude qui tant fet a prisier Oil voir sire a celer nel vos quier qant soz Vienne alai por tornoier Defors les murs vins por esbenoier misse l avoie sor mon corant destrier bien la portasse en ceste ost sanz dengier qant i sorvint ses freres Olivier qui la rescout au branc forbi d acier Sire Rollant dit li cuens Manesier Aude est molt bele ja nel vos quier noier Ne sai pucele qui mieuz fet a proisier A ces paroles entrent li dui guerrier el tref le roi qui France ot a baillier Dit l un a l autre Qui est ce chevalier qui nos amoine Lanbert le Berruier Respont qui set C est li cuens Olivier cil qui nos fet les cenbiaus comencier et chascun jor nos ocit chevalier Qui or nel sert il ne vaut .I. denier Plus de .II. C. l en corent a l estrier Garin li enfes a sessi le destrier le fiz Achart de la val de Rivier ses cousins ert si le dut avoir chier Atant es vos juqu a .C. chevaliers de ceus de l ost qui molt font a proisier devant le roi moinent le mesagier le tref enpli de meint riche princier por escouter le mesage Olivier Devant le roi Charlemene au vis fier vait dire son mesaje Devant lou roi Charle de Seint Denis vint tout a pie Olivier le marchis. Il desfubla le riche mentel gris arrieres lui l a li damoisiaus mis cheoir le lait ne li chaut qui l ait pris Devant le roi s est a genoillons mis et puis salue Charlemene au fier vis Cil Damedeu qui pardon fist Longis gart Charlemene le roi de Seint Denis et si guerise dant Girart le marchis le mien chier oncle qui tant est posteis Droiz enperere ore oiez que j ai quis li dus Girart qui ja fu vostre amis vos rant tout quite dant Lanbert le marchis Por trestot l or qui soit juqu a Paris nel tenist il envers vos .IIII. dis qu il est vostre hom et jurez et pleviz si tient de vos sa terre et son pais Gardez bons rois n aiez vers lui mespris par coi il soit li vostres ennemis Alez en France a Reins ou a Paris o vos ira dant Girart le marchis en sa conpangne .M. chevaliers de pris que tant l en doit sa terre et son pais servira vos tout a vostre devis Charles l antant si enbronche le vis puis li respont ausi com tot pansis Come as tu non jovenciaus biaus amis Olivier sire dit li vasaus de pris Je t an croi bien dit Charles au fier vis di ton mesage et molt bien le fornis et puis t en va la dont tu ci venis Volentiers sire dit li frans cuens gentis levez le chief si m esgardez el vis si vos dirai auques de mon avis nel lerai por nul home Droiz enperere dit li cuens Olivier je vos rant quite Lanbert le Berruier qu il n a perdu ne armes ne destrier ne autre chose qui vaille .I. seul denier Girart mes oncle m i a fet envoier par moi vos mende a celer nel vos quier que a grant tort le fetes guerroier et son pais gaster et essillier Mes s il vos plest alez en France arrier o vos ira dant Girart le guerrier en sa conpangne .II. mile chevalier sevira vos de gre et volentiers s il a mesfet prez est de l adrecier Vasal dit Charles molt m a fet corrocier dolanz serai se ne m en puis vengier Grant est cist sieges merveilleus et plenier si a dure bien .VI. anz toz entiers et si vilment le me rouves lessier Par ce Seignor a cui l an doit proier einz que m en parte ja nel te quier noier ert si aquis dant Girart le guerrier que devant moi vendra ajenoillier nu piez en lange por la merci proier la sele el col qu il tendra par l estrier d un roncin gaste ou d un povre somier Ce n iert ja certes sire dit Olivier car trop est fier dant Girart le guerrier et de puissant lingnaje Dit Olivier li preuz et li senez Droiz enperere envers moi entendez si m eist Deus li rois de majestez touz mi mesages si vos sera contez de chief en autre que l orra cist barnez bien veil quel sachent cil chevalier menbrez Vienne fu mon aiel ce savez et mon tresaive c est fine veritez Mes aieus fu dus Bueves li barbez plus de .C. anz tint quite cest resne einz rois de France ne l an mostre fierte Or m est avis que grant tort en avez qant vos mon oncle volez desheriter pechiez feroiz se l an desheritez Par cel apostre c on quiert en Noiron prez la dedanz Rome ou il est aorez einz que soiez en Vienne otelez ne c aiez prises les mestres fermetez serai a nage outre la mer pasez a un mien oncle qui est rois coronnez c est Afloaires qui molt a de fiertez Ne me faudra por home qui soit nez chargera moi .XX. mil homes armez ses amenrai ca outre en cest resne s avrai toz catre ce est la verite les fiz Garin qui tant sont redote Qant ensenble ert li riches parentez .XL. mil seromes adoubez chevaucherons par fine poostez de ci en France sor les chevaus montez ne vos lerons ne chastiaus ne citez ne tor de pierre ne riche fermetez que tuit ne soient par terre craventez Fous dit le rois trop te ventes assez Ceste ventence ne pris .II. oes pelez A ces paroles que vos dire m oez dedanz le tref en est Rollant entrez et avec lui sont li per lez a lez Delez lou roi s est Rollant acoutez Hui mes orroiz otrajes et fiertez par c Olivier et lui furent armez en l ille soz Vienne Ce dit Rollant a la chiere hardie Droiz enperere forment vos contralie cist vassaus ci ce est grant estoutie Olivier va Tu pledes de folie Veus tu desdire par ta grant venterie li dus Girart qu il n ait sa foi mentie envers lou roi cui il l avoit plevie Dit Olivier Nel proveriez mie Pleust a Deu le fiz seinte Marie la vostre foi me fust ore plevie que le matin par son l aube esclarcie desoz Vienne la fort cite garnie vandroiz en l ille tot seul sanz conpangnie trestoz armez el destrier de Sulie et conbatrons a l espee forbie je por Girart a la chiere hardie vos por Charlon a la barbe florie Rollant l entant toz li sans li fremie honte ot por le barnaje Sire Olivier dit Rollant l adurez li dus Girart dont n est il parjurez envers Charlon qui rois est coronnez cui il plevi et foi et loiautez Ne doit tenir marches ne richetez donjons ne viles chastiaus ne fermetez foir l estuet en estrenge resnez outre la mer au paiens deffaez Sire Rollant dit Lenbert l adurez si m eist Deus molt grant tort en avez Li dus Girart est chevaliers menbrez et vasaus nobles et de guerre adurez et Olivier est chevaliers provez Se estiez a tant qant en ces prez ja de contraire n i avroit mot sone Dit Oliviers Onques plus n en parlez li cuens Rollant si nos parole assez mes de plus fere n est pas entalentez Sire Rolant envers moi entendez estes vos fame qui si tencier savez La vostre foi qer la me creantez que soz Vienne dedanz l isle vendrez le matinet qant soleil ert levez n i menroiz home qui de mere soit nez for le destrier sor coi seroiz armez et conbatrons as espees des lez je por Girart le franc duc ennore vos por Charlon qui est rois coronnez Puis que serons seul a seul adoube si ait l annor qui Deus l a destine Rollant l antant molt s en est aire ferir le vost mes il s est porpanse si le touchoit qu il en seroit blamez bien doit mesaje dire ses volentez De ce fu molt Rollant amesurez qu i ne vost chose fere dont fust blamez Il trest son gant qui a or fu parez puis vint au roi si li a presante son gaje done voiant tot le barne vers Olivier qui est vasaus provez par tel covant q andui seront armez en la grant ille desoz Vienne es prez por fere la bataille Oi avez que prise est l aatie devant le roi de France la garnie et par devant la riche baronnie par tel covant et par tel arramie que Rollant claime Vienne la garnie por Charlemene a la barbe florie et Olivier a la chiere hardie deffant Girart a l espee forbie qui vers le roi ne pansa felonnie Et s il conquiert en bataille fornie le duc Rollant ou tant a baronnie il s en riront en France la garnie ne de Vienne ne clameront mes mie Et s Olivier est conquis en sa vie li dus Girart qui tant a seignorie lera Vienne la fort cite garnie qu il n en tendra vaillesant une alie einz s en ira en Puille Si m eist Deus dit li cuens Olivier grant pechie fetes par Deu le droiturier et grant orgueil a celer nel vos quier qant si volez Vienne chalengier et de sa terre le duc Girart chacier Ja se Deus plest qui tot a a jugier ne l an todroiz vaillisant .I. denier tant com ge puisse monter sor mon destrier Je me fi tant en Deu le droiturier se nos venons a l estor comencier que bien le cuit envers lui derrenier se Deus me veut par sa merci aidier Mes une foiz vos veil encor proier ceste bataille feisiez respitier si feissiez cest grant ost dessegier et ralisez en douce France arrier Je et Girart mon oncle que j ai chier irons avec de gre et volentiers la servirons Charlemene au vis fier en toz besong com seignor droiturier Se ce ne fetes par le cors seint Richier james nul jor ne m en orroiz pledier einz vos defi ja nel vos quier noier de Damedeu qui bien vos puet plesier et vostre orgueil abatre et trebuchier Rollant l antant le sans cuide changier ferir le vost mes ne l ose touchier Li autre per qui le virent irier par le braz destre le menerent arrier Dedanz son tref s ala li dus couchier Devant le roi fu remes Olivier la se desrene com vaillant chevalier voiant tot le barnaje En piez se drece Hernaut de Mongencon en haut parla a guise de felon Droiz enperere entendez ma reson se m en creez par le cors seint Simon pandre feroiz as forches ce gloton Et le matin sanz plus d arestoison ceste cite de Vienne asaudron et dant Girart par force conquerron n avra pooir c a force ne pregnon Qant l avrons pris si n ait ja raencon que n en faciens jotisse Qant Olivier s oi si menacier de pandre au forches come larron fossier et qant ill ot de Girart le guerrier que il menacent de la terre a chacier tel duel a le sans cuide changier se ne s en venche ne se prise un denier Envers Hernaut se prist a aprochier pas avant autre en guise d ome fier par les cheveus le vait a lui sachier si durement qu il le fist enbronchier hauce le pong tel cop li vait paier que le mestre os del col li fet brisier par mi la bouche li fet le sanc raier encontre tere le fet jus trebuchier Qant Aimart vit son oncle blecier encontre terre pener et traveillier savoir poez n ot en lui c airier Grant aleure s en cort vers Olivier par les .II. tenples le vet a lui sachier si roidement tout le fist enbronchier Deus dit Lanbert or puis ge trop targier Isnelement a tret le branc d acier fiert Aimart ne le vost espargnier delez lou roi en fist voler le chief et lez son oncle le fet mort trebuchier Charles le voit n i ot que corrocier a voiz s escrie Prenez les chevalier Se il muevent ses alez detranchier car trop m ont fet grant honte Droiz enperere dit Lanbert l adurez si m eist Deus molt grant tort en avez Mal ait la cort ou l en n ose parler et ou l en n osse son mesage conter Mal soit de roi qui ne veut escouter Ja fui ge pris einsi com vos savez devant Vienne qant g i alai joster a Olivier que vos ici veez Par droite force en lui fui leanz menez richement fui serviz et ennorez Onques en France ne la ou ge fui nez ne fui ge mieuz en ma vie ostelez Or m a Girart si fet quite clamer que n i perdi .II. deniers monneez venuz m en sui einsi com vos veez sor mon destrier que j avoie mene et de mes armes garni et conreez Ci m amena Olivier li menbrez bien deust estre por moi aseurez Por son servise a or laides bontez qant si tost fu devant vos renponez de ces glotons qui aient .C. dahez Se li aide n en doit estre blamez A ces paroles s est en haut escriez Mi chevalier ou estes vos alez .V . C. s escrient Vez nos ci aprestez et de noz armes garniz et conreez Ce dit li cuens Deus en soit aorez De mon pais vos ai toz amenez je vos coment si chier com vos m avez et fiez et terres qanque de moi tenez se j ai besong que vos ne me fausez n a Olivier que vos ici veez par cui je sui de prison eschapez Et cil respondent Ja mar en douterez ne vos faudrons por estre desmenbrez Einz puis n i ot Francois tant fust ossez qui vers Lanbert soit meuz ne crollez einz bessa la folie Qant Olivier se vit si entrepris ja ne cuida qu il en eschapast vis Grant fu la presse des chevaliers de pris de totes parz l ont asailli et pris tout li descirent son bliaut de samiz et par desoz son bon pelicon gris Voit le Olivier dolanz fu et marriz Il passe avant si a un peson pris a coi le tref fu tanduz et assis il l an arrache come mautalantis ronpent les cordes s a tot a terre mis L estache prent Olivier li gentis qui il consut bien est de la mort fis Voit le Lanbert a escrier l a pris Et car t an va Olivier li marchis Par moi ne puez plus estre garentiz Je ne vodroie por tot l or de Paris que tu i fusses afolez ne maumis Dit Olivier Sire les voz merciz Lors s en torna qu il n i a congie pris del tref s en ist d entre ses ennemis Garin le enfes qui bien fu ses amis li a randu son bon destrier de pris de plaine terre est es arcons sailliz Les esperons n a pas en oubli mis santir les fet au bon destrier de pris tres par mi l ost s en vait toz ademis par bien foir s est de mort garantiz Garde sor destre desoz l arbre foilli voit l escuier c Aude li ot tramis Le destrier broche cele part est ganchiz et l escuier ne fu pas esbahiz einz li randi ses garnemenz gentis et il s en arme com chevaliers esliz En son dos vest le bon hauberc treliz lace en son chief le vert elme bruni puis ceint l espee dont le branc fu forbi et remonta sor le destrier de pris et prist l espie qui fu noviaus forbiz que li tendi li escuiers gentis Et qant li fu conreez et garniz de jostes fere fu bien amaneviz Il lessa corre contreval le larriz et l escuier qui fu preuz et hardiz Atant es vos Girart tot ademis et dant Hernaut de Biaulende au fier vis Renier de Genvres et li preuz Aimeris Li dus Girart a escrier s est pris Nies Olivier coment est biaus amis Malement sire par foi le vos plevis vostre mesaje contai molt bien et dis devant le roi Charle de Seint Denis et devant toz les chevaliers de pris Moi et Rollant avons bataille pris devant le roi l ai gagie et plevi Deus dit Girart biau rois de Paradis aideiz nos en par la vostre merciz Nies Olivier dit Girart li marchis nule autre acorde n i avez vos porquis Nanin biau sire par le cors seint Moris Francois m enchaucent vez les toz ademis car retornons por Deu de Paradis ses recevons com chevaliers de pris Je l otroi certes dit Girart li marchis A ice mot pongnent toz ademis les bons escuz ont par devant eus mis Francois encontrerent armez et fervestiz Il lessent corre les bons destriers de pris tout meintenant n i ot plus respit quis se vont ferir sor les escuz votiz La fu l estor et fier et esbaudiz brisent ces lances ces escuz sont croisiz les blans haubers ont rouz et desarciz chevaliers chient des destriers arrabiz Devant les autres vint pongnant Aymeris fiert .I. Francois devant en l escu bis desoz la bocle li a fret et maumis fort fu l auberc que maille n en ronpi jus l abati del destrier arrabi Vienne escrie L ensengne seint Moris Ferez i tuit franc chevalier gentis Et il si firent come vasaus hardiz mes desor toz s i aida Aimeris Juqu as herberges ont les Francois requis assez en ont abatu et ocis De ci au tantes vint Girart li marchis et voit les armes et les destriers de pris que Francois ont de totes parz sessiz onques mes tant n en vit hom qui soit vis Voit les li dus molt en fu esbahiz Deus dit Girart voirs rois de Paradis einz mes ne vi tant gent ce m est avis He Charles sire bons rois poosteis a si grant tort m as en Vienne assis Ja Deus ne place ne le ber seint Moris que en partoiz tant que soiez marriz si seroiz vos se longuement sui vis A haute voiz a escrier s est pris Tornez arrieres franc chevalier de pris droit a Vienne la cite seignoriz Sire font il tout a vostre devis Isnelement sont arrieres ganchiz et li Francois lor vienent ademis sor les destriers armez et fervestiz En la grant presse derriers el chapleiz la est remes Oliviers li hardiz se Deus n en panse qui en la croiz fu mis eincois le vespre avra mestier d amis Un mes s en torne pongnant toz aatis dire le vet Charlemene au fier vis c au tref les ont Viennois asailliz a force et a poeste Li mesagiers devant le roi ala si li escrie Biau sire ore i parra qui hui cest jor de cuer vos aidera Li dus Girart nel vos celerai ja nos a requis juqu au tentes deca Li rois l antant toz li sans li mua de Terrasconne Girbert en apela Cil vint a lui que pas n i demora ses nies Rollant toz armez i ala li rois le voit tantost li demenda Dites biau nies por Deu qui nos forma s arment noz genz Nel me celez vos ja Ouil voir sire molt d armez en i a sonnons ces cors si que chascun l orra Et il si firent au tantes ca et la Li rois meismes tot meintenant s arma isnelement sor son destrier monta prist .I. espie dont li fers bien trencha le destrier broche qui molt tost le porta devant les autres premiers esperonna plus d une archiee sa gent arrier lessa. Voit le Girart Olivier le mostra Dites biau nies qui est ores cist la qui si tost vient connoistriez le ja Nanin biau sire par Deu qui me forma Mau daaz et qui por lui plus fuira Mes retornons por savoir qu il fera Nies dit Girart si soit com vos plera Li dus retorne le bon destrier brocha envers le roi forment esperonna n en connut mie por tant joster ala au bon roi Charlemene Li oz asenble soz Vienne el sablon Li dus Girart broche de grant rendon et vait joster au riche roi Charlon grant cop li done sor l escu a bandon que il li perce et fant de ci en son fort fu l auberc qui li fist guerison de la fort lance sont vole li troncon Charles fiert lui par grant airoison que de la sele froissa derriers l arcon et sor la crope de l auferrant gascon l a enversse li rois tout a bandon Voit le Girart au cuer en ot fricon il se redrece molt tost come frans hom sor les estriers s afiche de randon et trest l espee dont a or fu li ponz lou roi en fiert sor son elme roont Se Deus ne fust et son seintime non et la fort coife de l auberc fremillon mort nos eust l enperaor Charlon Deus dist li rois qui formas Lazaron mien esi•ent .XX. anz a se plus non que ge sui rois de France le roion ne trovai prince tant fust de grant renon qui me ferist sor mon hiaume a bandon se ce ne furent li Sarrazin felon Or m a icist feru de tel randon le chief en ai estonne juqu en son Deus me doint vie qu il en ait guerredon si avra il se Deus plest et son non Qant Girart ot les moz et la reson qu il ot feru le riche roi Charlon mist pie a terre del destrier arragon et vint au roi sanz plus d arestoison si li enbrace le pie et l esperon merci li crie por Deu et por son non qu il li pardont icele mesprison Charles l entant ne dit ne o ne non Voit le Girart s en ot grant marrison et vit Francois qui vienent de randon et la grant force l enperaor Charlon il remonta el destrier arragon vers la cite s en vet a esperon droitement a Vienne Desoz Vienne la fort cite garnie estoit molt bele et grant la praierie Un bois i ot de grant encesorie la asenbla la fiere conpagnie li home Charle a la barbe florie et li Girart a la chiere hardie Francois escrient Monjoie l esbaudie La gent Girart Seint Morise rescrient La veisiez tante lance brendie et tante ensengne de soie d Aumarie bien s entrefierent ne s entrepargnent mie le jor i ot meinte sele vuidie et meinte targe et percie et croisie et meinte broine ronpue et desarcie Cil destrier fuient par mi la praierie n i a ques prangne qu il n i entendent mie Li dus Girart a haute voiz s escrie Que fetes vos ma mesniee hardie qui solez querre pris de chevalerie Ferez les bien nes espargniez vos mie A ces paroles est lor gent resbaudie Lors veisiez meinte lance brisie et tante sele del bon destrier vidie qui la chei molt fu corte sa vie escachiez fu a duel et a hachie La ot Girart molt grant mestier d aie la gent Girart est arriere sortie la force au roi ne porent sofrir mie car desor aus en torna la folie si fu lor li domajes Atant es vos .I. danzel Nevelon neveu Girart del mieuz de sa meson Brandist la hante destort le confanon sor son escu vait ferir Eslion conseillier ert l enperaor Charlon desoz la bocle li pecoie et confont fort fu l auberc qui li fist guerison enpaint le bien si l abat de l arcon Puis trest l espee dont a or fu li ponz et fiert .I. autre sor son elme roont que tot envers le rabat el sablon Vienne escrie Ferez avant baron Ou voit son oncle si l a mis a reson Oncle Girart foiblement le feson Desoremes m avroiz a conpangnon au cous de la bataille Desoz Vienne lez le bosche foilli fu grant l estor por verte le vos di Qui la veist Hernaut le Poitevin com il requiert Olivier le hardi Et Oliviers nel mist pas en oubli le destrier broche le roit espie brendi merveilleus cop sor l escu le feri de chief en autre li perca et fandi fort fu l auberc que maille n en ronpi ce l a de mort tense et garanti plaine sa lance del cheval l abati tire sa resne s est arrieres ganchi Vienne escrie et Genvres autresin Girart encontre qui apongnoit vers lui qant il le voit fierement li a dit Oncle Girart por Deu qui ne menti comant vos est de la joste que vi del chevalier qiu apongnoit ici Malement nies Girart li respondi ce ne fu li rois qui soef me norri Molt sui dolanz qant onques le feri james ce cuit n avra de moi merci Alons nos en franc chevalier hardi Se plus i somes par verte le vos di a tart serons a la cite foi de ceste guerre ne puis avoir merci Et Olivier par ire respondi Certes biau sire n en irons pas issi Mes retornons por Deu qui ne menti si les ferrons a force et a estrif Volentiers nies Girarz li respondi a ces paroles sont arrieres ganchi Lors recomence .I. estor esbaudi la veisiez meint fort escu croissi Qui en la place de son destrier chei n en releva se molt n ot bon ami Cil de Vienne sont arriere ganchi ne porent plus sofrir l estor forni ne andurer par verte le vos di Li dus Girart au coraje hardi et dant Hernaut et son fil Aimeri lor gent asenblent et ont en .I. mont mis Arrieres tornent li chevalier hardi a force fierent et lor gent autresin le fort estor ont sevre et parti Charles le voit pres n a le sans marri duel en ot et pesance Grant fu l estor merveilleus et pesant Li rois apele Gautier et Eslinant Seignor fet il ore oiez mon senblent prenez o vos orandroit meintenant .IIII. C. homes qui soient conbatant Devers Vienne vos en tornez brochant devant les portes lor soiez au devant ne vos eschapent li felon souduiant Merveilles oi par foi ce dit Rolant ne sont ici devant nos en presant Ou volez vos que les aillons querant Ja Damedeu ne li face garent puis qu il sont ci qui les querra avant Mes ferons i ensenble meintenant que li plus cointes n ait de chanter talant Lors s en torna li dus Rollans brochant de Durendal fiert en la presse grant et apres lui li Francois conbatant plus de .VII. M. le vont apres sivent des Viennois vont la presse ronpant Ja i feist Girart perte trop grant de ses meillors chevaliers conbatanz qant il sona .I. cor tot meintenant tot entor lui ra asenble sa gent prant Olivier par la resne devant qu il ne remengne el fort estor pesant L estor guerpisent si s en tornent atant dedanz Vienne la fort cite vaillant et apres eus lor gent esperonnant puis fermerent les portes Li Viennois entrent en la cite ferment les portes si ont le pont leve Charles le voit pres n a le sans desve en haut s escrie par molt ruiste fierte Ore a l asaut franc chevalier menbre Qui or me faut n ait part en m erite n avra en France ne chastel ne cite vile ne marche donjon ne fermete que a la terre ne soit jus cravente A ces paroles se sont tuit apreste li escuier en sont au mur ale fierent de mauz et de pis acerez Cil de Vienne sont sor le murs montez pierres et fuz lor ont aval gitez plus de .LX. en i ot d afolez et plus de cent trebuchiez es fossez des damoisaus de France le resne Droiz enpereres dit Naimes li barbez cuidiez vos prendre par force la cite et les forz murs qui haut sont crenelez et les fors tors qui sont d antequite que paien firent par lor grant pooste Ce nen iert mie en trestot vostre ae Mendez arrieres en France le resne q angigneor vos soient amene Qant il seront devant ceste cite engins feront tot a lor volente par coi seront li mur acravente Li rois s antant tout a le sans mue duel en a et pesance Ce dit Naimes a la barbe florie Droiz enpereres nel vos celerai mie si m eist Deus vos pensez grant folie qui cuidiez prendre ceste cite garnie par tel assaut ne par tel envaie Hauz est li murs que fist gent paiennie Par cele foi que doi seinte Marie devant .VII. anz ne la prendriez mie Mendez en France et secors et aie engigneors qui sachent de mestrie si abatront les murs d ancesorie Charles l antant durement s en gramie il se rescrie Monjoie l esbaudie Que faites vos ma bone gent hardie Lors recomence molt fiere l aatie lancent et gietent par molt fort arramie Es vos Audein la bele l eschevie vestue fu d un paile d Aumarie a un fil d or treciee par mestrie les euz ot verz la face colorie vint sus les murs de la cite antie Qant vit l asaut et la fiere asaillie ele s abesse une pierre a sessie fiert .I. Gascon sor l iaume de Pavie que tout le cercle li defroise et esmie par .I. petit qu il ne perdi la vie Rollant s en rit a la chiere hardie a haute voiz li gentis cuens s escrie De ceste part par Deu le fiz Marie n iert mes la vile ne prise ne sessie devers les dames ne asaudre ge mie Or ne lerai que des or li die qui estes vos pucele seignorie Se geu dement nel tenez a folie car nel dement por nule vilenie Sire fet ele nel vos celerai mie Aude m apelent la gent qui m ont norrie fille Renier qui Genvre a en baillie suer Olivier a la chiere hardie niece Girart qui molt het coardie le mien parage est de grant seignorie Einz n oi seignor en trestote ma vie non avrai ja par Deu le fiz Marie se dant Girart ne le veut et otrie et Olivier qui proece mestrie Rollant respont qu ele ne l antant mie Ce poisse moi par Deu le fiz Marie que ne vos ai en la moie baillie Mes ce n iert ja se Deus ne m en aie por la bataille dont j ai fet aatie vers Olivier de Genvres Ce dit bele Aude au coraje sene Chevalier sire ne vos ai pas cele ce que m avez enquis et demende Or me redites s il vos plest verite dont estes nez ne de quel parente Molt vos siet bien ce fort escu bende et cele espee c avez ceinte au coste et cele lance au confanon ferme et desoz vos ce destrier pomele qui si tost cort com carrel enpanne Molt avez hui noz genz forment greve sor toz les autres senblez avoir fierte Or croi ge bien si com j ai en panse que vostre amie a molt tres grant biaute Rollans l antant s en a un ris gite Dame dit il vos dites verite il n a si bele juqu a Reins la cite ne juqu a Rome ce sachiez de verte ne ailleurs que ge sache Qant Rollans ot qu ele parla ainsi tot son coraje pas ne li descovri mes totevoies molt biau li respondi Ma damoisele por verte le vos di Rollant m apelent mi per et mi ami Aude l entant forment li enbelli Estes vos ce Rollant dont j ai oi que vers mon frere vos estes aati Pou savez ore coment il est hardi si avez pris bataille contre lui Ce poisse moi par foi le vos affi por ce que l en vos tient por mon ami si com ge l ai de plusors genz oi Par cele foi c avez Charle plevi se en prison m eusiez ier matin eusiez en ne pitie ne merci que m en poisse arrieres revenir Rollant l antant toz li sans li fremi Ma damoisele li cuens li respondi ne me gabez par amors vos en pri Li rois apele le conte de Berri Sire Lanbert gardez n i ait menti qui est la dame desor le mur anti qui a Rollant parole et il a li Par ma foi sire li cuens li respondi ce est bele Aude au gent cors seignori fille Renier de Genvres le hardi Mener l an doit le Lonbart Enseis N en avra mie Charles li respondi Rollant mes nies i a son plet basti Einz en morront .C. homes fervesti que li Lonbarz l en menast pas issi A ice mot Rollant se departi de la pucele qui sor les murs guerpi Voit le li rois un pou l a escharni Biau nies fet il quel plet avez basti vers la pucele ou ge parler vos vi Se vos avez nul mautalant vers lui pardonez li par amors le vos pri Rollant l antant toz li sans li fremi por la honte s encline Biau nies Rollant dit Charles li menbrez de la pucele ou tant parle avez qui qu i gaaint n i ai riens conqueste car Olivier oisi de la cite ensanble o lui .C. chevaliers armez de l une part de nostre ost sont entre a .XX. des noz i ont les chies copez et en prison en ont mene assez La pucele Aude si le savoit assez einsi vos a escharni et gabe Rollant l antant a pou n est forsene de mautalant est taint et enbrase Qant li rois voit que ses nies fu ire molt belement l en a reconforte Biau nies fet il ne soiez trepanse por la pucele ou vos avez parle nos en irons au loges et au tres por seue amor ert l asaut respitez Dit Rollant Sire si com vos comendez Sonent un cor arrieres sont tornez Li enpereres est venuz a son tref cil chevalier sont par l ost desarmez molt volentiers sont la nuit reposez si ont mengie et beu a plante et se couchierent qant il fu avespre Charles li rois qui molt ot de fierte dedanz son tref se coucha molt lassez que celui jor fu molt d armes penez Endormiz s est li forz rois coronnez sonja un songe dont molt fu trepensez l enperere de France Nostre enperere est en son tref cochiez Li gentis rois qui molt fu traveilliez de cous doner et des armes baillier sonja un songe mirabilleus et fier que il estoit alez esbenoier lez la riviere desor un grant destrier desor son pong .I. ostoir qu il ot chier en sa conpangne .C. damoisel legier De la cite issi .I. faus gruier en la grant ille s en vint toz elessiez dedanz s asiet dejoste le rochier .III.foiz cria et fist si grant noisier que l oi Charles et tuit si chevalier Se le tenist l enperere au vis fier ne le rendist por l or de Monpellier einz en feist grant joie Forment sonja li rois en son dormant Ce fu l avis l enperere puisant que sor son pong tint son ostoir volant vers le faucon le gita meintenant qu il vit issir de Vienne la grant Par dedanz l ille sor l erbe verdoiant sont asenble li dui oisel volant l un contre l autre par si fier mautalant se conbatirent ensenble meintenant tant que tuit furent recreu et senglant d anbes les eles se vont entrebatant Charles le rois en avoit poor grant qu il ne perdist son oisel c amoit tant ce li estoit avis en son senblant qu il en prioit Deu molt escordement qu il li sauvast le suen oisel volant Tant en pria Charles li rois puissant que li oisel firent acordement et pes ensenble joie et amor si grant ce li senbloit qu il s aloient baisant Li rois les vit molt ot le cuer joiant Apres la joie s est levez meintenant isnelement s est dreciez en estant esmaiez fu del songe durement de sa mein destre se sengna erraument et prie Deu le Pere onipotant c a bien atort ce fort songe pesant Il a mene .I. mestre molt sachant trestot li conte ne li ceile noiant com il sonja le songe en son dormant des .II. oisaus qui furent conbatant et puis refirent pes et acordement Li mestres l ot si en ot joie grant puis li a dit Enperere puissant de cestui songe ne soiez ja dotant que orendroit par le mien escient vos en dirai molt bien tout le senblant icil oisiau sachiez veraiement qui vint en l ille de Vienne volant c est Olivier au coraje vaillant qui s en istra ce cuit prochainement toz adoubez sor le destrier corant por la bataille que il en a covant vandra en l ille por conbatre a Rollant Et li ostoirs por voir le vos creant qui conbati a ce faucon volant c est vostre nies au coraje vaillant qui conbatra a l espee tranchant vers Olivier le hardi conbatant Si grevera l un l autre durement et puis feront pes et acordement par la vertu de Deu onipotant seront apres amis et bien voillant et vos en avroiz joie Molt fu joiant l enperere au vis fier qant ot le songe si a bien anoncier einz puis la nuit ne se vost recouchier eincois se fist et vestir et chaucier La nuit s en vait jorz prist a esclerier et li solauz comenca a raier li oisel chantent soz Vienne el gravier Dedanz Vienne ert li cuens Olivier a seint Morise fu alez au mostier si ot oi le Damedeu mestier Sus el palais en prist a reperier si apela Garin son escuier Amis fet il va tost sanz delaier et si m aporte mes garnemenz plus chiers si m armerai sanz plus de respitier Et cil respon Biau sire volentiers Totes ses armes li vait apareillier et li frans cuens s est pris a despoillier son fres bliaut et son hermine chier en sa chemise remest le chevalier Un porpoint vest le nobile guerrier tout fin de paile ne crient carrel d acier ne arme nule qui le puist enpirier atant es vos dant Girart le guerrier en sa conpangne Elinant et Gautier Prist le hauberc des poinz li vait sachier si li a pris gentement a proier Nies Olivier por Deu le droiturier ceste bataille vos estuet a lessier El duc Rollant a vaillant chevalier et vasal nobles por ses armes baillier plus en est duiz que mestre charpentier n est de sa hache ferir et chapuissier qant il veut fere sale ou meson drecier Je ne vodroie por le tresor Gaifier qu il te peust de ton cors domagier ne me porroie james releescier Qui me donroit le resne de Baivier et tout le resne de ci que a Poitiers ceste bataille ne feroie atargier Armer m estuet sanz plus de repitier trop faz longue demeure Nies Olivier ce dit Girart le ber por amor de Deu qui se lessa pener en seinte croiz por son pueple sauver lesiez biau nies ceste bataille ester Li dus Rollant fet molt a redouter ne porroit nus tel chevalier trover Dit Olivier Ja n en estuet douter je nel leroie por les menbres coper ne por avoir q an me seust doner que a Rollant ne voise encui joster Ceste bataille ne veil plus respiter En Deu me fi qui bien me puet sauver ja n avra mal cui il vodra garder Oncle Girart car me lessiez armer ge croi que trop me faciez demorer car ja sera haute eure Si come armer se dut li cuens gentis atant es vos .I. Juif Joachins blanche ot la barbe si come flor de lis Des icele eure que Pilatre fu pris par cui Jesu ot este en croiz mis mes puis en prist vencheance ce m est vis Vaspasiens l enperere gentis car il fist prendre ce conte li escriz toz les Juis qui erent a ceu dis en Jusalam la cite seignoriz defors la vile furent trestuit ocis tres icele eure que ge ci vos devis fu en Vienne cil Juis Joachins Riches hom fu et d avoir repleniz tant en dona au barons del pais que entor aus l orent sofert tot dis Voit Olivier si l a a reson mis Oliviers frere ce dit li vieuz floriz car prenz de moi .I. garnemenz petiz einz n ot si bons Charles de Seint Denis Oliviers l ot a regarder l a pris desor l espaule li avoit son braz mis s il creust Deu ja le besast el vis Cortoisement li dist li cuens gentis Donez le moi Joachins biaus amis Se Deus ce done li rois de Paradis de la bataille reviengne seins et vis tantost sera bautiziez vostre fiz s iert chevaliers ainz .VIII. jorz aconpliz Donrai lui armes et bon destrier de pris si li donrai grant part de mon pais Ne place Deu ce respont Joachins que crestien deveingne ja mes fiz Par la voiz Deu mieuz vodroie estre ocis et que il fust escorchiez trestot vis Oliviers l ot volentiers s en est ris et li baron li conte et li marchis Li bons Juis les garnemenz a pris Olivier les aporte Cil Joachins n i fist arestoison les armes done Olivier le baron sor une table les mistrent a bandon Un arcevesque i fist beneicon les armes seigne de Deu et de son non por Joachin o le flori grenon qui tant les ot gardees en meson Dit li Juis Car armez ce baron puis que veez autre fin n i metron Car li chauciez ces chauces a bandon mieudres ne furent puis le tans Salemon si li fermez ces riches esperons jes achetai d un paien Esclavon doner i fis .C. livres de mengons de riches pierres i a molt grant foison qui valent plus que la cit de Mascon si com l estoire devise par reson Et dit Girart A Deu beneicon Li dus les prist sanz plus d arestoison a Olivier les ferma el talon le pie li tient sor l ermin pelicon si le conforte a guise de baron qu il ert de son lingnaje El dos li vestent .I. hauberc jazerant fort et legier ainz ne fu meins pesant autretes .XII. en portast .I. sergent N a so ciel arme dart n espee tranchant qui l anpirast .I. seul denier vaillant Fort fu l auberc nul meillor ne dement Rois Eneas le toli Elinant par devant Troie en la bataille grant la ou Paris le fiz au roi Priant n Estor ses freres n orent de mort garant Tuit furent mort veincu et recreant et trebuchie tuit li haut mendement n i remest tor ne haut mur en estant q ancontre terre ne fussent tuit gisant N en eschapa nus de mere vivant fors Eneas que Deus parama tant qui s en torna o son pere fuiant si en entra en mer en un chalant la se gueri a loi d omme sachant Cil Eneas ot le bon jazerant puis le perdi el brueil soz Maradant en la bataille qu il fist a Roboant Ilec l ocist .I. chevalier puissant sodoier fu de France la vaillant et il conquist cel auberc jazerant Droit a Vienne s en vint atout errant cil Joachins l en dona avoir grant en son tresor ot este longuement or l a done Olivier le vaillant au gentil conte le hardi conbatant le fiz Renier de Genvres Olivier ceint une tranchant espee molt par fu bone mes trop dur fu trenpree desoz Vienne li fu tost tronconnee la pucele Aude en fu forment iree et por son frere forment espoentee com vos orroiz par tans s il vos agree se la granz chancon est dite et escoutee A son col pant une targe roee d or et d azur richement painturee d un poison fu qui ert en mer salee ausin est durs come enclume trenpree Cil Joachins a la barbe mellee l ot a Valsor d un paien achetee qui por la targe en ot bone sodee de bons deniers une grant henapee Li dus Girart a la chiere menbree fist amener sanz plus de demoree un bon destrier qui ot sele doree et cil i monte a qui forment agree Bele Aude en a meinte lerme ploree li dus Girart l a molt reconfortee Nies dist li dus a la chiere menbree cil Damedeu qui fist ciel et rousee te doint vitoire en iceste jornee et de mort te desfande Nies Oliviers ce dit Girart le ber a Damedeu qui se lessa pener en seinte croiz por le pueple sauver puisse ton cors hui ce jor comender Tu n i vas pas por avoir conquester mes por ton oncle de mauves lous giter Biau sire nies ce riche cor portez a vostre col sor l escu le pandez qant vos vendroiz desoz Vienne es prez droiz envers l ost hautement le sonez si que bien l oie Charles et ses barnez si dira l en por moi estes armez Sire fet il si com vos comendez Cil prant le cor qu il ne doute home nez fors Damedeu lou roi de majestez et dant Rollant qui tant est redoutez qu il trebucha desoz Vienne es prez qant ses destriers fu par mi tronconnez Molt le fist bien li frans cuens ennorez de la seue ame ait Jesu Criz pitez Qant li cuens fu sor le destrier montez a son col ot le fort escu bende en son pong tint le roit espie carre a .V. clous d or le confanon ferme Renier de Genvres est molt espoentez tendrement pleure li gentis cuens menbrez et de Biaulande Hernaut li redoutez et Aimeris li vasaus adurez la pucele Aude l a a Deu comende Et Olivier n i est plus demore par mi la porte s estoit acheminez desoz Vienne en est el Rosne entrez en une nef en est outre passez Qant il fu outre s est el cheval montez fist .I. eles aval par mi les prez Puis prist le cor si l a trois foiz sone par tel air et par si grant fierte que tuit l oirent au loges et au tres De tieus .III. mile fu le jor esgardez qui tuit disoient Oliviers est faez vez de ses armes com gietent grant clartez S or veut Rollant bataille avra assez onques plus fier n ot mes en ses aez Un mes s en torne a Rollant est alez qui li a dit Oliviers est entrez tout seus en l isle sor son destrier armez De sa fience veut bien estre aquitez qu il vos plevi devant Charlon es tres Rollant l antant grant joie en a mene Et Deus fet il tu soies aorez C est mes voloirs que tant ai desirre Ses garnemenz a molt tost demende cil qui les gardent les li ont aportez et li cuens s est meintenant adobez Il vest l auberc lace l iaume jume et ceint l espee au pont d or noielez c est Durandart dont vos oi avez que il toli Hiaumont le desfaez Et l enperere l en a aresone Biau nies fet il envers moi entendez por Deu vos pri qui en croiz fu penez ceste bataille s il vos plest respitez et Olivier s en ira le menbre dedanz Vienne entre son parente Je ne vodroie por l or de .II. citez que il i fust ocis ne desmenbrez ne vos meismes par pechie afolez Sire fet il por neant en parlez je nel feroie por qanque vos avez Jeu fiencie si que bien le savez je m en veil estre mentiz ne parjurez Ne puet remeindre par home qui soit nez que je n i aille sor mon destrier armez Se del covant li estoie fausez j en avroie grant honte Biau sire nies dit Charles au fier vis puis que ge voi c ainsi l avez enpris que la bataille sera sanz contredit je vos comant au roi de Paradis qui gart vo cors que il n i soit maumis ne Olivier afolez ne ocis Biau tres doz oncles dit Rollans li hardiz por Deu vos pri qui en la croiz fu mis que apres moi ne viegne hom qui soit vis Je ne vodroie por tot l or de Paris que vers le conte eusse riens mespris Non fera il biau nies je vos plevis Et dit Rollant De Deu .V. C. merciz En mi la place fu trez ses arrabiz Rollant i monte que estrier n i a quis au col li pandent .I. fort escu votiz en son pong prist .I. roit espie forbi a .V. clous d or le confanon assis Par mi les tres s en vet toz ademis au Rosne vint n i a plus terme pris outre passa sor le destrier de pris tout droit en l ille en vet le cuens gentil la ou estoit Oliviers li hardiz Fist .I. esles li dus poosteis Voit le Olivier vers lui vient ademis son fort escu torna devant son vis car molt ot fier coraje Qant Olivier vit Rollant le guerrier contre lui vient a guise d omme fier Li dus Rollant se prist a avencier il li escrie Qui es tu chevalier Ies tu Francois Alement ou Baivier ou ies Normant Flamenc ou Berruier E Deus aie dit li cuens Olivier sire Rollant dont ne me connoissiez Ja sui ge fiz au bon conte Renier celui de Genvres qui tant fet a proisier si est mes oncle dan Girart le guerrier et mes cousins ja nel vos quier noier Aimeriet o le coraje fier qui vos tolites l autre jor son destrier Ci sui venuz por mon cousin vengier car bien encore me menbre de l autrier qant ma seror bele Aude au cors legier en voliez porter sor vo destrier La merci Deu le pere droiturier je la rescous au branc forbi d acier vostre esperon vos i orent mestier qant en l ost Charle en foites arrier Nel di por ce quel veille reprochier eincois vos pri nobile chevalier que a vostre oncle nos faciez apaier Audein avroiz ma seror a moillier Et dit Rollans Ore oi musart pledier Einz t en menrai a pie lez mon destrier en douse France esteras prisonnier Audein avrai qui q an doie ennuier Non avroiz certes ce respont Olivier por tant come je vive Olivier fu plain de grant baronnie ou voit Rollant forment le contralie si li a dit par molt grant felonnie Sire Rollant par Deu le fiz Marie je vos di bien que c est molt grant folie qant vos cuidiez par vo grant estotie Girart mon oncle torner a cuivertie Ja ne donra cuivertaje en sa vie nel soferroie por tote Normendie Et dit Rollans Ore oi plet de folie Qanque tu diz ne pris pas une alie Se Deus me sauve Durendart la forbie le chief perdras einz eure de conplie Dit Olivier Ice ne croi ge mie Li dus Girart a la chiere hardie i avroit grant domage En l ille furent endui li bon guerrier onques ne furent dui si bon chevalier Li nies lou roi a dit au fiz Renier Vasal fet il lesons vostre plaidier Ci sui venuz Vienne chalengier la fort cite dont haut sont li terrier por Charlemene mon seignor droiturier S or estes preuz si vos avra mestier Lors li respont li gentis Olivier dist tel parole qui bien fist a proisier tuit gentil home l en doivent tenir chier He Rollans sire nobile chevalier por Deu vos pri qui se lessa drecier en seinte croiz por son pueple essaucier que ceste guerre feisiez apesier Audein avroiz s il vos plest a moillier tote Vienne avroiz a jostissier au duc Girart le ferai ostroier en grant bataille et en estor plenier serai tot jorz vostre confanonnier Et dit Rollans N ai song de preeschier qant je t avrai ocis au branc d acier Vienne avrai et Audein a moillier maugre tot son paraje Dit Olivier au coraje hardi Sire Rollant por amor Deu merci Ce que vos dites ne porroit estre issi Mes fetes ce que par amors vos pri por amor Deu qui onques ne menti fetes la pes si soions bon ami Je ne vodroie por l annor de Ponti que vos euse ne pris ne mal bailli car en la fin ce sai ge bien de fi en esseroient tuit mi ami honni James li rois ne mes oncles ausin jor ne seroient bien voillant ne ami Mes fetes ce que vos requier et di je et mes oncles au coraje hardi serons vostre home et jure et plevi Voir dit Rollans ne m estordroiz issi Einz vos avrai mort ou pris o honni et randu Charle le roi qui m a norri si t en menra en sa prison o lui Tant i gerras por verte le te di que l en t avra fors del resne banni Lors avrai Aude et Viennois ausin Girart tes oncles qui le roi a trai si s en fuira come povre mendi Certes c est fable Olivier respondi or sui ge fous se mes hui vos en pri Biau Sire Deus por coi cri ge merci Por fol m en tieng recreant et honni Deus aidiez m en q an vos me croi et fi Sire Rollant puis que il est issi que envers vos ne puis trover merci ne dites mie que vos aie trahi Gardez vos bien desormes vos deffi devant le cop vos en ai bien garni Rollans respont Je vos ai bien oi Qui donc veist com il sont aati Chascun d eus broche le destrier arrabi si s entrelongnent .I. arpant et demi Au reperier ont les espiez brandiz et enbracierent les forz escuz votiz puis esperonnent par mi le pre flori li uns encontre l autre Qui donc veist l un vers l autre adrecier et les espiez brandir et paumoier et les destriers a esperons coitier au deus meillors les poist en proisier de tot le mont por lor droit derrenier Granz cous se donent es escuz de cartier desus les bocles les font freindre et percier les groses lances font froer et brisier forz haubers ont nes porent enpirier Si s entrehurtent li noble chevalier que desoz aus ploierent li destrier et tout par force les font ajenoillier Outre s en passent li dui vaillant guerrier et puis retornent come faucon gruier li uns encontre l autre Li dus Rollant sist el destrier gascon trest Durendart qui li pant au giron fiert Olivier desor son elme en son que flors et pierres en abat de randon Li cous descent contreval a bandon derriers la sele consivi l arragon tranche le feutre del vermeil siglaton et par mi cope le bon destrier gascon tot contreval res a res del rongnon Tote la boce del dore esperon li a cope res a res del talon en .II. moitiez li mist son arragon De ci en terre cort l espee a bandon dont veisiez tot a pie le baron Rollant escrie Monjoie la Charlon Hui ert Vienne mise a destrucion que Girart tient en guise de felon Il en avra molt aspre guerredon de pandre as forches come fosier larron Dit Oliviers Ore oi plet de bricon Tot est en Deu qui Longis fist pardon c aidier me puet par sa beneicon faire vers vos secorre et guerison De la bataille sui vers vos a bandon por bien deffendre Vienne et le donjon Ja n en avroiz vaillant .I. esperon qui ne vos cout .C. livres de mengon Lor trest l espee iriez come lion et pase avant en guise de baron Li dus Girart fu en grant soupecon sus el pales de son mestre donjon qui li donast trestot l or Salemon d une loee ne deist o ne non Qant il parla si dist fiere reson Deus reclama et son seintime non Glorieus Pere qui sofris passion et sucitas de mort seint Lazaron la Mazelainne feis verai pardon Jonas garis el ventre del poison si com c est voirs et nos bien le creons guerisiez hui de mort mon chanpion que ne l ocie Rollans li nies Charlon james n avroie joie Aude s estut a une fenestrele pleure et sopire sa mein a sa meinsele qant vit son frere desor l erbe novele qui fu a pie del destrier de Castele del bon cheval ot vuidiee la sele tel duel en ot la cortoisse pucele a pou li cuers ne li part soz l esele Corant en vait droit a une chapele devant l autel se rant a Deu en cele Glorieus Deu ce dit la damoisele qui descendites en la virge pucele qui meint pechierre au grant besong apele donez me oir del conte tel novele qui a Girart et a Charlon soit bele l enperaor de France Aude sa paume sor le marbre entaillie tant a plore que tout en ot moillie son fres bliaut et l ermine dougie Damedeu proie doucement sanz faintie qui por son pueple en terre descendie Glorieus Deu prengne vos en pitie des .II. barons ou tote est m amistie que il n i soient honni ne vergongnie D Audein lerons qui le cuer ot irie si redirons de Rollant le proisie et d Olivier au coraje enforcie qui se conbat a Rollant tot a pie Il tint l espee au pont d or entaillie et fiert Rollant sor le hiaume vergie que flors et pierres en a jus trebuchie Tout contreval li bons brans descendie le bon destrier par devant consivie par les espaules li a par mi tranchie de ci el pre est le bon branc glacie tot a a terre en un mont trebuchie Voit le Olivier si s est esleecie qui li donast de France la moitie et Orlenois et Reins l arceveschie mien escient n eust le cuer si lie come del conte qu il a deschevalchie en l ille soz Vienne Se la fussiez soz Vienne la grant ou se conbat Oliviers et Rollant Einz dui baron ne furent si vaillant ne si hardi si fier ne conbatant A lor espees se vont bien jostisant granz cous se donent sor les escuz devant des hiaumes vont les pierres craventant li feus en vole que la place en resplant Einz tel bataille ne vit nus hom vivant com ceste fu dont je vos di et chant et qui vit cele ja ne vivra mes tant de .II. barons qu il voie si pesant Li dus Girart est as murs en estant et dant Hernaut de Biaulande la grant et Aimeris li preuz et le vaillant Renier de Genvres vet grant duel demenant por Olivier son fil qu il amoit tant Seinte Marie dit Renier en plorant guerisez hui Olivier le vaillant que il n i soit veincu ne recreant Et Charlemenes reprie escordement Seinte Marie garissiez moi Rollant j en ferai oir de France En la grant ille soz Vienne el sablon la se conbatent enbedui li baron et escremisent come dui chanpion N a l un de l autre ne merci ne pardon car plus sont fier que liepart ne lion Ne sai lequel plus loer deust on car enbedui sont de si grant renon que l un por l autre le lonc d un esperon ne fuiroit pas por le tresor Sanson Des brans toz nuz se fierent a bandon lor escuz tranchent et lor hiaumes en son li cercle d or i ont pou de foison ausi les tranchent com pans de siglaton Des aciers ist li feus a grant foison les estanceles en volent environ si sont andui et engres et felon qui li uns l autre ne redoute .I. boton einz se requierent par tele airoison et si forment n est se merveille non Tuit sont fandu li escu a lion et deronpu li hauberc fremillon si que desoz perent li auqueton se Deus ne fust et son seintime non ja de la mort n eusent guerison Sus en Vienne enz el mestre donjon dame Guiborc fesoit grant marrison o lui bele Aude a la clere facon Lor crins deronpent et font grant marrison lor poinz detordent et crient a haut ton Hahi Vienne Mau feus et mal charbon vos eust arse entor et environ n i remeinsist ne sale ne donjon qant se conbatent por vos tel dui baron Se uns en muert de verte le savon gaste en sera France et tot le roion et cist pais mis a destrucion Aude la bele n i fist arestoison Hernaut son oncle en a mis a reson cil de Biaulande qui fu de grant renon Biau sire Hernaut dites quel la feron Prenez conseil que blame n en aion que acorde soient cil dui baron Je n en puis mes dit Hernaut li frans hom ce fet Girart il et le roi Charlon par lor orgueil et par lor mesprison Einz nostre encestre de verte le savon li bons dus Bueves o le flori grenon ne rendi jor qui vausist .I. bouton de treuage l enperaor Charlon por l annor de Vienne En l ille furent li dui vasal arme tout pie a pie sanz destrier abrive c au brans d acier les orent decope Rollant parla au coraje adure Olivier sire par la foi que doi De ne vi mes home de la vostre bonte Endui ensenble somes ci ajoste ceste bataille ferons en chanp melle tant que li uns soit veincu ou mate ja n i avrons aide d omme ne Foi que doi Deu le roi de majeste .II. dames voi en ce pales liste qui por nos ont forment bret et crie et Olivier ont forment regrete si m eist Deus il m en prent grant pite Dit Oliviers Vos dites verite ce est Guiborc ma dame au cuer sene et ma suer Aude au gent cors ennore qui por moi ont ce grant duel demene Se Deus ce done qui le mont a forme c arrier m en aille en vie et en sante tant li cuit dire ainz demein l avesprer se a vos faut a seignor espouse n avra mari en trestot son ae eincois devendra nonne Li dui baron sont ensenble en la pree la se conbatent par molt grant airee li dus Rollans a la chiere menbree ce jor feri meint pesant cop d espee c est Durandal qui bien fu esprovee en Rancevaus a la male jornee qant de Rollant i fu la desevree Et Olivier tint la seue entesee et fiert Rollant sor la targe roee juqu en milieu de la bocle est colee Qant il la sache si la trova serree delez le heuz brise la bone espee Devant Vienne en lieve la criee que Oliviers a la chiere menbree a ja s espee brisiee et tronconnee Aude l antant s est cheue paumee qant se redrece si s est molt dementee seinte Marie a forment reclamee Olivier frere com pesant destinee Se ge vos pert bien m a Deus obliee ja de Rollant n iere mes espousee le meillor home qui ainz ceinsist espee eincois serai lasse nonnein velee Seinte Marie dist Aude la senee je voi conbatre mon frere en cele pree a mon ami qui m avoit aamee li quieus qui muire je serai forsenee departez les roine coronnee Girart l antant s a la color muee isnelement l en a sus relevee a un mostier l a conduite et menee a molt grant poine l avoit reconfortee Cele novele fu a Charle contee .M. chevaliers en font duel par la pree li rois meismes en pleure a recelee desoz ses piaus de martre Qant Oliviers vit son branc tronconne qui en .II. pieces gisoit en mi le pre et d autre part voit son cheval cope et son escu fandu et estroe savoir poez molt ot le cuer ire car ne vit arme ou il ait recovre Si regarda tot entor lui el pre de tote parz se vit si enserre en nule guise ne puet estre eschape lors a tel duel a pou que n est desve Grant hardement a en son cuer panse mieuz veut morir a ennor en ce pre c a coardisse li soit ja atorne que de foir ait ja senblant mostre Tout meintenant eust Rollant coble a ses .II. poinz voiant tot le barne mes Rollant voit ce qu il ot en panse si li a dit a loi d omme menbre Sire Oliviers molt avez grant fierte Brisie avez vostre branc acere et j en ai un qui est de tel bonte qui ne puet estre oschie ne esgrune Nies sui au roi de France le resne s or t en avoie veincu ne afole a tot jorz mes me seroit reprove c ocis avroie .I. home desarme Quier une espee tot a ta volente et plain boucel de vin ou de clare car j ai grant soif ja nel te quier celer Oliviers l ot si l en a mercie Sire Rollant je vos en sai bon gre puis que m avez einsi aseure Se il vos plest par la vostre bonte reposez vos .I. petit en ceu pre tant que ge aie au marinier parle qui m a ici en ceste ille amene Et dit Rollant Volentiers et de gre Et Olivier au coraje adure vint a la rive n i a plus demore le marinier apele Quens Oliviers s en torna erraument le marinier apele isnelement et dit li cuens Amis a moi entant va a Vienne tost et isnelement si di Girart mon oncle le vaillant m espee est frete joste le heuz d arjent Envoit m en une sanz nul arestement je li ferai tot son desrenement en non de Deu le Pere onipotant et seint Morise a cui je m en atant et plain boucel de vin ou de piment que grant soif a li nies Charle Rollant Sire fet il tot a vostre coment En sa nef entre si s en torna errant d autre part l eve en est venuz najent droit a Vienne en est venuz corant car Oliviers le haste durement et le besong que il sot qu il ot grant Sus el pales en monta meintenant ou voit Girart si li dist hautement Sire fet il por Deu le roialment par moi vos mende Oliviers le vaillant c a ce besong li soiez secorant S espee est frete joste le pont d argent querez l en une tost et isnelement et plain boucel de vin ou de piment que soif a grant li nies Charle Rollant Et dit Girarz Ce soit au Deu coment molt est preuz li nies Charle Li dus Girart n i vost plus delaier ill an apele le cortois marinier Amis fet il Deus te gart d encombrier Secor moi tost le cortois Olivier si m eist Deus tun avras bon loier Va pren les cles si entre en ce celier a ton talant prenz del vin .I. setier et la nef d or demende au boteillier Je te ferai .II. espees baillier l une en est moi et l autre est Renier celui de Genvres qui pere est Olivier Sire fet il bien fet a ostroier Et Joachins estoit sor le planchier li bons Juis qui molt fist a proisier qui done ot les armes Olivier Ill antandi de la gent le noisier et la novele que dit le marinier a son ostel s en torne Qant li Juis entandi la criee et la novele que cil ot aportee que Olivier a brisiee s espee a son ostel s en vet sanz demoree Une en aporte qui molt fu ennoree plus de .C. anz l ot li Juis gardee Closamont fu qu iert de grant renommee l enperaor de Rome la loee Il la perdi el brueil soz la ramee en la bataille qui molt fu redoutee la ou l ocist Malques de Valsegree Il chei jus qant la teste ot copee fors de son fuerre cola la bone espee l erbe fu drue qui desor fu versee Apres lon tans l ont faucheor trovee une des fauz lor a par mi copee qant il le virent si l en ont sus levee et l apostoile de Rome presantee Il la vit bele et de letres doree et le pont d or dont el fu enheudee En l escriture que ill a esgardee trova escrit c est verite provee que Hauteclere avoit a non l espee et dedanz Rome fu fete et conpasee Manificans l avoit fete et ovree ce fu un fevre de molt grant renommee Li apostoiles fist bien forbir l espee enz el tresor seint Pere l ot gardee Pepin l an trest de France la loee qant coronne ot premerainne portee au duc Buevon la dona en sodee et li dus l ot a son Juif donee qui l an dona d avoir meinte livree Des lors en ca l ot li Juis gardee einz puis n oi nus parler de l espee juqu a cele eure que il l a presantee a Olivier ou bien fu aloee le fiz Renier de Genvres Li bons Juis qui molt fist a proisier a aporte le branc forbi d acier si le bailla a Girart le guerrier et cil le livre a un franc escuier Une autre espee li fist encor baillier et cil tantost monta sor .I. destrier juqu a la rive ne fina de brochier Outre le passe le cortois marinier encontre vait le marchis Olivier et cil li tant les espees d acier Tote la mieudre fet li cuens essaier c est Hauteclere qui puis ne vost changier l autre comende garder a l escuier De vin versa tot plain la nef d or mier devant Rollant se vet agenoillier cil prist le vin qu l en ot grant mestier longuement but por sa soif estanchier Tant com buvoit le nobile guerrier et l escuier li vit le col bessier par felonnie vost son seignor aidier del fuerre tret le branc forbi d acier qu il vost ferir le gentil chevalier par mi le col sanz point de l espargnier Qant l apercut li marchis Olivier et vit l espee luire et reflanboier isnelement en vet vers l escuier hauce le pong grant cop li vet paier encontre terre le fet jus trebuchier et en apres le prist a ledengier Fill a putain com vos avoie chier A Pantecoute fussiez vos chevalier ore en avez perdu vostre loier Le matinet vos metez au frapier se vos i truis demein apres mengier je vos ferai ou pandre ou greillier ou trainer a qeue de somier le hart et col come larron fossier Mar i vosites le franc baron touchier par si grant felonnie Qant ot beu li nies l enpereor conte Olivier apela par iror Lesiez ester le plet del lecheor S il m eust mort France en fust en error et li pais d anviron et d entor et li barnajes Charle l enperaor eust perdue hui et joie et baudor Mes or lesons ester le traitor voist au deables car il est bien des lor Prenez vos armes si alons en l estor trop avons ci fait longuement sejor Encui avra li dus Girart poor qui tient Vienne a loi de boiseor tel guerredon avra a chief del tor qu il en pandra a loi de traitor Dit Olivier Or oi plet de folor Tout est en Deu le verai criator qui bien l en puet garder par sa doucor En lui me fi et croi bien hui cest jor et en mes armes et el branc de color qui me donra et pooir et vigor por desfandre mon oncle Qant Olivier a la parole oie del duc Rollant qui einsi l enrennie il prant sa targe s a la guige sessie se il l osast lessier sanz vilenie n en feist plus por tot l or de Hongrie Tint Hauteclere qu ert tranchant et forbie et Rollant tint Durandart la brunie A Olivier a fete une envaie grant cop li done sor l iaume de Pavie qanqu en ateint en detranche et esmie juqu enz el cercle est l espee glacie Se Deus ne fust li fiz seinte Marie trestot l eust fandu juqu en l oie Mes li brans torne vers senestre partie si descendi sor la targe florie ne li valut la monte d une alie d un chief en autre l a tranchie et partie et le giron de la broine sarcie de ci en terre est l espee glacie Voit le Olivier toz li sans li fremie Deus dit li dus Dame seinte Marie guerisiez hui mes menbres et ma vie Bien voi au cous n est pas a gaberie Se ne li rant ne me pris une alie Tint Hauteclere ou durement se fie fiert en Rollant sor l iaume de Pavie tot li trencha vers senestre partie juqu a la coife est l espee glacie mes Damedeu li a fet garantie qu il nel fandi de ci que en l oie Par tel vertu est l espee glacie del fort escu est la bocle tranchie de ci en terre fiert l espee forbie Voir dit Rollans tu ne m espargnes mie A ice cop refont une envaie li uns a l autre par molt fiere aatie si a chascun la fort targe sessie au brans d acier refont une escremie Onques bataille ne fu si fiere oie car li baron sont de tel seignorie que l un por l autre por a perdre la vie ne vodroit pas avoir place guerpie tant sont de fier coraje Molt par sont fier enbedui li baron et plus hardi que liepart ne lion contre lor cous n a nule arme foison Tant ont chaple n est se merveille non La pucele Aude en fu en grant fricon dedanz Vienne sus el mestre donjon de verai cuer comence une oroison Glorieus Deus par vos seintime nom qui estorates terre mer et poison et le seint ciel par vostre eleccion Adam feis de terre et de limon et sa moillier Evain l apele l on tout Paradis lor meis a bandon fors d un pomier dont lor veas le don puis en mengierent ne lor fist se mal non encore en ont li oir reprovoison Dedanz la Virge preis anoncion si en naquis en guise d anfancon en Biauliam que de fi le savon Puis fus offerz au tenple Salemon entre ses braz vos prist seint Simion Troi roi s esmurent de lor grent region par vos requerre et merci et pardon Les innocens de par tout son roion fist decoler Herode le felon qu il vos cuida metre a destrucion .xxx. anz alates par terre ce savon o voz apostres preechant vostre non la Madelaine feites le pardon qant a voz piez vint plorer chies Simon Judas le fel vos vendi a bandon .xxx. deniers molt en ot povre don En croiz vos mistrent li mal Juif felon mort i sofrites por no sauvacion et au tierz jor eus surrexion enfer brisates n i ot desfansion les voz amis gitates de prison tuit sont en gloire en vostre mension El ciel montates a jor d Acension Si voirement com nos ice creon et com c est voirs que nos ci devison si guerisez Olivier le baron que ne l ocie Rollans li nies Charlon Biau sire Deus par vo seintime non metez entr aus pes et acordoison se l un en muert par aucune achoison ja n en remendrai vive Molt se demente bele Aude o le cler vis li dus Renier et Girarz li marchis et tuit li autre el palais seignoris por Olivier le bon vasal de pris qui vers Rollant s est en bataille pris grant poor ot trestoz li plus hardiz Li cuens Rollanz fu chevaliers hardiz et Olivier preuz et amaneviz a Rollant giete un cop en mi le vis tranche le cercle del vert elme bruni et del nasel a grant piece jus mis Li cous descent sor le hauberc treliz tranche des mailles plus de .LX. dis de ci en terre descent li brans forbiz Seinte Marie dit Rollans li marchis Par grant pechie dui estre mal bailliz et tornez a domaje El duc Rollant nen ot que corrocier qant de son hiaume vit le nasel tranchier et son hauberc deronpre et demaillier plus de .C. mailles en gisent en l erbier Tint Durandart dont bien se sot aidier pas avant autre s en vet vers Olivier grant cop li done sor son hiaume vergier encontreval coula le branc d acier .C. mailles cope del blanc hauberc doblier del flanc senestre li fist le sanc raier le fiz Renier covint agenoillier Honteus en fu ce puis bien afichier en piez resaut en guise d ome fier si se desfant en guise de guerrier Deus reclama le verai jostissier qu i le guerisse de mort et d anconbrier q ancor revoie son bon lingnaje fier le duc Girart qui molt fist a proisier et sa seror et son pere Renier Sire Rollant dit li cuens Olivier est ce Joieusse la Charles au vis fier dont vos savez si ruistes cous paier Nanin biau sire dit Rollant le guerrier c est Durandart m espee au pont d or mier dont je vos cuit ancui si jostissier que dant Girart en ferai corrocier qui ci vos fist en bataille envoier Mar l enpreites certes dit Olivier hui est li jorz que le conparroiz chier se Deus guerist mes armes Qant Oliviers a son hauberc veu que Rollant a demaillie et ronpu a Durendal son branc d acier molu le cuer en ot dolant et irascu Tint Hauteclere onques mieldre ne fu et fiert Rollant sor l iaume par vertu que flors et pierres en a jus abatu li cous descent l auberc a conseu le pan en tranche n i a aresteu devant lui chiet en mi le pre herbu Deus dit Rollant com or m a conseu Molt tranche bien le branc d acier molu et cist vassaus est molt de grant vertu ne m aime mie bien m en sui perceu Olivier l ot si li a respondu Sire Rollans bien vos ai entandu si m eist Deus qui totans est et fu grant tort avez vers moi del tot eu c est sor mon pois que me sui conbatu Mes s il plessoit au verai roi Jhesu qu eusse .I. pou vostre orgueil abatu molt joianz en seroie En l ille furent li dui baron vaillant onques ne furent si hardi conbatant granz cous se donent des espees tranchanz Es vos Girart sor le mur en estant dist trois paroles li frans dus en oiant Oliviers nies Deus te soit hui garant li glorieus par son disne comant Se tu conquiers ancui le duc Rollant et tu le fes veincu ou recreant james li rois ne nos ert bien voillant ne ne ferons a lui acordement Et d autre part est Charles le puissant a oroisons dedanz son tref plus grant ou il deprie Jesu escordement que il guerise son chier neveu Rollant que il ne soit veincuz ne recreant ne tornez a viltage Li baron furent a pie en mi la pree chascuns el pong tenoit nue s espee lor armeure ont si route et copee que c est merveille qu il n ont la vie otree Dedanz Vienne en font molt grant criee et d autre part ont grant dolor menee En l ost Charlon a la barbe mellee .C. chevaliers sanz plus de demoree s en adoberent coiement a celee desoz Vienne s enbuchent en la pree por Olivier a la chiere menbree cui il eussent ja la teste copee Mes la novele fu a Charle contee par mautalant a sa barbe juree n i a baron de si grant renommee s il fesoit outrage ne posnee q il ne pandist a une arbre ramee. Qant cil l oirent si font la retornee la bataille ont tote en pes esgardee si metent jus les armes A pie en l ille sont li dui baron fier granz cous se donent sor les hiaumes vergier que li feus vole des brans forbiz d acier toz lor escuz ont fet si detranchier et lor haubers si ronpre et demaillier que la moitie n en i ot pas d entier Lors se porpanse dant Rollant le guerrier coment porroit Olivier essaier s est si loiaus com dient chevalier Sire Olivier dit Rollans au vis fier je sui malades nel vos puis plus noier si me vodroie .I. petitet couchier por reposer que g en ai grant mestier Ce poise moi sire dit Olivier mieuz vos amasse conquerre au branc d acier que d autre chose eusiez enconbrier Or vos alez se il vos plest couchier sor mon escu c avez fet detaillier vant vos ferai por vo cors refroidier juqu a cele eure que seroiz plus hetiez Rollant l antant prist soi a merveiller a haute voiz comenca a huchier Sire Oliviers molt avez fol cuidier je nel fesoie fors por vos essaier Je conbatroie .IIII. jorz toz entiers ja n i querroie ne boivre ne mengier Et je voir sire dit li cuens Oliviers or repoons l estor recomencier Et dit Rollant Je l otroi volentiers juqu a demein a soir a l anuitier Lor recomence le chapleiz molt fier mes la suor les fist si engoissier qui lor avale contreval le braier qu il ne se puent ne tant ne qant aidier Voit le Rollans prist soi molt a irier Sire Olivier dit Rollans le guerrier einz mes ne vi si puissant chevalier qui tant durast vers moi a chaploier Sire Rollant dit li cuens Olivier bien sai que tant com Deus me veille aidier ne dout ge home qui me puist domagier ne qui ja mal me face Des barons fu la bataille fornie et fiers li chaples et ruiste l envaie einz de .II. homes ne fu plus fiere oie Ja lor bataille ne fust mes departie einz en eust li uns perdu la vie qant Deus i mist si boine conpangnie qui puis dura toz les jorz de lor vie juqu a un jor qu ele fu departie en Rancevaus en la lande enhermie par Ganelon qui li cors Deu maudie qui les vandi a la gent paiennie au roi Marsile qui Jesu maleie Onque mes jor en France la garnie n avint si grant domaje Cele bataille orent tant meintenue que ja lor fu molt pres la nuit venue mes n ont talant de fere recreue car mautalant les semont et argue si tient chascuns s espee tote nue Li uns a l autre l eust ja chier vendue qant entr aus .II. descendi une nue qui au barons a toloit la veue Trestuit sont coi nus d aus ne se remue au plus hardi est tel poor creue que bien cuidoient que lor fin fust venue Es vos un engre qui descent de la nue qui doucement de par Deu les salue Franc chevalier ennor vos est creue Cest bataille ne soit plus meintenue gardez que plus ne soit par vos ferue car Damedeu la vos a desfandue Mes en Espangne sor la gent mescreue soit vostre force provee et conneue la sera bien vo proece veue por l amor Deu conquerre Li dui baron furent en grant fricon qant ill oirent de Deu l anoncion Et dit li engres N aiez poor baron Deus le vos mende de son ciel la amont lessiez ester iceste aatison Mes en Espangne sor ce pople felon la esprovez qui est hardiz ou non par mi le resne au roi Marsilion La conquerroiz par force le roion sor Sarrazins a force et a bandon si essauciez la loi Deu et son non Vos en avroiz molt riche guerredon et les voz ames avront verai pardon la sus el ciel en sa grant mension les metra Deus en gloire Qant li baron orent l enge escoute qui la bataille lor defant de par De le glorieus le roi de majeste Voir fois celestre font li baron menbre vos en soiez come Deu aore qant nos avez tel mesaje mende par le vostre angre qui a a nos parle Vait s en li engre n i est pas demore et li dui conte ne sont pas areste Seinz Esperiz les a enluminez reposer vont soz .I. arbre rame la sont endui plevi et afie a conpangnie en trestot lor ae Rollant parla au coraje adure Sire Oliviers ja ne vos ert cele je vos plevis la moie loiaute que plus vos ain que home de mere ne fors Charlemene le fort roi coronne Puis que Deus veut que soions acorde james n avrai ne chastel ne cite ne borc ne vile donjon ne fermete que ne partons se il vos vient a gre Audein prendrai se vos la me donez et se je puis ainz .IIII. jorz passez seroiz a Charle paiez et acordez Et si n en fet tot a ma volente qu il ne vos veille otroier s amiste a vos irai leanz en la cite ne li faut guerre en trestot son ae Oliviers l ot si l en a mercie en .II. ses meins en tant vers Damede Glorieus Sire vos soiez aore qui a cest home m avez hui acorde Sire Rollant ne vos ert plus cele je vos aim plus q omme de mere ne Ma suer vos dong volentiers et de gre par tel covant com ja vos ert conte que vers Charlon soion bien acorde Or deslaciez ce vert elme jeme tant que soions bessie et acole Et dit li dus Volentiers et de gre Tot meintenant ont lor chies desarmez si s entrebesent volentiers et de gre Pui sont assis sor l erbe vert el pre lor foiz plevirent par bone loiaute et conpangnie a trestot lor ae Einsi fu lor pais fete Qant li baron orent erre issi il s entrebesent puis si sont departi a tot jorz mes furent puis bon ami Francois les voient molt furent esbahi et l enperere de France les choisi Deu reclama qui onques ne menti Glorieus Deu par la teue merci plet ai veu onques mes tel ne vi de mon neveu que j avoie norri qui a besie mon mortel ennemi Grant poor ai que il ne m ait trahi et lui meismes vergonde et honni Si l avoit fet plus m avroit mal bailli ne fist Judas qui Damedeu trahi C est por Audein Ganes li respondi qu il aime tant por verte le vos di que ceste pes a il fete por li Naimes l antant cele part est verti en haut parla que li rois bien l oi Droiz enperere ne vos esmaiez si lesiez venir le franc conte hardi Lors si savroiz quel plet ill ont basti por qu il sont bien ensenble Droiz enperere dit Naimes le puisant lesiez venir vostre neveu Rollant Que savez vos com li est convenant Par cel apostre que quierent peneant je en feroie joise en feu ardant ou conbatroie envers .I. amirant que traison n i fist li dus Rollant Il nel feist por la cit de Melant Es vos Rollant qui est venuz avant passee ot l eve et issuz del chalant un palefroi li amoinent devant li dus i monte par l estrier a argent de ci a l ost en vint esperonnant Meint chevalier li ont fet biau senblant qui de lui ont grant joie Li dus Rollant est fors de l ille issuz et Olivier a cui s est conbatuz Lor escuz ont et troez et fanduz les hantes fretes et les espiez moluz et de lor hiaumes les cercles abatuz et lor destriers ocis et confonduz as ruistes cous des bons brans esmoluz Devant son tref soz .I. arbre follu fu l enperere o .II. C. de ses druz qui trestuit proient Jesu et ses vertuz por les barons que nus n en fust veincuz En mi la place est Rollant descenduz au desarmer en sont .xxx. coruz et l anperere li est devant venuz et meint baron qui li randent saluz Biau nies dit Charles bien soiez vos venuz Molt longuement vos estes conbatuz Que fait Girarz Dont n est il recreu Rendra vos il ce grant pales voluz Voir dit Rollant ne l ai pas entandu la dont je vieng n en fu ainz plet tenu Einz dient tuit et chaut et cheveluz par vostre orgueil est toz cist plez meuz Ralons nos en que ja n en ferons plus Droiz enpereres se mes lous ert creuz Girart sera voz amis et voz druz s alons en France n i ait plus atendu Charles l entant molt en fu irascuz ou voit Rollant si l a por fol tenu Fous dit li rois Com m avez deceu Ou est Oliviers Avez le vos veincu Nanin voir sire Rollans a respondu que Damedeu ne l a pas consantu par .I. sien engre le m a bien deffandu et une nue qui le me ra tolu Por voir vos di c onques teus hom ne fu il ne doute home tant soit de grant vertu Contre moi s est fierement conbatu qanque li ai preste m a bien rendu car de granz cous i ai tant receuz pis m en sera dedanz .VII. anz ou plus Dedanz Vienne est Oliviers venuz li granz barnajes est contre li venuz Mile de Puille et Hernaut li chenuz Renier de Genvres Aimeri li menbruz a molt grant joie l ont entr aus receu Il le desarment n i ont plus atendu del chief li ostent son hiaume a or batu del dos li traient l auberc maillie menu Grant fu la plaie qui el coste li fu Voit la Guiborc grant duel en a eu plus sage dame onques de lui ne fu oignement ot qui vint de par Jhesu Olivier oint le coste et le bu lors fu si sains c onques mes plus ne fu Puis l en menerent el grant pales volu encontre vait bele Aude Dedanz Vienne fist joie li barnez por Olivier qui est vis eschapez de la bataille dont il est retornez Et qant li cuens fu el pales entrez de sa suer Aude fu forment acolez Et Rollans fu devant Charlon as tres et Charlemenes l en a aresonne Biau nies dit il com vos est encontre Ou est remes Oliviers li menbrez Avez le vos veincu Nel me celez Nanin voir sire ja mar le cuiderez vos n avez home par cui il fust matez La merci Deu a moi s est acordez dedanz Vienne s en est toz saus alez par son seint angre nos a Deu desevrez se ce ne fust li uns en fust outrez Et dit li rois Deus en soit aorez Je ne vosise por .C. mars d or pesez que il i fust ocis ne afolez Icele nuit s est chascun reposez juqu au demein que il fu ajorne Li enpereres est par matin levez au mostier vait li bons rois ennorez de bon cuer a le servise escoute Qant messe est dite et servise fine del mostier ist l enperaor loe ester s en vint devant l uis de son tref Ses nies Rollans l en a aresonne Oncles fet il envers moi entendez granz est li sieges entor cele citez dure a ja plus de .VII. anz passez Haut sont li mur que paiens ont fermez a ferrement n a picois acerez n en porroit estre .I. seul carrel ostez tant est li uns en l autre seelez Fiert i li Rosnes qui li cort par delez estre i porroiz .XXVII. anz passez einz que prengnoiz les mestres fermetez Au duc Girart car vos i acordez Et dit li rois Por neant en parlez n en tornerai en trestot mes aez si ert la vile et li hauz murs versez Ses prang a force mal lor ert encontre n i avra .I. qui ne soit desmenbrez Et dit Rollans Del menacier pansez Ore i parra coment vos le ferez Mes une chose sachiez par verite james espee n en ceindre a mes lez Charles l antant molt en fu abosmez Biau nies fet il .I. petit m entendez bien sai coment esploitie en avez qant en cele ille en pasates armez contre Olivier dont estes retornez Par vos cuidie mes droiz fust aquitez mes por bele Aude vos estes acordez dont Olivier vos a le gant done Et dit Rollant Vos dites verite Oliviers est vassaus molt alossez biaus et cortois et d armes esprovez ne porroit estre teus .III. Francois trovez Ce est grant chose d un ami conquester Se ge et il somes or acordez vos et Girart vostre pes referez que par l apostre c on quiert en Noiron pre james espee n en ceindrai a mes lez Gloz ce dit Charles James ne t iert rove Fui de mon ost trop ies desmesurez Non ferai sire dit Rollans li menbrez ne m en irai tant com vos i serez eincois verrai coment vos le ferez vers Girart de Vienne Seignor baron bien l avez entendu et un et autre viel et juenne et chenu molt fu li rois vers Girart irascu tant que .VII. anz li a siege tenu a qatre rois et a .XIIII. dus a .XXX. contes qui sont de grant vertu de l autre enpire n i fu conte tenu par .IIII. foiz .XL. mile et plus l arriere ban de France i est venu et les perrieres et les engins veuz Et Girart fu au fenestres lasus tainte ot la char de l auberc c ot vestu dame Guiborc par encoste lui fu plus bele dame n ot onques rois ne dus Ou voit Girart si li a menteu He gentis hom coment te contiens tu Bien te puet l en tenir por recreu si te destraint Charles au poil chanu et a ton resne gaste et confondu .X. liues puet corre .I. destrier crenu que tant de ble n i trovera creu dont .I. chevaus fust .I. seul jor peu Se mi consauz eust este creu ne fust li resnes gastez ne confondu ne li alues au roi reconneuz ne le conques de Vienne renduz A cez paroles est Oliviers venuz ja parleront ensenble Ce fu en mai que la rose est florie l orieus chante et la mauviz s escrie florisent gaut et herbe reverdie chascune eve est en son chanel vertie molt est pansis amanz qui a amie sovant sopire qant ne l a en baillie Charles li rois a la barbe florie fu en son tref de soie d Aumarie devant Vienne la fort cite garnie tout entor lui sa riche baronnie Contes et rois ot en sa conpangnie et dus et princes et lor chevalerie meint haut baron ot en sa seignorie Et Deus dit Charles qui tot as en baillie glorieus Pere qui naquis de Marie de .VII. rois ai conquis la seignorie par pooste et par chevalerie les ai toz mis en la moie baillie Trestuit me servent et font ma comendie si tient chascun de moi sa menentie Ci voi un duc de povre seignorie dedanz ma terre a ci sa menantie si ne m en sert la monte d une alie se ne l en trai mieuz veil perdre la vie Ce dit Richart li dus de Normendie Droiz enperere ne vos esmaiez mie mendez leanz en la cite garnie au duc Girart qui si vos contralie que il vos rende cele cite antie les fortereces et la grant menentie et si vos serve il et sa conpangnie Et si nel fet par Deu le fiz Marie vos li feroiz une fort asaillie Francois sont fier et bone gent hardie et preu de guerre et de chevalerie siege tendront en ceste praierie si lor rendront meinte fiere asaillie n en partiront james jor de lor vie tant que prise ert la cite et sessie Se pranz Girart si en fai deceplie au jugement de ta grant baronnie Ce respont Charles a la barbe florie Vos dites bien Richart de Normendie Dedanz Vienne en la sale votie estoit Girart a la chiere hardie lez lui Guiborc la duchoise s amie apele le come bien enseignie Sire Girart por Deu le fiz Marie car prenz conseil frans hom chiere hardie a tes barons a ta chevalerie de ceste terre qui si est essillie et si lonc tans ta cite asegie Trop vos a ja coste ceste folie car de Borgongne de ci en Lonbardie a Charles arse ta terre et desertie Car t i acordes por Deu le fiz Marie Dit Olivier a la chiere hardie Vos dites voir ma dame seignorie Car en parlons se mes oncles l otrie a Hernaut de Biaulende A iceu tans que vos dire m oez ot en Vienne .II. granz pales fondez toz li plus povres si estoit biaus assez En l un estoit dant Hernaut li barbez en l autre fu dant Girart li senez II n est nus hom qui de mere soit nez qui deviser seust les granz bontez ne les richeces des .II. pales listez Dame Guiborc au gent cors ennore del pales ist s avale les degrez par mi les rues s en vet de la cite juqu au pales dont vos oi avez la ou estoit dant Hernaut li menbrez La dame monte contremont les degrez trova Hernaut qui tant fu redoutez ou il jooit as tables et as dez Qant voit Guiborc encontre s est levez son destre braz li a au col gite puis li a dit Ma dame que querez Est ce besong Gardez nel me celez Sire fet ele jeu vos dirai assez granz est li sieges devant ceste citez ja a dure plus de .VII. anz passez Charles i est li forz rois coronnez et ses barons si que bien le savez l arriere ban a des Francois mendez n i remeint hom qui de mere soit nez se ce ne sont clerc ou prestre ordenez que ca ne soient venu et asenble nes les puceles au genz cors ennorez cui ill a ja riches mariz donez N en torneront nul jor de lor aez s iert la vile arse et les murs craventez. Girart mes sires sera toz desmenbrez s il est ceanz ne pris ne atrapez et vos meismes ja ne vos iert cele Mile de Puille et Renier li menbrez et Aimeri li danziaus alossez et Olivier qui tant est redoutez et mes .II. fiz seront desheritez Savariez et Bueves li ainznez et li miens cors ert a honte livrez Dit Hernaut Dame vos dites verite Mes g en ferai totes voz volentez se g en devoie a honte estre tornez et a reproche de la crestiente seu fere ge por l amistie de De et por vos dame qui proie m en avez Sire fet ele Deus vos en sache gre Del pales issent s avalent les degrez par mi les rues s en sont a pie alez Girart encontrent le franc duc naturel qu iert descenduz de son pales liste ja parleront ensenble Que que Girart parole a sa moillier et a Hernaut son frere le guerrier atant es vos Renier et Moreheier ensenble o eus fu le conte Olivier qui molt se poine de la pes porchacier Ja fust li plez graez et ostroiez et li mesages por la pes envoiez mes Aymeri fu molt outrecuidiez endroit le vespre ala au tres lancier eu tref Charlon a mort son conseillier et Guielin son mestre despansier Li rois le voit n i ot que corrocier a voiz escrie Ore apres chevalier S il vos eschape pou vos doit en prisier A ice mot ne vellent plus targier et cil s en torne qui ne vost delaier Au dos l enchacent tel .III. C. chevalier qui le menacent de la teste tranchier de ci au Rosne ne le vodrent lessier Mes Aymeris a guerpi son destrier en un batel se fet outre nagier si l en menerent .XIIII. notonnier juqu a Vienne ne vodrent atargier El palais monte contremont le planchier Voit le Girart seu vait contralier He gloz fet il Deus te doint enconbrier Por c alas hui au tref Charle lancier Or nos as fet nostre pes delaier que volions envers lui porchacier Ja fesions .I. mesage envoier por la pes fere graer et ostroier A ces paroles es vos .I. mesagier qui ceus de l ost seut aler espier bien ot oi les barons conseillier que Charlemenes devoit aler chacier Ou voit les contes si lor prist a huchier Sire Girart et vos sire Renier et vos Hernaut de Biaulande le fier vos soulez estre tant hardi chevalier et plus doutez que foudre ne tenpier Or ne vos prisent cil de l ost .I. denier par vos prez pessent lor auferrant destrier demein ira l enperaor chacier dedanz Clermont vostre grant bois plenier n ierent o lui mes que .VII. chevalier Ensenble o lui ert Ote le Baivier et de Pavie le Lonbart Desier et avec aus le riche duc Gaifier Se Deus m eist le Pere droiturier tuit cil troi prince ne valent .I. denier por aus desfandre ne por autru aidier Girart l antant n i ot que leescier entr eus en pristrent li conte a conseillier Seigneur baron or de l apareillier Se de tel honte ne nos poons vengier mau daaz et qui nos done a mengier De ci a .XX. s en vont apareillier vestent haubers lacent elmes d acier cengnent espees a lor flanc senestrier puis est montez chascun sor son destrier a lor cous pandent les escuz de cartier en lor poinz pranent les roiz tranchant espiez Alument cierges en riches chandeliers en la croute entrent par desoz le terrier paiens la firent lontans ca en arrier ausin est blanche come nois sor gravier Leanz se metent tuit li .XX. chevalier par desoz terre pansent del chevalchier tant que il vindrent .I. poi ainz l esclerier en la meson Berart le forestier icil devoit le bois eschaugetier Toz lor chevaux lessent en un ramier a l erbe pestre et au vant refroidier a lor espiez montent en un lorier Au matinet qant soleil dut raier li rois se lieve por soi apareillier D unes granz hueses se fist le jor chaucier fet ses cors prendre acopler ses levriers ensenble o lui montent si chevalier en la forest en sont alez chacier Se Deus n en pense n en porra reperier nostre enpereres Charles Li enpereres en est au bois venuz ses chiens descouple dedanz se sont feruz un porc esmuevent merveilleus et cremu li chien glatisent si ont leve le hu cil veneor chacent par grant vertu Li rois chevauche .I. palefroi crenu toz les trepasse et chauz et cheveluz Grant mescheance est au roi avenu en une lande l ont si home perdu onques ne sorent quel voie ill ont tenu Par .I. sentier qui vieuz et gaste fu s an va li pors et li chien l ont seu et Charle apres tantost com l a veu Tant l a chacie que il l a conseu a la fontaine soz .I. arbre foillu s esta li pors si a estal randu Charles le voit a terre est descendu si le requiert com hom de grant vertu tant qu i l ocit a son branc esmolu Trest le coutel le past li a tolu li enpereres l a a ses chiens rendu et corne prise car il l a retenu Et cil Berart qui del bochage fu a tant le roi tote jor porseu einz ne fist tor que il n ait bien veu Juqu a Girart n i ot resne tenu ou qu il le voit si li a menteu Biau sire dus ne soiez esperdu Le roi de France vos ai tant porseu que je sai tot com li est avenu A la fontaine a le porc abatu la est toz seus desoz l arbre foillu n a avec lui ne juenne ne chenu car tuit si home l ont par le bois perdu ne set nus d aus que il est devenu. Girart frans dus por coi demores tu Or le puez prendre sanz lance et sanz escu s en feras ta jotisse Qant ce entandent li chevalier hardi trestuit ensenble s escrient a .I. cri Montez seignor por le cors seint Dani Et il si firent volentiers non enviz Esploitez vos ce a dit Aimeri Lors s en tornerent par mi le bois foilli et cil Berart lor fu chadiaus et gui Nel sot li rois ne garde ne s en prist devant qu il l ont de totes parz sessi par mi la resne del destrier arrabi Li dus Girart ne le mist en obli molt tost sessi le bon espie forbi puis li a dit Dant rois veez moi ci Vos cuidiez que ge fuse endormi dedanz Vienne et de fein alenti Non sui par foi eincois sui trestot vis Corne avez nos l avon bien oi et entendu et voz moz et voz diz Miens ert li pors a grant tort l avez pris ore en seront mes chevaliers serviz et ma moillier au gent cors seignori Et vos meismes en vendroiz avec mi Dit Aimeri Biaus oncle car l oci Pran en la teste tot meintenant ici Si remendra la guerre et li estris Ne place Deu Girart li respondi que rois de France soit ja par moi honniz Ses hom serai s il a de moi merci de lui tendrai ma terre et mon pais Et si nel fait par le cors seint Moris je m en irai el resne as Arrabiz Moie ert la honte si en sera plus vis nostre enpereres riches Qant Charle entant de Girart le cortois qui si li crie merci par bone foi et si n estoit de rien en ses destroiz envers le ciel regarda .IIII. foiz Et Deus dit Charles qui sor toz estes rois meinte miracle avez fete por moi Iceste guerre Girart le Viennois doutoie plus que nule riens qui soit Deus me confonde se james le guerroi Venez avant Girart le Viennois Que volez sire dit Girart li cortois Jeu vos dirai ce dit Charles li rois vos avroiz pes tele com vos vodroiz en douce France vostre comant feroiz de mes forfez vos en pardong les droiz le tierz denier vos en dong et otroi Bien ert venuz qui vos i ameroiz et mau bailliz qui de rien i herroiz Ne place Deu dit Girart li cortois que parconniers soiez ja contre moi Hernaut mes freres qui est ainnez de moi doit estre sires en toz leus desor moi Lors s agenoille Hernaut devant le roi ses hom devint loiaument sanz belloi et en apres Girart de Viennois Mille de Puille li replevi sa foi et Olivier li preuz et li cortois Ja plus felon d Aimeri ne verroiz a une part se tint a un recoi por esgarder et les torz et les droiz les amendises qu il fesoient au roi Vasal dit Charles dites quel la feroiz Feroiez vos pes ou vos guerroieroiz Ne sai biau sire dit Aimeri par foi qant ge mon pere et mes oncles ci voi qui si sont pris come oiselet au broi qui eincois crie que li cous soit chaoit de Damedeu soit ses cors maleoiz Puis que ces autres avez en voz destroiz je ne veil pas guerre mener par moi mes qanqu il dient creant bien et otroi Servirai vos si come fere doi et apres ce verrai que vos feroiz se bien me fetes grant aumosne i avroiz Vos dites bien amis ce dit li rois et Olivier et vos me serviroiz et mon neveu dant Rollant seroiz trois et m oriflanbe en estor porteroiz Vostre merci dit Aymeris dant rois Gloz dit Girart A son pie en iroiz Dont n oez vos que il vos aime en foi Dit Aymeris Biau sire je l otroi Agenoillier se vet devant lou roi mes l enperere l en leva contre soi Et dit Hernaut Sire quel la feroiz Iroiz en l ost ou avec nos vendroiz dedanz Vienne ou ennorez seroiz Si l orront dire Alement et Tiois que Charles a Vienne Et dit Hernaut Bons rois ore entendez iroiz en l ost ou avec nos vendrez dedanz Vienne ou seroiz ennorez S estions ore dedanz vostre ost entrez einz que Francois seusent la verte que nos fusons paie et acorde serions nos ocis et afole Et dit li rois Vos dites verite Droiz enperere dit Girart li menbrez par desoz terre se vos le comendez nos en irons ainz qu il soit avespre droit en Vienne la mirable cite par une cave de viel antequite Paiens la firent molt a grant tans passe Respont li rois A vostre volente gardez frans dus qu il n i ait laschete Respont li dus De folie parlez je nel feroie por estre demenbrez A ces paroles sont en la croste entrez Li foretiers Berart fu molt senez feu en lanterne lor a devant porte par desoz terre se sont achemine Molt s en merveille Charles li rois menbrez ou voit Girart si l a aresone Sire frans dus a moi en entandez tant ai conquis et chastiaus et citez tote la terre de ci a Baleguez ne vi tel cave ne tel chemin ferre .VII. anz toz plains avons ci converse einz ne seumes de ce chemin verte encore i fusse autre .VII. anz passez einz que fusiez ne pris ne afamez Voir dit Girart en trestot voz aez n eusiez prises noz mestres fermetez car par ici seu ge chacier aler prendre mes pors et mes cras cers ramez d estrange terres mes avoirs amener dont en Vienne fesoie largetez et estiens richement conreez Voir dit li rois je le pansoie assez A ces paroles sont en Vienne entre En mi la place soz .II. arbres ramez la descendi li rois et si barnez puis l en menerent sus el pales listez la fu a joie serviz et ennorez Dame Guiborc au gent cors ennore o lui bele Aude qui tant ot de biaute de seint Morise reperoient d orer ou eles orent molt longuement este por Deu proier lou roi de majeste que il sauvast Girart le duc menbre et les barons qu il ot o lui menez par mi la cave dedanz le bois rame Dame Guiborc ot molt le cuer sene ou voit le roi si le connut assez au fier regart et au vis et au nes au chief devant que ill ot fenestre Ou voit Girart si l a aresonne Dites frans dus ou fu cist rois trovez Gardez por Deu qu il n i ait cruaute ne li faciez riens nule outre son gre Mes a son pie molt tost vos presantez si li randez Vienne en herite Dame fet il a tart avez parle des hui matin ai fet sa volente devenuz sui ses hom et ses chasez si li ai fet homaje et feute et tuit mi frere que vos ici veez Deus dit la dame Vos soiez aorez Qui une nuit le porroit osteler et en Vienne servir et ennorer toz ses lingnajes en seroit alevez Dit Girart Dame bon loisir en avez de fere son servise Oiez seignor Deus vos soit en aiue Ceste chancon n est pas par tot seue Tel vos en chante qui n a pas retenue la droite estoire c avez ci entandue si com Charlon a la barbe chenue fu pris chacent en la serve ramue qant l en mena en sa cite cremue li dus Girart come oisel pris en mue Grant joie firent le jor de sa venue tuit li baron et l autre gent menue Dame Guiborc est devant lui venue qant el le voit gentement le salue Einz plus grant feste ne fu d omme veue com la nuit a l enpereres eue n a pas la nuit male prison eue car tuit le servent baron et gent menue Mes de l ennor que li rois a eue ne fu la nuit nule chose seue Cil qui chacierent en la selve ramue avec Charlon a la barbe chanue qant de lui n orent oie ne veue arriers au tres ont lor voie tenue La gent de l ost est encontre venue le roi demendent de France l asolue Seigneur dit Naimes a la barbe chenue iceste terre soit hui la confondue Haut sont li pui et les roches agues et les valees enhermies et drues qant li rois ot sa venoison meue tant la chaca que il l ot retenue puis n en oimes ne noise ne veue ne ne savons quel voie ill a tenue Se or l encontrent paisant a l oisue a cui ill a lor grant terre tolue tost li feront molt grant decovenue Et qant ill ont la novele entendue einz ne veites gent plus fort irascue Lors fu li oz de grant duel comeue nus cele nuit n i boit ne ne menjue n a bon cheval n i ot sele tolue juqu au demein que l aube est aparue firent baron grant duel et gent menue por le roi Charlemene Par mi l ost furent corrocie et dolant conte et baron chevalier et sergent por Charlemene le riche roi puissant dont il ne sorent ne tiois ne romant Mes l enperere au coraje vaillant fu a grant aise en Vienne la grant ilec le servent li franc conte puisant li dus Girart et si apartenant Riches mengiers orent cele nuit tant et luminaire qui el pales resplant que plus n en vit nus hom qui soit vivant Des riches mes ne faz devisement tant en i ot chascun a son talant et de clare de vin et de piment del deviser seroit .I. ennui grant Au roi son oste fet Girart biau senblant les mes li porte il meismes devant et Oliviers li tient la nef d argent Li autre conte sont pres de lui seant li cuens Hernaut de Biaulende la grant Renier de Genvres au coraje vaillant Mile de Puille a l adure talant et Aimeri les sert cortoisement De l autre part delez le roi puissant se sist Guiborc au coraje vaillant lez lui bele Aude au gent cors avenant de sa biaute toz li pales resplant Li rois l esgarde et menu et sovant Girart apele si li dist en oiant Biau sire dus ore oiez mon talant ceste pucele qui a de biaute tant donez la moi car ge la vos dement Je la donrai a mon neveu Rollant n a chevalier meillor el mont vivant endui ensenble seront bien avenant Dist Girart Sire tot a vostre comant fere en poez tot a vostre talant Par devant toz l en a done le gant Charles li rois l en mercie forment Qant mengie ont li chevalier vaillant les napes traient escuier et sergent Par le pales vont grant joie fesant li uns viele l autre conte romant puis vont couchier endroit les cois chantant En une chenbre qui ot biaute molt grant la ont couchie l enperaor puissant dedanz .I. lit si bel et avenant onques plus riche n ot cuens ne amirant Se cil de l ost qui por lui sont dolant seusent ore com li est covenant molt plus a esse en fusent li auqant car l enperere au coraje vaillant dort molt a esse et molt seurement dedanz Vienne juqu a l aube aparant Par matinet ainz le soleil levant lievent au tres chevalier et sergent Naimes li dus qui le poil ot ferrant lui et Rollant et troi mile sergent par la forest vont tuit le roi querant par ces valees et par cez desrubanz Qant ne le truevent forment en sont dolant a l ost reperent plain de grant marrement Mes en Vienne sont molt lie et joiant de ce qu il ont l enperaor puisant Li rois se lieve qant vit l aube aparant li dus Girart et li baron vaillant a Charlemene en sont venu devant si le saluent de Deu le roiaument A la chapele en vont trestuit errant messe lor chante li evesques Morant la ot offert meint paile et meint besant Apres la messe ne vont plus arestant Charles li rois et Girart le vaillant sor les destriers en montent meintenant et avec aus dui mile conbatant Apareilliez furent molt richement de riches robes et de biaus garnemenz sanz nules armes chascun joie fesant s en isent de Vienne Charles li rois a la fiere vertu li dus Girart si ami et si dru a molt grant joie sont de Vienne isu dui mile furent sanz lance et sanz escu Grant joie moinent et grant cri et grant hu tuit aroute s en sont vers l ost venu Naimes li dus et Rollant l ont veu et cil de l ost molt en sont esperdu li plus hardiz en a poor eu Seigneur dit Naimes mal nos est avenu qant si avons Charlemene perdu Vez quele gent sont de V•enne issu Ce est Girart et avec lui si dru qui sor nos vienent a force et a vertu De Charlemene se sont aperceu que nos avons par tel pechie perdu Qant cil l antandent molt en sont esperdu as armes corent li grant et li menu es destriers montent auferrant et crenu sonent ces cors a force et a vertu Qant adobe sont et juenne et chenu encontre Charle en sont pongnant venu Charles s en rit qant il les a veuz Girart apele qui dejoste lui fu Biau sire dus cist ont poor eu Contre nos vienent arme et fervestu S or volions foi que doi a Jesu ja i avroit meint ruiste cop feru Pou sevent ore com lor est avenu g irai avant tant qu il m aient veu Lors a brochie son auferrant crenu de ceus se part qui o lui sont venu Naimes encontre et Rollant le sien dru et qant ill ont leur seignor conneu onques mes jor n orent tel joie eu Meintenant sont contre lui descendu s oste chascun del chief le helme agu Seignor dit il ne soiez pas esperdu Cest ost avez por neant esmeu La merci Deu bien nos est avenu ore avons ce c avons tant atendu moi et Girart somes ami et dru s est remesse la guerre Qant li baron ont le roi escoute que cil lor dit que il sont acorde au duc Girart qui tant les ot penez n orent tel joie en trestot lor aez Chascun respont Deus en soit aorez bien ait par cui cist plez est devisez c ore en irons arriere en noz resnez ou nus ne fu bien a .VII. anz passez A ces paroles sont au tres retorne la descendirent si se sont desarmez Charles descent devant l uis de son tref ses barons mende ses princes ses chasez el faudestuel est meintenant montez Ou voit ses homes ses a aresonnez Baron fet il envers moi entendez ier m en alai chacier bien le savez el bois estoie moi sestiemes entrez chacai le porc qui tant fu redoutez Qant l oi feru de l espie noile vint i Girart et son fier parente lors cuidai estre et morz et afolez Mes vers moi fu si plains d umilitez c au pie me vint li frans dus ennorez si me cria merci come senez il et Hernaut li preuz et l alossez Qant ge les vi si m en prist grant pitez por ce c avoient desor moi poostez pardone lor par bone volentez Einz mes en gent ne vi tel loiaute Or si vos pri quel conseil me donez De lor pais que ge lor ai gaste en quel maniere lor sera amende Sire dit Naimes ore avez bien parle Si m eist Deus jel vos disoie assez que vers Girart molt grant tort aviez Si m eist Deus se ne lor amendez james n avroiz m amistie ne mon gre Naimes dit Charles vos dites com senez Sire Girart dit il avant venez ci vos ren ge quites voz heritez de douce France les ennors garderez bien ert de cort cui vos i amerez cui vos harroiz mar i sera trouvez einz s en aut povres et toz desheritez Dit Girart Sire .V. C. merciz et grez Tant haut com fu li est au pie alez Charles et Naimes l en ot sus releve Adonques fu par tot li bans criez que li marchie soient abandonez et qui sera de rien nule enconbrez ne qui perdra .II. deniers moneez a .IIII. doubles lor sera restore Lors comencierent marcheant a errer qui les avoirs ont a vendre aporte des le matin que il fu ajorne de si au soir que il fu avespre ne finent il de venir ne d aler que tote en fu enplie la cite Defors la vile se logent enz es prez et ont lor tres et paveillons fermez Grant joie moinent li baron et li per et clerc et prestre et moine coronne de la pes qu est juree Ce fu en mai qu il fait chaut et seri foillisent bois et pre sont reverdi pucele est liee qui est lez son ami cil oisel chantent clerement et seri A une feste del baron seint Moris Charles tint cort ainz plus riche ne vi dedanz Vienne el pales seignori avec lui ot meint chevalier hardi de riches mes furent molt bien servi Apres mengier einz qu il fusent parti dame Guiborc fors d une chanbre issi par la mein destre tint bele Aude lez lui Ele ot vestu .I. paile seignori de sa biaute li pales replandi cil qui la voient en sont tuit esbahi Et Deus dit Charles si bele fame a ci Voire biau sire Hernaut li respondi ele est ma niece bien le sachiez de fi fille Renier le franc conte gentil suer Olivier au coraje hardi Donez la moi Charles li respondi a eus Rollant le mien charnel ami ne la dement por autre que por li James nul jor puis qu il en ert sessi nostre lingnaje ne seront departi Et se Deus done qui onques ne menti c un oir en isse par la seue merci encor porroit grant bien venir de li Hernaut respont Sire vostre merci plus haut ne puet ma niece avoir mari que en vostre lingnaje En piez se drece Charlemene au vis fier Rollant apele son neveu qu il a chier Audein li done a per et a moillier par mi la mein li vait li rois baillier si que le virent baron et chevalier Et l arcevesque i fu por tesmongnier qui devant toz l a fete fiancier et si ont mis terme del nocoier Le jor devisent li prince et li guerrier mes Sarrazin et paien aversier les departirent Deus lor doint enconbrier A ces paroles que vos m oez noncier sus el palais monterent mesagier que rois Yon qui molt fist a proisier i avoit fet de Gascongne envoier Voient lou roi seu saluent premier He riches rois qui France as a baillier poine te croist et molt grant enconbrier .XIIII. roi felon et aversier dedanz Gascongne sont entre des l autrier de Terasconne ont fet les murs brisier Bordiaus ont fet sor Gironde asegier Ja Deu ne place qui tot puet jostissier que tu mes aies fie ne terre a baillier se ne venches la honte Qant li baron ont les mes escoute li plus hardi en sont espoente Et dit Seguins de Bordiaus la cite Mesagier frere dites vos verite que Sarrazin sont en ma terre entre Ouil voir sire le pais ont gaste et essillie et mis a povrete Prin jor de mai ont le terme nome qu il paseront de Gironde le gue juqu a Orliens en vendront la cite prandront Boorges ce ont dit et conte qu ele fu leur jadis en herite Et Deus dit Charles Voir rois de majeste qui ce vosites par la vostre bonte que ge tenisse coronne et roiaute conseilliez moi par la vostre pite c aie l orgueil de cele gent mate qui a tel tort sont en mon resne entre Conseilliez moi mi chevalier menbre si com vos estes mi home et mi chase ici avez une grant piece este tout por m amor ce est la verite servi m avez volentiers et de gre por les granz fiez que ge vos ai done or reservez por Deu de majeste et por s amor conquerre Li arcevesques sus en piez se dreca el faudestuel meintenant en monta molt gentement a parler comenca Seignor baron a moi entendez ca je sui el leu de Deu qui tot forma et de seint Pere que a Rome estora a cui pooir des pecheors dona de pardoner qanque il mesfet a Qui sor paiens ore aler en voudra avec le roi qui France a garder a de ses pechiez trestoz quites sera en l annor Deu qui le mont estora Dient Francois Com haut pardon ci a Molt fu buer nez qui en cele ost ira por tel pardon conquerre En piez se drece l enperaor de France si en rapele trestoz en audience toz ses barons ceus de plus grant puissance Congie lor done et puis si lor comende prin jor de mai einsi come este entre desoz Nerbone resoient tuit ensenble si s en iront sor la gent mescreande Lors en apele dant Girart de Vienne Vos remendroiz et g irai en Espangne vos coment ge Baiviere et Alemengne et vos biau sire dant Hernaut de Biaulende vos comant ge et Genevois et Genvres la tor d Ausai et la cit de Plesance mon fie de Rome que l en claime ma chanbre et Lonbardie que l en rien n i meprengne En non Deu sire ce dit Guiborc la frenche forment vos croit qui tot ce vos comende Voir dites dame dit Hernaut de Bellende Atant monta l enperere de France Li dus Rollant est entrez en la chanbre besa Audein sa bele ami gente et en apres son anel li comende et ele lui la bele ensengne blenche dont il fist puis tante reconnoisance qant ill ala en la terre d Espengne as granz chastiaus et au forz citez prendre Mes Sarrazins que li cors Deus cravente les departirent que il ne la pot prendre ne de nul d aus ne remest oir en France ce fu duel et domage Oi avez de Girart le baron coment il est acordez a Charlon Au chief del terme que nome vos avon en ala Charles en Espangne el roion ses oz mena sor ce pueple felon qui en sa terre ot mis destrucion bien en avez oie la chancon coment il furent trahi par Ganelon Morz fu Rollans et li autre baron et li .XX. mile qui Deus face pardon q an Rancevaus ocist Marsilion Mes d eus ici atant vos leseron et de Girart de qui chante avon et de Biaulende Hernaut li gentis hom et de son fiz ci apres vos diron c est d Aimeri qui tant par fu prodom le seigneur de Nerbone jusqu a .I. jor que vos m orroiz conter